د روسیې ولسمشر ولادمیر پوتین خبرداری ورکړی، که اوکراین د روسي ځواکونو په وړاندې لانجمن خوشهيي مهمات وکاروي، روسیه به هم ځوابي اقدام وکړي.
د روسیې ولسمشر ولادمیر پوتین په هغه مرکه کې چې د دغه هېواد دولتي تلوېزیون نن یکشنبه خپره کړې، اوکراین ته د امریکا د متحدو ایالتونو لهخوا د خوشهيي مهماتو پر ورکړه انتقاد وکړ.
پوتین ویلي، که په اوکراین کې دغسې وسلې د روسي ځواکونو پر خلاف وکارول شي، نو "موږ هم حق لرو، چې د ځانونو د خوندیتوب لپاره ځوابي اقدام وکړو."
پوتین دا نه مني، چې روسي ځواکونو دې په اوکراین کې خوشهيي مهمات کارولي وي، خو کییف او د لوېدیځ نورو استخباراتي بنسټونو دا موندلې چې روسي ځواکونو د ۲۰۲۲م کال په فبروري میاشت کې پر اوکراین تر یرغل لنډ وخت وروسته خوشهيي مهمات کارولي دي.
په نړۍ کې څه باندې سلو هېوادونو د خوشهيي بمونو او مهماتو کارول منع اعلان کړي دي.
د امریکا متحدو ایالتونو د جولای میاشتې پر اوومه اعلان وکړ، چې اوکراین ته به خوشهيي مهمات ولېږي.
وروسته د اوکراین د پوځ یوه قوماندان د تېرې اوونۍ د پنجشنبې په ورځ تایید کړه چې هېواد یې د خوشهيي مهماتو لومړۍ بسته ترلاسه کړې ده.
د اوکراین د ګډو ځواکونو د عملیاتو قوماندان جنرال اولکساندر تارناوسکي له 'سي این این' تلوېزیوني شبکې سره په مرکه کې ویلي، چې د اوکراین پوځ لا هم دغه مهمات نهدي کارولي او په ملکي ساحو کې به یې ونه کاروي.
بلخوا د اوکراین د غله جاتو د صادرولو په باب د شوې موافقې له مخې وروستۍ کښتۍ نن له اوکراین روانه شوه.
روسیې د جون میاشتې له ۲۷مې نېټې د دې موافقې له مخې چې مهلت یې سبا دوشنبه ختمېږي، د نویو انتقالاتو له راجسټر کولو ډډه کړې ده.
د ملګرو ملتونو یوه ویاند تېره جمعه د جولای پر ۱۴مه ویلي وو، چې د ملګرو ملتونو سرمنشي انټونیو ګوټېرېش د دې موافقې د تمدید په اړه د روسیې د ولسمشر ولادمیر پوتین ځواب ته په تمه دی.
د روسیې ولسمشر ولادمیر پوتین پرون شنبه ویلي، چې د ملګرو ملتونو داسې کوم پېشنهاد یې نهدی لیدلی. روسیې په وار- وار خبرداری ورکړی، چې دغه موافقه به فسخه کړي.
راپورونه وايي د دې وړاندیز د منلو په بدل کې روسیه غواړي چې د روسیل-خوز-بانک په نوم روسی بانک د پیسو د راکړې ورکړې له نړیوال سیسټم یا سویفټ سره وتړل شي.
د اوکراین د غله جاتو د صادراتو د بیا پیل موافقه د مې میاشتې پر ۱۷مه د دوو میاشتو لپاره تمدید کړای شوې وه.
