د کډوالو د حقونو یوه ملاتړي بنسټ د پاکستان له حکومته غوښتي چې د افغان کډوالو د نیولو او ایستلو پرېکړه بېرته واخلي.
د کډوالو لپاره د ګډ اقدام کمېټې ویلي چې د محکمې تر پرېکړې پورې دې د پاکستان حکومت افغان کډوال نه نیسي او نه دې باسي.
د دې کمېټې غړې او په پاکستان کې د افغان بندیانو مدافع وکیلې منیزې کاکړ تېره شپه ازادي راډیو ته وویل چې د بشري حقونو له بنسټونو هم هیله لري چې له پاکستانه د افغان کډوالو د ایستلو مخه ونیسي.
کاکړ وايي: "په هغه بیان کې چې د کډوالو لپاره د ګډ اقدام د کمېټې له لوري خپور شوی دی، د پاکستان له حکومته غوښتل شوي چې غیرقانوني پرېکړه ژر تر ژره بېرته واخلي، څه چې دوی غواړي دا دي چې د اپرېل له پنځلسمې افغان کډوال په زوره افغانستان ته واستوي. په دې اعلامیه کې موږ د بشري حقونو له کمیسیونه غوښتي چې له خپل صلاحیته کار واخلي او د پاکستان حکومت اړ باسي چې خپله دا پرېکړه بېرته واخلي."
د پاکستان د باندنیو چارو وزارت ویندویې زهرا بلوچ په وروستیو ورځو کې خبریالانو ته وویل، د پاکستان د پالیسۍ پر اساس د افغانانو په شمول هغه کسان چې په پاکستان کې په غیرقانوني ډول اوسي، باید خپلو هېوادونو ته لاړ شي.
د کډوالو لپاره د اقدام کمېټې په وروستیو کې وویل چې پاکستان ۸۵۰ زره افغان کډوالو ته، چې د اي سي سي کارتونه لري، د اپرېل تر ۱۵مې وخت ورکړی چې په خپله خوښه له پاکستانه ووځي، ګنې له دې هېواده به وایستل شي.
د کډوالو د چارو فعال محمدباقر احمدي په پاکستان کې د افغان کډوالو وضعیت د اندېښنې بولي.
هغه وايي، هغه کسان چې د سختو امنیتي اندېښنو له کبله پاکستان ته تللي، د پاکستان د دې پرېکړې له کبله اغېزمن کیږي.
له بلې خوا افغانستان په یو وخت د یو میلیون کډوالو د منلو ظرفیت او توان نه لري نو ملګري ملتونه او د بشري حقونو ټولنې دې په دې برخه کې جدي اقدام وکړي.
پاکستان تر دې مخکې د بې اسناده افغان کډوالو د ایستلو بهیر د تېر کال د نومبر له لومړۍ نېټې پیل کړ او ۵ لکه ۳۵ زره افغان کډوال یې وایستل.
د طالبانو له واک ته رسیدو وروسته په تېرو دوه نیمو کلونو کې لکونه افغانان په خطرناکو لارو ګاونډیو هیوادونو ته کډوال شول.
یو شمېر نور اروپا او امریکا ته لاړل.
