د اروپایي ټولنې مشران د اوکراین د ملاتړ لپاره دوه ورځنۍ غونډه جوړوي.
د اروپایي ټولنې مشران نن دوشنبه د اوکراین پر وضعیت دوه ورځنۍ غونډه داسې مهال پيلوي چې د جرمني د اقتصاد وزیر د دغې ټولنې پر نه یووالي اندېښنه ښودلې ده.
رابرت هابک ویلي، د اروپایي ټولنې د یووالي ټوټه کېدل په پیلېدو دي.
دا اندېښنه داسې مهال راپورته کېږي چې پرون یکشنبه د اروپایي ټولنې سفیران د اروپایي کمېسیون پر هغه وړاندیز سلا نه شول چې ویلي یې دي، له روسیې دې اروپا ته په نللیکه کې د نفتو انتقال له بندیزونو استثنا شي.
دغه کمېسیون پخوا ویلي و، چې اروپا ته دې د روسیې د خامو نفتو لېږد په شپږو میاشتو کې بند شي، خو هنګري د دغې پرېکړې مخالفت کړی دی.
اروپایي مشران به د بروکسل په غونډه کې د اوکراین د پوځي او مالي ملاتړ ژمنې تکرار کړي.
د اوکراین ولسمشر ولودمیر زیلنسکي هم د غونډې په لومړۍ ورځ د ویډیو کانفرانس له لارې ګډونوالو ته وینا کوي او ټاکل شوې چې نوموړی له اروپایي ټولنې وغواړي چې پر مسکو د جګړې د پای ته رسولو لپاره نوي بندیزونه ولګوي.
تمه ده، چې اروپایي مشران په خپلو بحثونو کې په هغه وړاندیز هم خبرې وکړي چې له مخې یې په ۵ کلونو کې د روسیې د تېلو صادرات بندېږي.
بل لورته روسي ځواکونو د اوکراین د ختیځ دونباس سیمې پر دوو ښارونو لوهانسک او دونیتڅک او دغه راز شمالي څنګ لورې سیمه خارکیف کې خپل بریدونه جاري ساتلي دي.
د اوکراین ولسمشر ولودمیر زیلنسکي د جګړې له پيل راهیسې پرون د لومړي ځل لپاره د خپل هېواد دوهم لوی ښار خارکیف ته ولاړ.
خارکیف ته د زیلنسکي له سفره وروسته پر دغه ښار روسي پوځیانو بمباري هم وکړه.
اوکراین ویلي، ځواکونه یې د دغه هېواد ختیځ کې پر دفاع اخته دي، خو په خبره یې وضعیت یې د اندېښنې وړ دی.
د اوکراین ولسمشر ویلي، د ختیځ سیویرو دونیتڅک ښار ۹۰ سلنه ودانۍ نړیدلي او دوه پر دریمه برخه استوګنیز کورونه ویجاړ شوي دي.
په همدې حال کې د روسیې د بهرنیو چارو وزیر سرګي لاوروف یو ځل بیا اوکراین کې د خپلې جګړې دفاع کړې او ویلي یې دي، د دونباس سیمې خپلواکي، د دوی "بې قید او شرطه لومړیتوب" دی.
