د افغانستان د عامې روغتیا وزارت وايي، تېرو ۲۴ ساعتونو کې په کرونا ویروس د اخته کسانو ۳۱۰ مثبتې پېښې ثبت شوې دي.
د عامې روغتیا وزارت وايي، که څه هم افغانستان اوسمهال په کرونا ویروس د اخته کېدونکو کسانو د شمېرو د ګراف له مخې، مخ پر لوړ روان دی، خو که خلک د روغتیا پالانو لارښوونو ته پام وکړي، کېدای شي 'کوویډ-۱۹' ناروغي کنټرول شي.
د دې وزارت د ویاندې مرستیالې معصومې جعفري د دوشنبې په ورځ ازادي راډیو ته وویل، مخ پر ماسک پوښل، د ټولنیز واټن مراعت او په صابون سره د لاسونو پرېمینځل په کرونا ویروس د اخته کسانو د شمېر له را کمولو سره مرسته کوي.
هغه زیاته کړه: "موږ د کرونا ویروس د لا پراختیا په حال کې یوو، دا اوج د اختر په شپو او ورځو کې د خلکو لهخوا د قرنطین نه مراعت کولو سره سم پیل شو، خو اوس شمېرې ثابتې دي، که خلک روغتیايي لارښوونو ته پام وکړي، تر راتلوونکو دوه میاشتو کېږي چې د مثبتو پېښو شمېر را کم شي، خو باید په ټینګار سره ووایم چې د شمېرو کموالی د خلکو لهخوا د روغتیايي لارښوونو مراعتولو سره تړلی دی. "
دا په داسې حال کې ده چې تازه د عامې روغتیا سرپرست وزیر ویلي چې تر راتلوونکو ۲ میاشتو پورې به افغانستان کې کرونا ویروس لا زیات شي.
د عامې روغتیا وزارت د شمېرو له مخې، تېرو ۲۴ ساعتونو کې په کرونا ویروس د اخته کسانو ۳۱۰ مثبتې پېښې ثبت شوې دي چې په دې سره په افغانستان په کرونا ویروس د ټولو اخته کسانو شمېر ۲۹زره ۱۳۴ ته ورسېد.
د دې وزارت د چارواکو له قوله، له دې ناروغۍ په تېرو ۲۴ ساعتونو کې ۷۷ تنه رغېدلي، خو ۱۲ تنه نور بیا مړه شوي دي.
عامې روغتیا وزارت داسې مهال په افغانستان کې د کرونا ویروس د لا پراختیا خبره کوي چې پرون د افغانستان د ملي راډیو ټلویزیون یو خبریال نوید عظیمي په دې ناروغۍ د اخته کېدو وروسته ومړ.
د ښاغلي عظیمي خپلوان وايي، هغه له تېرو ۱۰ ورځو راهیسې په دې ناروغۍ اخته و.
خو د عظیمي پلار بیا وايي، د زوی د روغتیايي ټیسټونو وروسته یې معلومه شوه چې هغه محرقه دی، خو د 'کوویډ ـ۱۹' ناروغۍ ټولې نښې یې هم درلودې.
بل لورته بیا یو شمېر روغتیاپالان وايي، په افغانستان کې په کرونا ویروس د اخته کسانو شمېر له هغو ډېر پورته دی، کوم چې یې د عامې روغتیا وزارت خپروي.
د داخله ناروغیو یو متخصص ډاکټر جمشېد خورشید په دې اړه ازادي راډیو ته وویل: "هغه شمېرې چې د عامې روغتیا وزارت یې اعلانوي، د هغو کسانو په پرتله چې په دې ناروغۍ اخته دي، ډېرې کمې دي، ځکه اوس د عامې روغتیا وزارت لهخوا د سمپولونو اخیستل کم شوي دي او ډېری خلک په ولایتونو کې د کرونا نښې لري، خو هیڅ پام ور ته نه کېږي."
ډاکټر خورشید ټینګار هم کوي چې خلک بايد روغتيايی سپارښتنو ته پام وکړي.