د افغانستان بهرنیو چارو وزارت سرپرست وايي په هېواد کې د سولې او د جمهوري نظام د ساتلو لپاره، سیمهییزه اجماع نهشته.
حنیف اتمر وویل، په افغانستان کې تلپاتې سوله او د جمهوریت ساتنه، د سیمې په ګټه او د جګړې دوام د سیمې په زیان دی.
د افغانستان د بهرنیو چارو سرپرست وزیر محمد حنیف اتمر د یکشنبې په ورځ «۱۳۹۹ کال د وري ۱۷» د خپل کار په لومړۍ ورځ وویل، د افغانستان د ګټو په اړه د سیمې ناسم درک او د سیمې د ګټو په اړه د افغانستان محدود درک، په افغانستان کې د سولې او د جمهوریت د ساتلو په برخه کې د سیمهییزې اجماع د نشتوالي لامل دی.
ښاغلي اتمر وویل، د بهرنیو چارو وزارت به ډېر ژر د افغانستان د بهرني نوي سیاست کرښې د تصویب لپاره کابینې ته واستوي.
په افغانستان کې د سولې او د جمهوري نظام د ساتلو لپاره له نړۍ سره کار کول، د دغو بهرنیو سیاسي کرښو لومړیتوبونه ګڼل شوي دي.
د ښاغلی اتمر په خبره، په پام کې ده چې د افغانستان د ډیپلوماسۍ دستګاه ظرفیت لوړ شي.
ښاغلي اتمر زیاته کړه: "موږ سوله او د نظام ساتنه غواړو، خو په سیمه کې پر دغې مسئلې اجماع نهشته. د افغانستان د دیپلوماسۍ لپاره نوي ګواښونه رامنځته شوي، دا ګواښونه دا دي چې موږ باید په سیمه کې اجماع رامنځته کړو."
د بهرنیو چارو سرپرست وزیر، په هېواد کې سیاسي اختلافونو ته په کتو وايي، که څه هم د ده او د ولسمشر محمد اشرف غني ترمنځ د لید توپیر موجود و، خو د سولې او ملي ګټو په خاطر یې، د دغه وزارت سرپرستۍ ته د ولسمشر غني بلنه ومنله.
ده د افغانستان له سیاسیونو وغوښتل چې خپلمنځي اختلافونه له قانوني لارو لهمنځه یوسي چې هېواد د سولې په مذاکراتو کې بریالی شي.
د محمد حنیف اتمر په مشرۍ د سولې او اعتدال ټاکیز ټیم چې په تېرو ولسمشریزو انتخاباتو کې یې برخه اخیستې وه.
د ده په باور د انتخاباتو موضوع د قانون له مخې پای ته رسېدلې او د افغانستان سیاسي ټولنه باید په بشپړ اتفاق سره بینالافغاني خبرو ته لاړه شي.
ښاغلی اتمر خبرداری ورکوي چې که سیاسیون سره بېل شي، افغانستان به د سولې په خبرو کې بریالی نهشي.
ښاغلی اتمر وايي: "موږ ټولو دغه ژمنه کړې چې نظام له لاسه ورنهکړو او داسې ونهشي چې د اختلافونو په نتیجه کې چې د حل لارهیې یوازې قانون دی، نظام په خپل لاس لهمنځه یو نهسو."
مخکې له دې د افغاستان ولسمشر، په داسې حال کې له طالبانو سره مذاکره کوونکی پلاوی وټاکه چې تر اوسه هم د انتخاباتو د نتایجو په اړه د ولسمشر محمد اشرف غني او عبدالله عبدالله ترمنځ اختلافات حل شوي نهدي.
تر اوسه د دغو اختلافاتو د حل لپاره کورنیو او بهرنیو هڅو نتیجه نهده ورکړې او د امریکا د بهرنیو چارو وزیر په افغانستا کې د ټولشموله حکومت د جوړولو په اړه د ښاغلي غني او عبدالله عبدالله ترمنځ د اختلاف د نهحل کېدو له امله، له افغانستان سره په مرستو کې د یو میلیارد ډالرو د کمولو اعلان وکړ.
مخکې له دې ولسمشر محمد اشرف غني، د سولې د بهیر مشري او مدیریت عبدالله عبدالله ته وړاندیز کړ، خو دغه وړاندیز د عبدالله عبدالله د ټیم لهخوا رد شو.
د بهرنیو چارو د وزارت سرپرست وايي، د درې مصیبتونو لکه کرونا، جګړو او د افغانستان د سولې او د جمهوریت د ساتلو لپاره د سیمهییزې اجماع د نشتوالي ترڅنګ، څلورم مصیبت سیاسي اختلاف دی چې د هېواد تر غاړې شوی دی.