د افغانستان عامې روغتیا وزارت وايي د عامې روغتیا وزیر فېروزالدین فېروز په کرونا ویروس اخته شوی دی.
د عامې روغتیا وزارت ویاند وحید مایار رسنیو ته په استول شوي یوه غږیز پیغام کې ویلي چې د ښاغلي فېروز د ټست نتیجه مثبته ده، خو روغتیايي وضعیتیې ډاډمن دی.
ښاغلی مایار زیاتوي: "ډاکتر صاحب فېروز له څو ورځو راهیسې د کرونا ویروس نښې او علایم لرل او په کور کې په قرنطین کې و. له بده مرغه د ټسټ نتیجهیې مثبته راوتلې. د هغه عمومي وضعیت ډاډمن دی او اوسمهال په کور کې د تجرید په حالت کې دی."
دا په داسې حال کې ده چې له تېرو ۱۰ ورځو راهیسې ښاغلی فېروز په رسنیو او رسنیزو غونډو کې نهدی لیدل شوی.
ښاغلي فېروز په افغانستان کې د کرونا ویروس د سرایت په پیل کې خبرداری ورکړی و چې ښايي د افغانستان له نیمايي زیات وګړي په کرونا ویروس اخته شي او اټکلیې کړی و چې ښايي له یو لک او ۱۰ زرو زیات خلک په دې ناروغۍ مړه شي.
د عامې روغتیا وزارت د نویو شمېرو له مخې چې پرون اعلان شوې په افغانستان کې په 'کووېډ-۱۹' ناروغۍ د اخته کسانو شمېر ۳۵۶۳ ته او له دې کبله د مړو شمېر ۱۰۶ ته رسېدلی.