د افغانستان د سترې محکمې د اعلان له مخې سبا یکشنبه، د کوچني اختر لومړۍ ورځ ده.
سترې محکمې پرون د مې په ۲۲مه، ماخوستن اعلان وکړ چې میاشت نهده لیدل شوې او له دې کبله نن د روژې د مبارکې میاشتې ۳۰مه ده.
په افغانستان کې د اسلامي نړۍ د نورو هېوادونو په څېر سږکال کوچنی اختر د کرونا د وبا تر اغېز لاندې دی.
په اکثر هېوادونو کې د دې وبا د لا خپرېدو د مخنیوي لپاره پر ټولنیزو فعالیتونو بندیزونه لګېدلي دي.
د افغانستان حکومت هم پرون له خلکو غوښتنه کړې چې د اختر په ورځو کې دې په خپلو کورونو کې پاتې شي او بهر ته له تګ راتګه دې ډډه وکړي.
د افغانستان د کورنیو چارو وزارت وايي چې د کوچني اختر په درېیو ورځو کې به کابل ښار قرنطین وي.
د دې وزارت ویاند طارق ارین پرون ازادي راډیو ته وویل چې پولیس به ګرځبندیز په جديت پلی کوي او له خلکو غواړي چې په خپلو کورونو کې پاتې شي.
ښاغلی ارین زیاتوي: "د کوچني اختر درې ورځې په کابل کې ګرځبندیز دی، په شدت به پلی کېږي، د موټرو پر تګ راتګ بندیز دی، موږ خپلو پولیسو ته ویلي چې د وسایطو د تردد مخنیوی وکړي."
طارق ارین همداراز وویل چې د اختر په ورځو کې امنیتي ځواکونه د تیارسی په حالت کې دي.
دا په داسې حال کې ده چې د افغانستان د عامې روغتیا وزیر فېروز الدین فېروز له خلکو غوښتنه وکړه چې په اختر کې د خپلو دوستانو کورونو ته له تګ راتګه ډډه وکړي.
فېروز الدین فېروز پرون په خبري غونډه کې پر خلکو غږ وکړ چې د ځان او خپلو عزیزانو روغتیا ته لومړیتوب ورکړي.
خو د ازادي راډیو خبریالان وايي چې د کابل مارکېټونه له خلکو ډک دي.
د میدان ښار یو اوسېدونکی چې کابل ته د مېوې د خرڅولو لپاره تللی، د ازادي راډیو خبریال ته ویلي چې ډېر خلک مجبور دي چې له کورونو ووځي.
هغه ویلي چې څو ورځې یې قرنطین مراعت کړ او بالاخره فقر اړ کړ چې د کار لپاره له کوره ووځي.
ملګري ملتونه وايي چې تېر کال په افغانستان کې تر ۵۵ فیصده زیات خلک د فقر تر خط لاندې وو.
په داسې وضعیت کې، د افغانستان د عامې روغتیا وزارت مکرراً خبرداري خپروي چې که خلک په خپلو کورونو کې پاتې نهشي، د کرونا وبا به انساني ناورین پېښ کړي.
په افغانستان کې ۹،۲۱۶ کسان په کرونا ویروس اخته شوي دي.
په پاکستان کې د افغانستان سفارت ویلي چې نن به د تورخم او سپین بولدک دروازې هغو افغانانو ته چې په پاکستان کې بند پاتې شوي وو، خلاصې وي او هغوی افغانستان ته تلئ شي.
افغانستان ته له ایران او پاکستانه د کډوالو راستنېدل د دې ویروس د خپرېدو یو عمده دلیل بلل کېږي.
په پاکستان کې نږدې ۵۰ زره کسان په کرونا ویروس اخته شوي دي.
دا نهده څرګنده چې ننګرهار او کندهار ته د ستنېدونکو افغانانو لپاره نن پر دواړو پولو څه ډول احتیاطي صحي تدابیر نیول شوي دي.
