د افغانستان عامې روغتیا وزارت وايي چې په دغه هېواد کې په وروستیو اوونیو کې د کرونا ویروس په مثبتو پېښو کې نسبي زیاتوالی راغلي.
دغه وزارت په داسې حال کې په افغانستان کې د کرونا ویروس د مثبتو پېښو د زیاتېدو وايي چې د سیمې په هېوادونو په ځانګړي ډول هند کې د کرونا ویروس درېیمه څپه د څونامي په څېر په چټکۍ خپرېږي.
د دې وزارت مرستیال ویاند عثمان طاهري ازادي راډيو ته وویل، که څه هم د کرونا درېیمه څپه افغانستان ته نهده راغلې، خو عامې روغتیا وزارت له وړاندې ورته جدي تدابیر نیولي دي. دی وايي، که څه هم افغانستان کې مثبتې پېښې زیاتې شوي، خو د ګاونډيو هېوادونو په پرتله وضعیت ښه دی.
ښاغلي طاهري د دوشنبې په ورځ «۱۴۰۰ کال د غويي ۰۶» له ازادي راډیو سره په خبرو کې د سیمې هېوادونو په ځانګړي ډول هندوستان ته د افغانانو د سفر په اړه وویل: "د تېر په پرتله په هوايي سفرونو کې کموالی راغلی دی، هغه کسان چې هوايي سفر کوي د پيسيار 'کووېډ-۱۹' منفي پایلې هم لري، خو له بده مرغه د هرې ورځې په تېرېدو د کرونا ویروس په مثبتو پېښو کې نسبي زیاتوالی لیدل کېږي، خو بیا هم د ګاونډيو هېوادونو په پرتله زموږ وضعیت ښه دی، ستونزه اصلاً د خلکو بېغورۍ کې ده، دوی باید روغتیايي پاملرنې عملي کړي."
ښاغلی طاهري د دې پوښتنې په ځواب کې چې ایا د کابل په ګډون به یو شمېر نور ولایتونه قرنطین شي وویل، تر دې دمه حالات دومره خراب نهدي چې د قرنطین پرېکړه وشي.
دا اندېښنې په داسې حال کې دي چې اوسمهال په هندوستان کې په کرونا ویروس د اخته کسانو شمېر تر بل هر وخت زیات شوی دی.
په هندوستان کې د افغانستان سفیر فرید ماموندزي له ازادي راډيو سره په یوې ځانګړې مرکه کې هندوستان ته د درملنې لپاره د افغان ناروغانو پر ورتګ اندېښنه وښوده او ویېویل چې لږ تر لږه هره ورځ دوه یا درې افغانان د کرونا ویروس له امله مړه کېږي.
ښاغلی ماموندزی وايي: "اوس دلته شرایط ډېر خراب دي، وضعیت بد دی، موږ له بده مرغه په تېرو څو ورځو کې ډېر داسې واقعات درلودل چې خلک دلته د نورو ناروغیو درملنې ته راغلي، خو په روغتونونو کې کرونا شوي دي او په حق رسېدلي دي، تقریباً هره ورځ دوه یا درې داسې واقعات لرو."
ښاغلی ماموندزی له ټولو مسافرو او ناروغانو غواړي چې هندوستان ته له ورتګ ډډه وکړي.
خو د افغانستان د عامې روغتیا وزارت وايي په هندوستان کې د کرونا ویروس له امله د مړو شویو افغانانو دقیق شمېر نهلري.
په ورته وخت کې د عامې روغتیا سرپرست وزیر وحید مجروح د دوشنبې په ورځ د ولایتونو د عامې روغتیا له رئیسانو سره په یوې ناسته کې افغانستان ته د هند د پروازونو په بندېدو، د هند او پاکستان په پولو کې د مسافرو په تګ راتګ، د شپې په ګرځبندیز، په راټولېدو بندیزونه او د اضطرار کمېټو په فعالولو بحث وکړ.
دا په داسې حال کې ده چې له هند نه افغانستان ته د خلکو پر تګ راتګ اندېښنې ډېرې شوې دي.
د افغانستان د هوايي چلند اداره وايي، د کابل-ډهلي ترمنځ پروازونه د روغتیايي سپارښتنو په پام کې نیولو سره جریان لري.
د دغه وزارت ویاند محمد نعیم صالحي ازادی راډیو ته وویل: "ټول مسافر چې په هند کې دي کولای شي افغانستان ته راشي، خو د کرونا ویروس د خپرېدو د مخنیوي په خاطر، د هوايي چلند ملکي ادارې د هوايي ټرانسپورت له لارې ټولو مسافرو ته خبرداری ورکړی، هر مسافر چې له بهر نه په تېره له هند او ایران نه افغانستان ته راځي، باید د کرونا منفي ټسټ ولري او که نه نو د سفر اجازه نهورکول کیږي."
د افغانستان د عامې روغتیا وزارت چارواکي وايي، په تېرو ۲۴ ساعتونو کې پر کرونا د اخته کسانو ۲۱۰ نوې پېښې ثبت شوي چې له دې سره په ټوله کې پر کرونا د اخته کسانو شمېر۵۹ زره ۲۲۵ ته ورسېد.
همدارنګه په تېرو ۲۴ ساعتونو کې ترې ۱۹ کسان مړه شوي چې د ټولو مړه شویو شمېر ۲ زره ۵۹۸ ته ورسېد او څوک چې ترې رغېدلي شمېر یې ۲۵ زره، ۵۲۰ تنو ته رسېږي.
