د افغانستان سولې لپاره د امریکا ځانګړي استازي خبرداری ورکړی چې د تاوتریخوالي د لوړې کچې دوام کولای شي د سولې بهیر ته ګواښ پېښ کړي.
زلمي خلیلزاد نن په یو لړ ټویټونو کې د طالبانو وروستۍ اعلامیې ته هم غبرګون ښودلی دی.
طالبانو په هلمند او فراه کې پر دوی د امریکا هوایي بریدونه د دوحې له تړونه سرغړونه بللې او خبرداری یې ورکړی چې د عواقبو پړه بهیې پر امریکایانو وي.
زلمي خلیلزاد ویلي، د سرغړونو په اړه بې بنسټه تورونه او تحریک کوونکې څرګندونې د سولې د پرمختګ لامل نه کېږي.
ده ویلي، د دغو خبرو پر ځای باید د امریکا او طالبانو د تړون او دغه راز د امریکا او افغان حکومت د ګډې اعلامیې عملي کولو ته پام وشي.
خلیلزاد لیکلي، تاوتریخوالي له ډېر وخته افغانانو ته عذاب ورکړی او د ده په ټکو "د غور غميزه" یې وروستۍ بېلګه ده.
غور کې پرون د امنیه قومنداني ودانۍ ته نږدې موټر بم چاودنې لږترلږه ۱۵ ملکیان ووژل او له سلو زیات نور یې ټپیان کړل.
خلیلزاد خبرداری ورکړی چې د زیاتېدونکي تاوتریخوالي دوام کولای شي د سولې بهیر او په دې اړه هوکړه له ګواښ سره مخامخ کړي.
ده ویلي، وروستیو کې د تاوتریخوالي په کمښت ټینګار وشو، خو په خبره یې افغانستان کې د تاوتریخوالي کچه خواشینونکې ده.
خلیلزاد لیکلي، دا باور ډېر خطرناک دی چې طالبان دې په تاوتریخوالي سره د سولې خبرو کې د ډېر امتیاز په لټه کې وي.
