د مصر پلازمېنې قاهرې ته د نړۍ یو شمېر مشران نن سهار ورسیدل.
په دوی کې د جرمني د بهرنیو چارو وزیره، انالینا بیربوک، د برېتانیا د بهرنیو چارو وزیر جیمز کلیورلي او د عربي هېوادونو په مشرانو کې د فلسطیني ادارې مشر محمود عباس، د قطر امیر شیخ تمیم بن حمد ال-ثاني شامل دي.
مصر غواړي چې د سیمې او نړۍ د لسګونو مشرانو په دې غونډه کې پر دې خبرې وشي چې څرنګه په غزه کې د روانې جګړې مخه نیولی شي.
د مصري رسنیو په وینا، قاهره دا اندېښنه لري چې دا جګړه په سیمه کې پراخه نه شي.
د قاهرې په ننۍ غونډه کې د ایټالیا، هسپانیا، یونان او کاناډا د بهرنیو چارو وزیران او د اروپایي شورا یوه پلاوي هم برخه اخیستې ده.
چین ویلي دي چې د قاهرې غونډې ته د منځني ختیځ لپاره خپل استازی ژي جن واستوي.
روسیې ویلي دي چې د بهرنیو چارو د وزارت مرستیال میخایل بوګدانوف به په دې غونډه کې د دوی استازیتوب وکړي.
دا سرمشریزه په داسې وخت کې جوړیږي چې پر غزې د هوا له لارې د اسراییل برید روان دی.
د اسراییل د پوځ ویاند دانیال هګاري نن وویل چې په غزه کې بشري وضعیت تر کنټرول لاندې دی او ده د غزې له استوګنو وغوښتل چې له شماله د جنوب خواته ولاړ شي، ځکه په خبره یې ، دوی د غزې تړانګې په شمالي برخه کې حماس ډله په نښه کوي.
د غزې د جنوب لور ته نن په بشري مرستو بار یوشمېر لارۍ د مصر د رفح سرحدي دروازې له لورې ننوتي دي.
دا مرستې د اسراییل او حماس ترمنځ د جګړې په پنځلسمه ورځ غزې تړانګې ته، چې دوه اعشاریه څلور میلیونه نفوس لري، رسیږي.
د یو شمېر کتونکو په باور د قاهرې په غونډه کې د امریکا د متحد ایالتونو او یو شمېر نورو هېوادونو د استازیو نه موجودیت ښایي د دې سبب شي چې له دې سرمشریزې ډیره تمه ونه شي.
