کابل پرون بیا د یوې هدفي حملې چې د یوې ماشومې په ګډون دوه تنه پهکې ووژل شول، شاهد و.
خو هغې زړه بوګنوونکې وېډیو د خلکو ډېره غصه راپارولې چې پهکې ښکاري، دوه ماشومې نجونې، پر سړک پرتې د یوې بېسده مور پر سر ولاړې دي او چیغې وهي.
د کابل د امنیه قوماندانۍ د ویاند فردوس فرامرز په وینا په دغه چاودنه کې چې د ښار د څلورمې ناحیې د برکي په سیمه کې پر یوه رنجر موټر وشوه، لږترلږه دوه تنه مړه او پنځه نور ټپیان شوي. وژل شوي د موټر چلوونکی او یو لاروی ماشوم و.
په هغه وېډیو کې چې تر چاودنې سمدستي وروسته د پېښې له ځایه اخیستل شوې او په ټولنیزو رسنیو کې ډېره لاس په لاس کېږي، دوه ماشومې نجونې چې یوهیې په وینو لړلې ښکاري چیغې وهي. په یوه صحنه کې یې یوه ماشومه پر مور غږ کوي چې مورې پاڅېږه. د "مادر بلند شو"، دغه هشتګ په ټولنیزو شبکو کې یو کمپاین پیل کړی.
د ټویټر یوه کاروونکي اعجاز ملکزاده لیکلي، د نهزغملو ده چې دغه مور او ماشومانیې دغسې وګورئ.
له طالبانو سره د افغانستان د دولت د مرکچي پلاوي غړې فوزیه کوفي وایي، هغوی چې دغسې عمل سرته رسوي د دغسې صحنې په لیدو به چې ماشومان خپلې ټپي مور ته ژاړي، څه ډول خپل وجدان ته قناعت ورکوي.
مېرمن کوفي وایي، دغه اعمال باید سمدستي ودرول شي.
د کابل د امنیه قوماندانۍ ویاند فردوس فرامرز تأیید کړه چې دوه ماشومان چې په دغه وېډیو کې ښکاري او په دغه پېښه کې برسېرن ټپیان شوي وو، درملنهیې شوې او د مور روغتیایي وضعیتیې خطرناک دی.
لکه د ډېرو نورو حملو په څېر د دغې چاودنې مسؤلیت هم چا یا کومې ډلې نهدی اخیستی، خو امنیتي چارواکي هغه د طالبانو کار بولي.
د افغانستان د کورنیو چارو وزارت وایي، موندنې یې ښیي چې هغه ترهګر چې په کابل کې هدفي وژنې ترسره کوي، مرکزي هستې یې دې ښار کې نهدي او دوی هڅه کوي چې هغو ته لاسرسی پیدا کړي.
دا خبره د دې وزارت ویاند طارق ارین په کابل ښار کې د زیاتو شویو هدفي وژنو په اړه وړمه ورځ ازادي راډیو ته وکړه او ویېویل: "زموږ موندنې ښیي چې دغه ترهګر په کابل کې مرکزیت نهلري. موږ هڅې کوو چې د دوی هغې اخري نقطې ته چې دوی ورڅخه د منابعو لپاره کار اخلي، نږدې شو او په نطفه کې یې شنډه کړو."
د دې وزارت ویاند طارق ارین ازادي راډیو ته دغهراز وویل، دغو ترهګرو چې پهکې داعشي طالبان، د حقاني شبکې او القاعده غړي شامل دي، د دې لپاره ډېر تمرکز په پلازمېنه کابل کړی چې په خلکو کې وېره خپره کړي او رواني فشارونه پرې زیات کړي.
ښاغلي ارین د دا ډول حملو د مخنیوي د هڅو په ترڅ کې وویل چې د هغو ترهګرو چې په وروستیو میاشتو کې یې په کابل کې د چاودنو په تړاو نیولي شمېر یې اوس نږدې ۴۰۰ ته رسېدلی دی.
په کابل او د افغانستان په یو شمېر نورو لویو ښارونو کې هدفي وژنې چې ډېری یې د مقناطیسي ماینونو په ذریعه ترسره کېږي، داسې مهال زیاتې شوي چې څو ورځې وروسته په قطر کې د طالبانو او امریکا ترمنځ د فبرورۍ د ۲۹مې د تړون یو کال پوره کېږي.
هغه تړون چې له مخې یې باید په افغانستان کې د تاوتریخوالي کچه کمه شوې وای او د چارواکو په وینا طالبانو هم په بامفهومه بینالافغاني خبرو کې ګډون کړی وای.
د دواړو لورو ترمنځ دغه خبرې له څه باندې یوې میاشتې راهیسې په ټپه درېدلې دي.
