ولسمشر جوبایدن، امریکايي سیاستوالو او د نړۍ مشرانو د امریکا پر مخکیني ولسمشر ډونالډ ټرمپ وژونکې حمله غندلې ده.
پر مخکیني ولسمشر ډونالډ ټرمپ له مرګوني برید وروسته ولسمشر جوبایډن او ډېرو نورو سیاستوالو سمدستي د غندنې پیغامونه خپاره کړل.
ټرمپ پرون په پنسلوانیا ایالت کې د انتخاباتي کمپاین پرمهال وویشتل شو.
سپینې ماڼۍ اعلان وکړ چې ولسمشر بایډن او مرستیالې یې کامیلا هریس ته د دې برید په اړه معلومات ورکړل شول.
بایډن وروسته وویل چې امریکا د سیاسي تشدد ځای نه دی.
هغه وویل: "د حکومت فدرالي ادارو د وضعیت په اړه پوره معلومات راکړل. ګورئ په امریکا کې دې ډول تشدد ته ځای نه شته. موږ باید خپل هېواد یو موټی کړو او پرې نه ږدو چې دا ډول پېښې وشي. موږ دا کار نه شو زغملی."
د پخواني ولسمشر بارک اوباما غبرګون هم دې ته ورته و.
هغه پر خپله ایکسپاڼه ولیکل چې که څه هم تراوسه نه ده کره شوې چې پېښه څه ده، خو د امریکا په ډیموکراسۍ کې د ده په وینا د سیاسي تشدد لپاره هېڅ ځای نه شته.
د امریکا د استازو د جرګې جمهوریپال مشر مایک جانسن وویل چې په یوه سولهییز انتخاباتي کمپاین کې د سیاسي تاوتریخوالي لپاره ځای نه شته او دا کار باید ټول سخت وغندي.
د جمهوریپالو او ډیموکراتانو په ګډون نورو مهمو امریکايي سیاستوالو هم پر ټرمپ برید غندلی دی.
پر ټرمپ بېګا د پنسلوانیا په بټلر ښار کې په داسې حال کې برید وشو چې وینا یې کوله.
د راپورونو له مخې پولیسو د پېښې له ځایه هغه وسله موندلې ده چې د امریکا د پوځ M16 ټوپک ته ورته ده.
د قانون د تنفیذ ځواکونو دا د ټرمپ د وژنې هڅه بللې ده.
ټرمپ وروسته وویل چې په غوږ لګېدلی دی.
په یوه ویډیو کې ښکاري چې د هغه د سر له ښي اړخ څخه وینې روانې دي.
د امریکا د تحقیقاتو فدرال ادارې یا ایفبيآی FBI ویلي چې په پېښه کې د مشکوک بریدګر په ګډون دوه تنه وژل شوي او دوه نندارچیان ټپیان دي.
ایفبيآیFBI ویلي چې مشکوک بریدګر توماس ماتیوکروکس نومېږي، ۲۰ کلن دی او بټلر ښار ته چې دا پېښه پهکې وشوه نژدې اوسي.
د ټرمپ درملنه په یوه سیمهییز روغتون کې وشوه او وروسته په خپرو شویو ویډیوګانو کې دی په داسې حال کې وښودل شو چې د سختو امنیتي تدابیرو په بدرګه په نیوجرسي کې خپل استوګنځي ته ستنېږي.
له امریکايي سیاستوالو پرته د نړۍ نورو مشرانو هم پر ټرمپ برید غندلی دی.
د ملګروملتونو ویاند ستیفن دوجاریک وویل چې سرمنشي انټونیو ګوټېرېش د سیاسي تشدد دا عمل غندلی او د ټرمپ د سمدستي روغتیا لپاره خپلې پېرزوینې یې هغه ته استولې دي.
د اروپايي کمېسیون مشرې اورزولا فان دېرلین پر خپله ایکسپاڼه ولیکل چې په ډیموکراسۍ کې سیاسي تشدد ځای نه لري او د دې ټولنې د بهرنیو اړیکو مشر جوزیپ بورېل وویل: "یوځل بیا د سیاستوالو پرضد د تشدد شاهدان یو چې د منلو وړ نه دی."
د ایټالیا صدراعظمې جورجیا مېلوني له ټرمپ سره خواخوږي څرګنده کړه، د فرانسې ولسمشر ایمانویل مکرون پر ټرمپ برید د ډیموکراسۍ لپاره یوه تراژیدي وبلله، د جرمني صدراعظم اولاف شولڅ سیاسي تاوتریخوالی د ډیموکراسۍ لپاره یو ګواښ وباله او د اوکراین ولسمشر ولودیمیر زیلینسکي چې له ټرمپ سره لانجمن اړیکي لري وویل چې تشدد هېڅ راز توجیه نه لري او هېڅکله به بریالی نه شي.
د امریکا پخوانی ولسمشر ډونالډ ترمپ د ټاکنیز کمپاین پر مهال په ډزو سره ټپي شو
پر ټرمپ داسې مهال برید وشو چې تمه ده دوه ورځې وروسته د جمهوریپال ګوند لویه غونډه جوړه شي او دا میلیاردر او د تلويزیوني خپرونو چلوونکی د ۲۰۲۴م کال د ولسمشرۍ په انتخاباتو کې رسما د ګوند د کاندید په توګه ونومول شي.