د لاسرسۍ وړ لېنکونه

تازه خبر
جمعه ۱۸ لیندۍ ۱۴۰۱ کابل ۱۲:۳۴

مخکښ طالب غړی حاجي بشر نورزی له امريکايي وګړي 'مارک فريرکس' سره تبادله شو


د طالبانو يو مخکښ مشر حاجي بشر نورزی

د طالبانو حکومت یو مخکښ غړی حاجي بشر نورزی له اولس نیم کاله بند وروسته نن کابل کې طالبانو ته د یو امریکايي وکړي مارک فريرکس سره په تبادله کې وسپارل شو.

د طالبانو حکومت د بهرنیو چارو سرپرست امیرخان متقي په همدې اړه جوړې شوې غونډې ته وویل، دغه تبادله د افغانستان او امریکا ترمنځ د اړیکو په برخه کې نوی باب پرانیزي.

بشر نورزي هم دغه ګام د امریکا او افغانستان ترمنځ د سولې د خبرو لپاره د پیل یوه نوې لاره یاده کړې.

د امریکايي حکومت په اسنادو کې د هغه نوم حاجي بشیر نورزی لیکل شوی او غربي رسنۍ یې هم د بشیر په نوم یادوي.

د طالبانو حکومت وايي، حاجي بشر نورزی نن دوشنبه په کابل کې دوی ته سپارل شوی.

د طالبانو حکومت د بهرنیو چارو سرپرست وزیر امیر خان متقي، د یوې خبرې ناستې پر مهال وویل، نوموړی د یو امریکايي وګړي (مارک فريرکس) سره په تبادله کې خوشې شوی.

د متقي په وینا، دا ګام د دواړو هېوادنو ترمنځ اړیکې رغوي.

نوموړي وويل: "د ده خلاصون د افغانستان او امریکا ترمنځ په اړیکو کې یو نوی باب ګڼو، امید لرو چې دغه پرګروامونه کولای شي دواړه هېوادنو سره نږدې کړي او د حاجی صیب خلاصون موږ ته دا پیغام هم راکړ چې مسایل په خبرو او مذاکراتو حل کېږي په زرو، جنګ او جبر نه‌شي حل کېدای."

د طالبانود بهرنیو چارو سرپرست زیر مولوي امیرخان متقي.
د طالبانود بهرنیو چارو سرپرست زیر مولوي امیرخان متقي.

د طالبانو حکومت د بهرنیو چارو وزیر دغه شان وویل، دوی له ټولې نړۍ سره ښې اړیکې غواړي.

په ورته وخت کې له ګوانتانامو زندان څخه راخوشې شوي بشر نورزي یادې خبري ناستې ته د خپلو خبرو پر مهال وویل، نوموړی د طالبانو حکومت په هڅو د امریکايي وکړي (مارک فريرکس) سره په تبادله کې ازاد شوی.

نوموړي وویل، دده ازادېدل به د دواړو هېوادونو ترمنځ اړیکې پیاوړي کړي.

نوموړي وويل: "د اسلامي امارات د مجاهدینو په کوششونو او تکلیفونو په وجه راخلاص شوم او زما خلاصون به ان شالله د افغانستان او امریکا د نږدې والي سبب وګرځي، زه فکر کوم چې دا مشکلات به ټول له‌منځه ولاړي شي او دوی به سره نږدې شي."

د یو شمېر نړېوالو راپورنو پر بنسټ، بشر نورزی په ۲۰۰۵ کال کې امریکا ته د سفر پر مهال ونیول شو او په نیویارک کې یوې محکمې د ۲۰۰۹ کال د اپریل پر ۳۰مه نوموړی دغه هېواد ته د نشه يي توکو د قاچاق له کبله په عمري بند سزا محکوم کړ.

د طالبانو يو مخکښ مشر حاجي بشير نورزی
د طالبانو يو مخکښ مشر حاجي بشير نورزی

او د امریکا د سمندري ځواکونو متقاعد افسر (مارک فریریکس) کله چې په ۲۰۲۰ کال کې د طالبانو لخوا په خوست کې برمته کېده، د ساختماني پروژو ملکي انجنیر و، نوموړی له تېرو شاوخوا دوه کلنونو راهیسې له طالبانو سره بندي و.

د امریکا متحدو ایالتونو تر اوسه د دغې تبادلې په اړه څه نه‌دي ویلي.

د یادونې ده، د امریکا جمهور رئیس جو بایډن مخکې ویلي و، وړاندې تر دې چې طالبان دا تمه ولري چې د هغوی د رسمیت پېژندنې په ارمان غور وشي، باید مارک فریریکس سم‌لاسي خوشې کړي.

پر افغانستان د طالبانو له واکمنېدو له یو کال زیاته موده ووته خو تر اوسه د دوی حکومت د نړۍ د هیڅ هېواد له خوا په رسمیت نه‌دی پېژندل شوی.

XS
SM
MD
LG