د اوکراین پولې ته نږدې د روسیې د سلګونو پوځیانو ځای پر ځای کېدو نهیوازې په اوکراین، بلکې په نورو لوېدیځو هېوادونو له دې ډلې جرمني کې اندېښنې ولاړې کړې دي.
د جرمني دوو وزيرانو د اروپايي ټولنې پخوانی خبرداری بیا تکرار کړ، هغه دا چې پر اوکراین د پوځي یرغل په صورت کې به روسیه له سختو بندیزونو سره مخامخه شي.
دوی ویلي، دا احتمال کولای شي برلین دې ته مجبور کړي چې له مسکو سره د نورد سټریم-۲ په نوم د طبیعي ګازو د نللیکې په تړاو پر خپله همکارۍ بیا غور وکړي.
دا تازه خبرداری داسې مهال ورکول کېږي چې کیف او لوېدیځ ملاتړي یې پر روسیه تور لګوي چې د اوکراین پولې ته څېرمه د خپلو سلګونو پوځیانو په ځای پر ځای کولو سره د راروانې میلادي میاشتې په لومړیو کې پر اوکراین احتمالي پوځي یرغل ته ځان چمتو کوي، خو روسیه دا تور نهمني.
وروسته له هغې چې روسیې په ۲۰۱۴م کال کې د اوکراین کریمیا ټاپووزمه لاندې او له خپلې خاورې سره الحاق کړه، دغهراز یې د اوکراین په ختیځ کې د روسپلوه بېلتون غوښتونکو ملاتړ ته دوام ورکړ، اروپايي ټولنې څو څو وارې پر روسیې بندیزونه ولګول.
د اوکراین په ختیځ کې د روانې جګړې له کبله تر اوسه ۱۳،۲۰۰ کسان وژل شوي دي.
اروپايي ټولنې له روسیې د کړکېچ د کمولو او د اوکراین په ختیځ کې د روانې شخړې د حل لپاره د ډیپلوماسۍ د لارې غوره کولو غوښتنه کړې ده.
دغې ټولنې خبرداری ورکړی چې پر اوکراین د هر ډول پوځي یرغل په صورت کې به اروپا له بریتانیا او د امریکا له متحده ایالاتو سره په همغږۍ پر مسکو لا سخت بندیزونه ولګوي.
روسیې پر اوکراین د پوځي یرغل د احتمال تورونه رد کړي دي.
د جرمني دفاع وزیرې کریستین لامبریخت پرون یکشنبه له بیلډ ام سونتاګ ورځپاڼې سره په مرکه کې وویل، روسیه نهشي کولای د سیمې د امنیت په اړه ناټو تړون ته حکمونه ورکړي.
د هغې په خبره پر اوکراین د روسیې د یرغل په صورت کې د مسکو پر وړاندې له هرو ممکنه ډیپلوماتیکو او اقتصادي بندیزونو کار اخیستل کېږي.
د روسیې لهخوا د کریمیا ټاپووزمې تر لاندې کولو وروسته، ناټو تړون د ختیځې اروپا په پولو کې خپل حضور پراخ کړی چې دې کار د مسکو انتقادونه پارولي دي.
بلخوا د جرمني د اقتصاد وزیر رابرت هابک هم خبرداری ورکړ، پر اوکراین د روسیې د یرغل په صورت کې به د نورد سټریم-۲ په نوم هغه نللیکه چې طبیعي ګاز له روسیې جرمني ته لېږدوي، ممکن له سختو عواقبو سره مخامخه شي.
په پام کې ده دغه نللیکه جرمني ته د روسیې د ګازو انتقال دوه برابر زیات کړي، خو دغه پروژه په وروستیو کې د پولنډ په ګډون په اروپايي ټولنه کې د جرمني د شرقي متحدانو له انتقادونو سره مخامخ شوې ده.
امریکا او اوکراین هم د دې پروژې مخالفین دي او په وار وار یې له جرمني غوښتنه کړې چې په دې اړه دې بیا غور وکړي.
