د لاسرسۍ وړ لېنکونه

تازه خبر
شنبه ۳۱ غویی ۱۴۰۱ کابل ۰۳:۵۷

افغانستان کې د رسنیو په وړاندې د ګواښونو او محدودیتونو په اړه د یوناما اندېښنه


دیبورا لاینز پرون د طالبانو د اطلاعاتو او کلتور له سرپرست وزیر مولوي خیرالله خیرخواه سره په کتنه کې د رسنیو پر ازادیو خبرې وکړې.

د افغانستان لپاره د ملګرو ملتونو د سرمنشي ځانګړې استازې افغانستان کې د رسنیو په وړاندې د پرتو ګواښونو او محدودیتونو په باب اندېښنه وښوده.

دیبورا لاینز پرون د طالبانو د اطلاعاتو او کلتور له سرپرست وزیر مولوي خیرالله خیرخواه سره په کتنه کې د رسنیو پر ازادیو خبرې وکړې.

د یوناما د اعلامیې له مخې مېرمن لاینز پرون د رسنيو په وړاندې د پرتو محدودیتونو او ګواښونو په اړه د اندېښنې په څرګندولو سره له دغه وزارت څخه وغوښتل چې له ژورنالېستانو سره رغنده خبرې اترې پيل کړي.

دا خبرې داسې مهال کېږي چې د اګسټ له ۱۵مې چې طالبانو پر کابل ولکه ټینګه کړه پر رسنیو او د رسنیو پر کارکوونکو د محدودیتونو او فشارونو د زیاتېدو راپورونه ورکړل شوي دي.

د افغانستان د رسنیو د ملاتړ بنسټونو فدراسیون غړي ضیا بومیا د افغانستان لپاره د ملګرو ملتونو د سرمنشي د ځانګړې استازې تر پرونیو خبرو وروسته ازادي راډیو ته وویل: "فکر کوم د یوناما استازې خپله غوښتنه وروسته له هغې مطرح کړله چې د ځینو رسنیو استازو له هغې سره په کابل کې وکتل، خو له بده مرغه د رسنیو پر فعالیت د څار دنده اوس تر ډېره په اطلاعاتو او فرهنګ وزارت اړه نه‌لري، د طالبانو د استخباراتو ادارې او امر بالمعروف ادارې له‌خوا د رسنیو پر فعالیت او د فعالیت پر څرنګوالي ګڼ محدودیتونه لګول کېږي چې هیله ده د پای ټکی کېښودل شي."

د افغانستان د رسنیو د ملاتړ بنسټونو فدراسیون غړی ضیا بومیا
د افغانستان د رسنیو د ملاتړ بنسټونو فدراسیون غړی ضیا بومیا

د بې‌پولې خبریالانو (ار اېس اېف) د ټولنې او د افغانستان د ژورنالېستانو د خپلواکې ټولنې د تېرې میاشتې د ګډې سروې پر اساس، د تېر کال د اګسټ له ۱۵مې را په دې خوا په افغانستان کې ۲۳۱ رسنۍ بندې شوي او څه باندې ۶ زره ۴۰۰ خبریالانو دندې له لاسه ورکړې دي.

د طالبانو مرستیال ویاند بلال کریمي ازادي راډیو ته ویلي د دوی د بیا واکمنېدو راهیسې د رسنیو وضعیت ښه او نورمال دی او د تېر په څېر فعالیت او نشرات پر مخ وړي.

ده ویلي رسنیو ته کوم تهدید او ګواښ نه‌دی متوجې شوی.

د طالبانو له ډاډ سره سره په ګڼو ولایتونو کې غیر دولتي خبریالان نیول شوي، شکنجه شوي او ګڼ‌یې له افغانستانه وتلو ته اړ شوي دي.

XS
SM
MD
LG