زرګونه کسانو پرون شنبه د فبرورۍ ۲۵مه د جرمني په برلین ښار کې د برانډنبرګ دروازې مخې ته راټول شوي وو او د اوکراین د جګړې د پای ته رسولو لپاره یې د خبرو اترو په ملاتړ لاریون وکړ.
دا لاریون پر اوکراین د روسیې د پراخ یرغل له کلیزې یوه ورځ وروسته ترسره شو او د یوې مشهورې کیڼ اړخې سیاستوالې سحرا واګینخټ او د جرمني د ښځو د حقونو فعالې الیس شوارزر پله بلنه خلک ټول سره ټول شوي وو.
مېرمن سحرا د کیڼ اړخي افراطي ګوند دی لینکه سره تړاو لري چې د پخواني ختیځ آلمان د کمونېست ګوند له پاتې شونو څخه جوړ شوی دی.
د جرمني خبري اژانس ډي پي اې د راپور په اساس د واورو او یخنۍ سره سره، د برانډنبرګ دروازې هرې خوا ته ګڼ شمېر خلک راټول شوي وو.
د دې لاريون يو شمېر ګډونوالو د سولې بيرغونه له ځان سره لېږدول.
د جرمني پولیسو پرون د ماسپښین تر دوو بجو پورې د دې لاریون د ګډون کوونکو شمېر ۱۰ زره ښودلی و، خو تنظیموونکو دغه شمېر پنځوس زره تنه اعلان کړ او د دې غونډې د امنیت د تامین لپاره شاوخوا ۱۴۰۰ پولیس هم هلته موجود وو.
د جرمني خبري اژانس د خبر له مخې، منتقدینو د دې لاریون تنظیموونکي په سادګۍ او د جګړې له واقعیتونو په ناپوهۍ تورن کړي. دي.
د دې لاریون پر ضد څو وړې غونډې هم پرون په برلین کې د برانډنبرګ دروازې په شاوخوا سیمو کې وشوې.
په دغو غونډو کې، د جګړې د پلوي سمبولونو ښودل منع وو.
دوه اونۍ مخکې، صحرا واګنخت او الیس شوارزر د 'سولې منشور' خپور کړ چې د جرمني له صدراعظم اولاف شولز څخه یې وغوښتل چې اوکراین ته د وسلو د استولو بهیر ودروي.
دغه منشور هم له روسیې سره د اوربند او د سولې د خبرو غوښتنه کړې او تر پرون ماسپښین تر ۶۴۰ زرو ډېرو کسانو په انلاین ډول د سولې له دغه منشور سره موافقه کړې وه.
د جرمني صدراعظم اولاف شولز وویل: "اوسمهال د روسیې ولسمشر د خبرو اترو یوازې یوه بڼه مني چې هغه بې قید او شرطه تسلیمېدل دي."
دا په داسې حال کې ده چې چین په دې وروستیو کې په یوه دولس ماده ییز وړاندیز کې په اوکراین کې د سیاسي حل غوښتنه کړې، خو له روسیې یې نه دي غوښتي چې له اوکراینه ووځي.
د اوکراین ولسمشر ولودومیر زیلینسکي پرون د چین د وړاندیز د ځینو برخو هرکلی وکړ او ویې ویل چې دا یو مشخص پلان نه دی، خو دی به د چین له ولسمشر شي جن پینګ سره وګوري او په اوکراین کې به د اوربند لپاره د هغه پر وړاندیز خبرې وکړي.
د دې غونډې د دقیقې نېټې په اړه څه نه دي ویل شوي.
د اوکراین لوېدیځو متحدینو د چین پر دغه وړاندیز شک څرګند کړی دی.
