د اسوشېټېډپرېس اژانس په ترلاسه کړې ویډیو کې ښکارې چې نن په هیلیکوپټر کې کومانډو ځواکونه په هرمز تنګي کې پر یوې بېړۍ برید کوي.
دا ویډیو دفاعي چارواکو چې د استخباراتي چارو له امله یې د نومونو له ښودلو ډډه کوله له اسوشېټېډپرېس اژانس سره شریکه کړې ده.
په دې ویډیو کې ښکارې چې کومانډو ځواکونه د بېړۍ د کانټینرونو خوا ته ښکته کېږي.
د کښتۍ د عملې یو غړی وایي: "مه راوځئ."
دی بیا خپلو همکارانو ته وایي چې "د کښتۍ بل لورې ته ولاړ شئ."
اسوشېټېډپرېس اژانس څرګندوي چې سمدستي د ویډیو کرهوالی نه شي تاییدولی. پر دې کښتۍ احتمالاً د پرتګال بیرغ لیدل شوی دی.
تر دې راپور وروسته ایراني رسنیو وویل چې د دوی ځواکونو نن په خلیج کې د دوی په وینا د صهیونیستي رژیم یوه کانټینر کښتۍ نیولې ده.
د ایرنا دولتي اژانس د راپور له مخې د "ایم سي ایس-اریس" په نوم باربري بېړۍ د سپاه ځانګړیو سمندري ځواکونو ګرځولې ده.
فرانسپرېس اژانس راپور ورکړی چې دا کښتۍ ایران د خپلو اوبو خواته بیولې ده.
د اسراییل پوځ ویلي چې ایران به د وضعیت د لاخرابېدو پایلې وویني.
د راپورونو له مخې دا بېړۍ د متحده عربي اماراتو او ایران ترمنځ په اوبو کې څو ورځې وروسته تر دې نیول شوې چې ایران خبرداری ورکړی و چې د اوبو دا لاره به د بېړیو پرمخ وتړي.
رویټرز اژانس د امریکا د متحد ایالتونو د دفاعي چارو د یوه مسوول په وینا خبر ورکړ چې دا مسئله څاري.
واشنګټن ایران ته خبرداری ورکړی چې پر اسراییل حمله ونه کړي.
د امریکا د متحد ایالتونو ولسمشر جو بایډن د جمعې په ورځ وویل، داسې اټکل کوي چې ایران به ژر پر اسراییل برید وکړي، خو ده تهران ته خبرداری ورکړ چې دا کار ونه کړي.
وروسته تر دې چې د اپرېل په لومړۍ نېټه د سوریې په پلازمېنه دمشق کې د ایران پر قونسلګرۍ د هوا له لورې برید وشو د ایران د سپاه پاسداران انقلاب د اوو غړو په ګډون دولس تنه ووژل شول، په دوی کې دوه د سپاه جنرالان وو، تر دې وروسته تهران بیا بیا دا خبره کړې ده چې خپل غچ به واخلي.
د راپورونو له مخې اسراییل پرون د ایران یا د ایران د ملاتړیو وسلهوالو له لورې پر اسراییل د احتمالي برید لپاره چمتوالی نیولی و.
