د افغاني ښځو د حقونو په اړه د اندېښنو په دوام کې، د بشري حقونو د څار سازمان او ناروې په افغانستان کې د ښځو له حقونو د سر غړونو په اړه سخته اندېښنه ښودلې.
د بشري حقونو د څار سازمان وايي، د ښځو او نجونو له حقونو د طالبانو د سرغړونو نوملړ ډېر اوږد دی او دا سرغړونې مخ په زیاتېدو دي.
د بشري حقونو د څار سازمان یوه اعلامیه کې د دې سازمان د ښځو څانګې مشرې هېدر بار له قوله، د نجونو او ښځو په اړه د طالبانو وروستي محدودیتونو وحشتناک بولي او زیاتوي، دا شرایط له نجونو او ښځو خپلواکي اخلي او دوی له خپلو وړتیاوو محروموي.
د مېرمن بار اشاره د طالبانو لهخوا په زور د نجونو او ښځو مخ پټولو ته ده چې نږدې میاشت وړاندې طالبانو جبري کړل.
اغلې بار ازادي راډیو ته وویل: "په افغانستان کې د بشري حقونو وضعیت، په ځانګړې توګه د ښځو او نجونو د حقونو په برخه کې حالت ورځ تر بلې خرابېږي. موږ د دې شاهدان یوو چې د هېواد په هره برخه کې هره ورځ د دوی پر حقونو محدودیتونه لګېږي. موږ وینو چې نړیواله ټولنه دې وضعیت ته د ډېرو اعلامیو، ژورو اندېښنو څرګندولو او غندلو سره ځواب وایي، خو افغان مېرمنې له اعلامیو ور ها خوا لا ډېر څه غواړي، هغوی د اساسي پلانونو او ګامونو پورته کولو ته په تمه دي او غواړي چې په دې برخه کې عملي کار وویني."
د بشري حقونو د څار سازمان د ښځو څانګې مشره زیاتوي، د طالبانو دا پرېکړه چې د حجاب نه د مراعتولو پر مهال د کورنۍ نارینهوو ته سزا ورکوي، نارینه مجبوروي چې پر ښځو محدودیت زیات کړي.
مېرمن بار پر نړیوالې ټولنې هم نیوکه کوي چې پر نجونو او ښځو د طالبانو محدودیتونه یې یوازې په اعلامیو کې غندلي او په دې کې پاتې راغلي چې د دې وضعیت مخنیوی وکړي.
خو طالبان بیا وايي، حجاب د افغانستان کورنۍ موضوع ده او تر خوا یې د افغان ښځو ټول حقونه خوندي دي.
د طالبانو د حکومت ویاند ذبیحالله مجاهد په دې اړه وايي: "داسې څه په افغانستان کې نهشته چې د چا حقوق نقض شوي وي، یا نقض شي. د اسلامي امارت لهخوا هڅه کېږي، هغو برخو کې چې رسېدهګي نهده شوې، ورته رسېدهګي وشي."
ښاعلی مجاهد دا څرګندونې داسې مهال کوي، چې طالبانو واک ته تر بیا ځلې رسېدو وروسته، پر نجونو او ښځو د محدودیت لګولو لپاره څو ګامونه واخيستل چې دا پرېکړې یې له پراخ غبرګون سره مخ دي.
دوی له شپږم ټولګي پورته د نجونو ښوونځي بند کړل، په ډېرو دولتي ادارو کې د ښځو حضور را کم کړ، پر ښځو یې مخ پټول جبري کړل او تر خوا یې له محرم پرته د دوی په سفر بندیز هم ولګاوه.
د دوی دا کړنې په کور دننه او بهر له غبرګونونو سره مخ وې.
یو شمېر ښځو په دې تړاو اعتراضونه هم وکړل، چې د دوی په خبره طالبانو یې د اعتراضونه مخه ونیوله.
تازه په ملګرو ملتونو کې د ناروې استازولي وايي، له ثانوي زدهکړو د نجونو د راګرځولو او نورې محدوده کوونکې پرېکړې، د ښځو پرمختګ،خپلواکۍ او د افغانستان راتلونکې ته زیان رسوي.
په ملګرو ملتونو کې د ناروې استازې پر طالب چارواکو غږ کوي چې د ټولو افغانانو غوښتنو ته غوږ ونیسي.
تر خوا یې د بشري حقونو د څار سازمان له نړیوالې ټولنې غواړي، چې یو واضحه پلان جوړ کړي چې څه ډول له ښځو او نجونو سره د طالبان د ناوړه چلند مخه ونیسي او پر طالبانو فشار راوړي چې دا چلند پای ته ورسوي.
