«بيبيسي» د سېشنبې په ورځ «د تلې ۲۱مه» اعلان وکړ چې د طالبانو حکومت چارواکو په ټول افغانستان کې د دې رسنۍ راډیويي خپرونې پر «اېفاېم» څپو بندې کړې دي.
دې رسنۍ زیاته کړې چې د دې ستونزې د حل لپاره له واکمنو چارواکو سره په اړیکه کې ده.
د «بيبيسي» په اعلامیه کې راغلي: "په ټول افغانستان کې میلیونونه کسان د کره خبرونو او معلوماتو د ترلاسه کولو لپاره پر «بيبيسي» تکیه کوي او موږ د دې وضعیت د حل لپاره له چارواکو سره کار کوو."
د طالبانو د اطلاعاتو او کلتور وزارت ویاند، خبیب غفران، روېټرز خبري اژانس ته ویلي چې د «بيبيسي» فعالیتونه د «پرلهپسې سرغړونو» له امله اوسمهال ځنډول شوي دي.
هغه د سرغړونو په اړه نور جزئیات نهدي ورکړي او دا یې هم نهدي ویلي چې په «اېفاېم» څپې د «بيبيسي» خپرونې به کله بېرته پیل شي.
د (نی) یا د افغانستان د ازادو رسنیو د ملاتړ ادارې پخواني مشر، صدیقالله توحیدي، د سې شنبې په ورځ ازادي راډیو ته وویل چې «بيبيسي» په افغانستان کې د طالبانو له حکومت سره د یوه پروتوکول له مخې فعالیت کوي.
دی زیاتوي: "ترڅو چې زه خبر یم، د «بيبيسي» نشرات په کابل کې د یو پروتوکول په اساس جاري و، خو زه فکر کوم هغه پروتوکول کې چې د «بيبيسي» او د طالبانو د اطلاعاتو او فرهنګ وزارت ترمنځ شوی و ډېر محدودیتونهیې درلودل او امکان لري چې «بيبيسي» هغه پروتوکول ته ژمن پاته شوی نهوي ځکه چې په دغه پروتوکول کې یو څه محدودیتونه و چې د بیان له ازادۍ سره په ټکر کې و."
خو «بيبيسي» لا هم د طالبانو له لوري د خپلو «اېفاېم» خپرونو د درولو د لامل په اړه څه نهدي ویلي.
توحیدي زیاتوي چې په اوسني وضعیت کې د نړیوالو او هغو رسنیو خپرونې چې له افغانستان څخه بهر فعالیت کوي، ډېر اهمیت ځکه لري چې طالبان په هېواد کې اطلاعاتو ته لاسرسی او د رسنیو خپرونې په کلکه کنټرولوي.
په ۲۰۲۱ کال کې واک ته د طالبانو له ستنېدو وروسته، ګڼو نړیوالو رسنیو افغانستان پرېښود او د یو شمېر نورو رسنیو فعالیتونه هم د طالبانو له لوري ودرول شول.
د بېلګې په توګه، د ازادې اروپا/ ازادي راډیو خپرونې د ۲۰۲۲ کال د ډسمبر په لومړۍ نېټه په افغانستان کې پر «اېفاېم» څپو بندې شوې.
دا پرېکړه د طالبانو د حکومت د اطلاعاتو او کلتور وزارت اعلان کړې وه.
سره له دې، ازادي راډیو له افغانستان څخه بهر خپلو خپرونو ته دوام ورکړ او د خپلو میلیونو اورېدونکو او مخاطبانو د لاسرسي لپارهیې فعالیتونه روان وساتل.
په افغانستان کې د «بيبيسي» اېفاېم خپرونې په داسې حال کې درول کېږي چې د راپورونو له مخې، د طالبانو حکومت پر خبریالانو او رسنیو محدودیتونه او فشارونه زیات کړي دي.
د بېپولې خبریالانو سازمان (ار اېس اېف) په دې وروستیو کې ویلي چې د طالبانو د چارواکو له لوري په لیکلې او شفاهي بڼه صادر شويو ګڼو لارښوونو، فرمانونو او امرونو د افغانستان رسنیز چاپېریال سخت محدود کړی دی.
