په داسې حال کې چې تازه امریکايي چارواکو ویلي چې د افغانستان روان سیاسي وضعیت د منلو نهدی، د افغانستان څلور مطرحې سیاسي څېرې وايي هڅه کوي چې محمد اشرف غني او عبدالله عبدالله سیاسي جوړجاړي ته ورسېږي.
دغو افغان سیاسي څېرو چې په افغانستان کې له ټاکنو راوروسته د راپورته شوي بحران د حل هڅه کوي له افغان ولسمشر محمد اشرف غني غوښتي چې له ګمارنو نه ډډه وکړي.
هغه ګډه اعلامیه چې د حامد کرزي، عبدرب الرسول سیاف، محمد یونس قانوني او محمد کریم خلیلي له لوري خپره شوې پهکې له ښاغلي عبدالله هم غوښتنه شوې چې تفاهم ته د رسېدو لپاره باید ټاکلې موده وغځوي.
په همدې حال کې د افغان ولسمشر مرستیال ویاند دوا خان مینهپال د یکشنبې په ورځ «۱۳۹۹ کال د وري ۱۷» وايي چې ولسمشر ښاغلي عبدالله ته د سولې عالي شورا مشري او دغهشان په کابینه کې د ده د ټیم کسانو ته وړتیاوو ته په کتو د ونډې وړاندیز کړی دی.
دی ټینګار کوي چې ولسمشر غني د لوړې په مراسمو کې د خپلې ژمنې په اساس د کابینې د غړو د ټاکلو کار پیل کړی دی.
ښاغلی مینهپال زیاتوي: "د لوړې مراسم ترسره شول، په دې مراسمو کې ولسمشر غني له ملت سره ژمنه وکړه چې په دوه اوونیو کې به نوې کابینه جوړه کړي، دا د ولسمشر صلاحیت دی او د سیاسي جنجالونو پورې تړلې مسئله نهده."
دا په داسې حال کې ده چې ولسمشر محمد اشرف غني محمد حنیف اتمر د بهرنیو چارو، عبدالهادي ارغندېوال د مالیې او طاهر زهیر د اطلاعاتو او فرهنګ دسرپرستانو او نوماند وزیرانو په توګه معرفي کړي دي.
دغهشان ایوب سالنګی د سیمهییزو ارګانونو د مالي او اداري مرستیال، داوود سلطانزوی د کابل ښاروال او عبدالوحید قتالي د هرات د والي په توګه معرفي کړي دي.
بلخوا د مرکزي او جنوبي اسیا په چارو د امریکا د بهرنیو چارو وزارت سرپرست مرستیالې الېس ولز په خپل ټویټرپاڼه لیکلي دي چې په افغانستان کې روان سیاسي وضعیت د دې هېواد نړیوالو ملاتړو ته د منلو وړ نهدی.
هغې ټینګار کړی چې نړیوالې مرستې له یوه ټولشموله حکومت سره ګډون ته اړتیا لري او موږ ټول باید افغان رهبران د حکومتوالۍ یوه چوکاټ ته، حساب ورکوونکي وګرځوو.
مخکې له دې هم د امریکا د بهرنیو چارو وزارت په خپله اعلامیه کې ویلي دي چې واشنګټن له دې امله چې افغان رهبران د یوه ټولشموله حکومت په جوړولو کې په هوکړه کولو کې پاتې راغلي دي، خپله یو میلیارد ډالره مرسته کموي.
په ورته وخت کې د عبدالله عبدالله له لوري په خپره شوې خبرپاڼه کې د وروستیو سیاسي کړکېچونو د حل په هدف له هڅو هرکلی شوی دی.
په اعلامیه کې راغلي دي د سیاسي رهبرانو د غوښتنې په اساس چمتو دی چې د تفاهم په برخه کې ټاکلې موده هم وغځوي.
د اعلامیې له مخې د افغانستان ملي ګټو، د سیمې او نړۍ ترینګلو حالاتو ته په کتو او ولسواکۍ ته په احترام چمتو دی چې روان سیاسي کړکېچ د خبرو له لارې حل کړي.
عبدرب الرسول سیاف، حامد کرزي، محمد یونس قانوني او محمد کریم خلیلي له انتخاباتو څخه پاتې شوي کړکېچ د حلولو لپاره د منځګړو په توګه هڅې پیل کړې دي.
که څه هم لاتر اوسه دا هڅې وروستۍ پایلې ته نهدي رسېدلي، خو منځګړو څېرو په دې اړه په خپله وروستۍ اعلامیه کې سره له دې چې د سولې خبرو په پیل ټینګار کړی، ویلي چې په دې برخه کې پرمختګونه شوي دي.
