د افغانستان مالیې وزارت وايي، نړیوال بانګ په افغانستان کې د کرونا ویروس سره د مبارزې په هدف ۴۰۰ میلیونه ډالره مرسته کوي.
د دې وزارت ویاند شمروز مسجدي د جمعې په ورځ «۱۳۹۹ کال د غويي ۱۹» ازادي راډیو ته وویل، د دې پیسو یوه برخه به چې ۱۰۰ میلیونه ډالر دي، تر راتلونکو دوو اوونیو پورې افغانستان ته انتقال شي.
ښاغلی مسجدي زیاتوي: "د دې لپاره چې په افغانستان کې د کرونا ویروس د خپرېدو له امله د عوایدو په راټولولو کې کمښت راغلی د نړیوال بانک دغه مرسته به له کرونا سره په مبارزه کې اغېزمنه وي او د دې مرستو یو اندازه به په پرختیایي برخو کې هم ولږول شي، نړېوال بانګ له افغانستان سره په دې برخه کې د نورو مرستو ژمنه هم کړې ده چې د کال په جریان کې به افغانستان ته انتقال شي."
د ښاغلي مسجدي په خبره، دغه ۴۰۰ میلیونه ډالره به د افغانستان د ملي بودجې له لارې مصرف شي.
نړیوال بانک له دې وړاندې هم ۲۰ میلیونه ډالره د کرونا ویروس سره د مبارزې لپاره افغانستان سره مرسته کړې وه.
دغه بانک دا مرستې په داسې حال کې کوي چې په افغانستان کې د کرونا ویروس د مثبتو پېښو شمېر مخ په زیاتېدو دی.
د افغانستان عامې روغتیا وزارت وايي، په تېرو ۲۴ ساعتونو کې د کرونا ویروس ۲۱۵ مثبتې پېښې شوې دي.
د دې وزارت مرستیال وحید مجروح رسنیو ته په استول شوي پیغام کې ویلي چې له تازه شمېر سره په ټول هېواد کې د کرونا ویروس ټولې پېښې ۳،۷۷۸ ته ورسېدې.
ښاغلی مجروح زیاتوي: "په تېرو ۲۴ ساعتونو کې په ټول افغانستان کې د کرونا ویروس ۷۱۴ سمپله اخیستل شوي چې له ډلې یې ۲۱۵ مثبتې پېښې ثبت شوې، ټول شمېر د کرونا ویروس په افغانستان کې ۳،۷۷۸ پېښې دي."
د ښاغلي مجروح په خبره، تر دا مهاله ۱۰۹ نفره د دې ویروس له امله مړه شوي او ۴۷۲ بېرته خپله روغتیا ترلاسه کړې ده.
