د پاکستان حکومت په دې هېواد کې د راجسټر شویو افغان کډوالو د استوګنې موده د دوو نورو میاشتو لپاره وغځوله.
په اسلام آباد کې د ازادي راډیو د مشال څانګې خبریال د راپور له مخې دا پرېکړه پرون د صدراعظم شهباز شریف په مشرۍ د فدرال کابینې په غونډه کې وشوه.
له دې غونډې وروسته کابینې په یوه بیان کې وویل چې د پياوآر POR اسنادو د لرونکو افغان کډوالو کارتونه د اپریل له لومړۍ نېټې څخه د جون تر دېرشمې پورې تمدید شوي، خو په بیان کې دا هم راغلي دي چې دا کډوال د غیرقانوني کډوالو د ایستلو په وروستي پړاو کې له پاکستانه ایستل کېږي.
د بیان له مخې دا پرېکړه د ایالتونو او سرحدونو د وزارت د وړاندېز په اساس شوې ده.
بیان زیاتوي چې د پياوآر کارتونو لرونکي افغان کډوال د پاکستان په ښوونځیو کې د شمولیت، د بانکي حسابونو د لرلو او نورو آسانتیاوو حق لري.
د کډوالو لپاره د ملګروملتونو د لویې کمېشنرۍ د ارقامو له مخې اوسمهال په پاکستان کې شاوخوا ۱،۳ میلیون راجسټر شوي افغان کډوال اوسېږي.
د فدرال کابینې د بیان له مخې د پياوآر کارتونو د لرونکو افغان کډوالو ایستل به د هغو کډوالو د ایستلو د بهیر له بشپړېدو وروسته پیل شي چې د چارواکو په وینا په پاکستان کې د استوګنې قانوني اسناد نه لري.
په بیان کې همداراز ویل شوې چې د افغانانو په ګډون د ناقانونه بهرنیو وګړو د ایستلو لومړی پړاو همدا اوس روان دی.
په پاکستان کې یوشمېر دېره افغان کډوالو ته پر پياوآر POR کارتونو سربېره د اېسيسي ACC یا د افغانانو د پېژندپاڼې په نوم کارتونه هم ورکړل شوي وو.
دا کارتونه په ۲۰۱۷م کال کې د افغانستان له پخواني حکومت سره د موافقې په اساس افغان کډوالو ته وېشل شوي وو.
پاکستاني چارواکو مخکې ویلي وو چې د قانوني اسنادو د لرونکو افغانانو د ایستلو لړۍ به د اپریل په ۱۵مه پیل شي خو تراوسه چې پر دې مهلت ۱۲ ورځې اوښتي چارواکو رسماً په دې اړه څه نه دي ویلي او د کابینې په پروني بیان کې هم د دې کارتونو د لرونکو کډوالو یادونه نه ده شوې.
د ۲۰۲۳م کال د اکټوبر په درېیمه د پاکستان سرپرست حکومت افغان کډوالو ته د نومبر تر لومړۍ نېټې پورې یعنې له یوې میاشتې لږ مهلت وټاکه چې له دې هېواده په خپله خوښه ووځي که نه په زور به وایستل شي.
د کډوالو لپاره د ملګروملتونو لویې کمېشنرۍ یا یواینایچسيآر UNHCR پرون پر خپله ویبپاڼه په یوه راپور کې وویل چې له پاکستانه د افغان کډوالو د ایستلو په لومړي پړاو کې د نومبر له لومړۍ نېټې څخه تر پرونۍ ورځې پورې ټول ۵۶۲ زره افغانان خپل هېواد ته ستانه شوي دي.
