د افغانستان د جمعیت اسلامي ګوند وایي، د سولې په پروسه کې باید ټولو ته ونډه ورکړل شي.
د دغه ګوند مشر صلاح الدین رباني په کابل کې په یوه ناسته کې وویل چې باید حکومت د سولې په پروسه کې د ټول افغان ولس په شاملولو سره د یوې ملي اجماع له مخې د افغانستان راتلونکی وټاکي.
د افغانستان جمعیت اسلامي ګوند ګیله مند دی چې د سولې په پروسه کې یې ونډه ډاګیزه نه ده.
د دغه ګوند مشر صلاح الدین رباني وایي، د سولې پروسې لپاره باید له ټولو اړخونو سره ملي خبرې وشي.
نوموړي د پنجشنبې په ورځ دافغانستان جمعیت اسلامي د مرکزي دفتر په پرانیست غونډه کې په دې هم ټینګار وکړ چې تر دې دمه په ملي کچه د سولې لپاره اجماع رامنځته شوې نه ده.
هغه زیاته کړه: "د سولې اړوند هر ډول هڅې او د ملي اجماع جوړېدل د کورنیو جګړو د لوبغاړو لپاره یوه اړتیا ده نو موږ په دې باور یو چې چې په ملي کچه دې له ټولو اغېزمنو اړخونو سره په دې خبرې وشي."
ښاغلي رباني وویل، که د سولې پروسه یوازې د څو محدودو کسانو او په داسې شان مخته لاړه شي چې د افغانستان د خلکو ونډه او نظرونه په کې مطرح نه شي دوامداره به نه وي او ثبات به هم ونه لري.
نوموړي پر نړیوالې ټولنې نیوکه وکړه چې د سولې اړوند یې د افغانستان لپاره طرحه یوازې ظاهري بڼه لري چې په خبره یې بې پایلې ده.
صلاح الدین رباني دا هم وویل چې د افغانستان د جمعیت اسلامي ځینې کلیدي غړي چې په حکومت کې هم ونډه لري یوازې د خپل سیاسي اقتدار لپاره کار کوي چې په خبره یې همدغو سیاسي معاملو د هېواد سیاسي وضعیت کړکېچن کړی دی.
صلاح الدین رباني دا خبرې داسې مهال مطرح کوي چې د افغان حکومت او طالبانو تر منځ د بین لافغاني خبرو پیل ته هیله مندي زیاته شوې ده.
ویل کېږي چې د سولې بین لافغاني خبرې به د روانې میلادي میاشتې په وروستیو کې په قطر کې پیل شي.
د دې خبرو په وړاندې د زندانیانو تبادله ستر خنډ بلل کېده خو د حکومت له لوري د ۳۰۰۰ زندانیانو او د طالبانو له لوري هم د یو شمېر افغان بندیانو خوشې کولو دا خنډ هم یو څه لیرې کړی دی.
افغان ولسمشر د ۲۰۰۰ نورو طالب زندانیانو د خوشې کېدو اعلان هم کړی دی.
هڅه مو وکړه د ښاغلي رباني د څرګندونو په اړه د سولې په چارو کې د دولت وزارت نظر هم ولرو خو د موږ پوښتنو ته ځواب رانه کړل شو.
خو ولسمشرۍ ماڼۍ بیا ټینګار کوي چې دوی د سولې په برخه ګټور او مهم ګامونه اخیستي او که طالبان تاوتریخوالی راکم کړي بین الافغاني مذاکراتو ته به لاړ شي.
د ولسمشر ویاند صدیق صدیقي د یوې خبري ناسته پر مهال په کابل کې په همدې ورځ وویل: "له طالبانو څخه د حکومت، خلکو او نړیوالې ټولنې غوښتنه داده، چې له تاوتریخوالي لاس واخلي، د سولې پروسه ومني او د سولې خبرې اترې پیل کړي، حکومت د سولې په برخه کې بنسټیز ګامونه اوچت کړي دي او طالبان هم باید په دې لاره کې اقدام وکړي."
تر دې وړاندې هم د افغانستان د سولې په چارو کې د دولت وزارت ویلي چې له طالبانو سره یې د خبرو اترو لپاره له ټولو اړخونو سره سلا مشورې کړي او د ولسمشر له لوري د بین الافغاني خبرو لپاره ټاکل شوې پلاوی هم هر اړخیز دی.
