د افغانستان د عامې روغتیا وزارت وایي، تېرو ۲۴ ساعتونو کې یې د کرونا ویروس ۵۴۶ مثبتې پیښې ثبت کړي دي.
د دغه وزارت مطبوعاتي دفتر ویلي، دغه پېښې د نژدې ۱۵ سوه مشکوکو کسانو له معاینې وروسته معلومې شوي.
له دې سره په افغانستان کې په کرونا د اخته شویو کسانو شمېر نژدې اته ویشت نیم زره شو.
له پرون راهیسې ۲۱ افغانان کویډ-۱۹ ناروغۍ مړه کړي دي.
د روغتیا وزارت شمېرې ښيي چې د کرونا وبا د خپرېدو له پيله ۵۶۹ افغانان دغه ویروس مړه کړي او نژدې اته زره او درې سوه بېرته روغ شوي دي.
څه موده وړاندې د ملګرو ملتونو د روغتیا د برخې یوه راپور وښوده چې افغانستان کې د مشکوکو کسانو معاینه ډېره کمه ترسره کېږي.
له دې ښکاري چې افغانستان کې د کرونا پېښې تر هغه ډېرې زیاتې دي چې دولت یې اعلانوي.