اطلاعاتو ته د لاسرسي کمېسیون په خپلو دوو بیلابېلو پرېکړو کې د افغانستان دفاع وزیر او د احصایې ملي ادارې رییس د کسر معاش غوښتنه کړې.
په افغانستان کې اطلاعاتو ته د لاسرسي کمېسیون له ولسمشرۍ ماڼۍ او مالیې وزارت څخه د دفاع سرپرست وزیر اسدالله خالد او د احصايي ملي ادارې رئیس احمد جاوید رسولي د یو میاشت کسر معاش غوښتنه کړې.
د دې کمېسیون مشر عین الدین بهادري د سې شنبې په ورځ په کابل کې د یوې خبرې ناستې پر مهال وویل، دغو بنسټونو یو شمېر رسنیو ته معلوماتو په ورکړه کې لازمه همکاري نه ده کړې.
هغه زیاته کړه: "موږ نن دوه هغه بنسټونه چې د اطلاعاتو ته د لاسرسي له قانون څخه یې سر غړونه کړې تاسو ته در پېژنو، پژواک خبري اژانس د احصایي ملي ادارې څخه د اجمل احمدي د تذکرې په اړه معلوماتو غوښتې و خو شریک شوي نه دي، د معلوماتو نه شریکولو په صورت کې د افغانستان د احصایي ملي ادارې رئیس احمد جاوید احمدي د میزان میاشتې د کسر معاش وړاندیز کوو، د اطلاعاتو روز ورځپاڼې د شکایت پر بنسټ چې د ملي دفاع وزارت د اتو تدارکاتي پروژو د معلوماتو نه شریکولو په اړه یې کړی و وړاندیز کو چې د دې وزارت سرپرست وزیر اسدالله خالد د میزان میاشتې کسر معاش شي."
ښاغلی بهادري وايي، که دواړو بنسټونو تر یوې اونۍ پورې د کمېسیون د دې پریکړو د عملي کېدو په اړه کمېسیون ته معلومات ورنه کړ یاد کمېسیون به خپل ورستي اقدامات د قانون له مخې تر لاس لاندې ونیسي.
نوموړي وايي، د دواړو بنسټونو د مشرانو د کسر معاش په اړه شوې پرېکړې د افغانستان ولسمشرۍ ماڼۍ او مالیې وزارت ته استول شوی.
موږ هڅه وکړه د افغانستان دفاع وزارت او د احصایې ملي ادارې نظر په دې برخه کې واخلو خو دوی وویل چې وروسته به په دې اړه خپل دریځ څرګند کړي.
په ورته وخت کې د افغانستان د مالیې وزارت وايي، تر دا مهاله دې وزارت ته په دې تړاو هېڅ مکتوب هم نه دي رسیدلی.
د دې وزارت ویاند شمروز خان مسجدي د سې شبنې په ورځ ازادي راډيو ته وویل: "تر دا مهاله اطلاعاتو ته د لاسرسي کمېسیون هیڅ یو رسمي مکتوب موږ ته نه دی رارسېدلی، که راورسېږي هم موږ به د قانون او هغه طرز العملونه چې لرو د هغې مطابق به یې زموږ حقوقي کمېټې وڅېړي او له هغې وروسته به پرېکړه وکړو."
ښاغلي مسجدي وايي، مالیې وزارت که هر پرېکړه کوي د قانون مطابق به وي.
اطلاعاتو ته د لاسرسي کمېسیون چارواکي ټینګار کوي چې د یو شمېر نورو ادارو شکایتونو ته هم له دې سره ثبت شوي او په نږدې راتلونکې کې به یې له رسنیو سره شریک کړي.