د لاسرسۍ وړ لېنکونه

تازه خبر
جمعه ۲۲ وری ۱۳۹۹ کابل ۰۴:۲۹

ولې پولیس د قیصاري په نیولو کې پاتې راغلل؟


نظام‌الدین قیصاري
  • قیصاري چېرې دی او ولې یې پولیس په نیولو کې پاتې راغلل؟

د بلخ امنیتي چارواکي وايي چې د نظام‌الدین قیصاري د ناقانونه وسله‌والو او د افغان پوځیانو ترمنځ دوه ورځنۍ جګړه د دوشنبې پر ماښام ختمه شوې او قیصاري په مزار شریف کې له خپل استوګن‌ځای څخه تښتېدلی.

د بلخ امنیه قوماندان اجمل فائز ازادي راډیو ته وویل چې امنیتي ځواکونو د دوشنبې ورځې تر ماښامه د مزار شریف په پنځمه ناحیه کې د قیصاري په کور کې ځای پر ځای شوي و.

ښاغلي فائز وویل چې ځانګړو ځواکونو د قیصاري موندلو لپاره د هغه د کور شااوخوا سیمې هم وپلټلې.

هغه وویل چې د افغان امنیتي ځواکونو د عملیاتو په ترڅ کې د قیصاري له کور څخه وسلې، جنګي مهمات، پوځي وسایط او د هغه د اووه وسله‌والو مړي موندل شوي دي.

د کورنیو چارو وزارت ویاند نصرت رحیمي پر خپل فېس‌بوک پاڼه د قیصاري له کور څخه د وسلو او مهماتو د نیولو جزئیات او عکسونه خپاره کړي دي.

دغه‌راز د بلخ د امنیه قوماندان په وینا چې د تېرو ۴۰ ساعتونو په ترڅ کې د نظام‌الدین قیصاري ۳۵ وسله‌وال‌یې له امنیتي ځواکونو سره په نښته کې نیولي دي او له هغوی څېړنې پیل شوې دي.

فایز زیاته کړه: "له موږ سره د جګړې پر مهال د قیصاري اووه کسان وژل شوي دي، یو کس‌یې ژوبل دی او د هغه ۳۵ کسان مو اسیران کړي دي چې څېړنې ترې روانې دي."

امنیتي چارواکي وايي چې قیصاري د نښتې له سیمې تښتېدلی دی.

د جنبش اسلامي ګوند څخه یوې سرچینې رسنیو ته ویلي دي چې نظام‌الدین قیصاري د افغان ځواکونو د حملې پر مهال په خپل کور کې و، خو تېره شپه جوزجان ولایت ته لېږدول شوی دی.

افغان امنیتي ځواکونو په مزار شریف ښار کې د نظام‌الدین قیصاري کور کلابند کړی.
افغان امنیتي ځواکونو په مزار شریف ښار کې د نظام‌الدین قیصاري کور کلابند کړی.

په بلخ کې د جنبش اسلامي ګوند د شورا یوه غړي ډاکتر نجیب هاشمي ازادي راډیو ته وویل چې نظام‌الدین قیصاري اوس‌مهال په یوه امن ځای کې دی او د تېرو دوه ورځو جګړو په ترڅ کې یې له لسو ډېر کسان ټپیان او وژل شوي دي.

هاشمي څرګنده کړه: "د مذاکرې پر مهال حمله وشوه، ځواکونو پرمختګ وکړ او د حملې پر مهال قیصاري خپل کور کې و، خو اوس هغه روغ دی او په یوه امن ځای کې اوسي."

  • قیصاري څوک دی او ولې افغان پوځیان‌یې د نیولو هڅې کوي؟

نظام‌الدین قیصاري ۵۰ کاله عمر لري او یو وخت په فاریاب ولایت کې د جنبش اسلامي ګوند قوماندان و او دوه کاله وړاندې هغه د ولسمشر د لومړي مرستیال جنرال عبدالرشید دوستم په ملاتړ فاریاب کې د قیصار ولسوالۍ امنیه قوماندان شو.

قیصاري په دغه ولسوالۍ کې د داعش او طالبانو پر وړاندې د ولسي پاڅون کوونکو د یوې ډلې مشري کوله او هم‌مهاله په فاریاب کې د جنرال دوستم ځانګړی استازی هم بلل کېده.

قیصاري د ۱۳۹۷ کال په سرطان میاشت کې د فاریاب ولایت د امنیتي چارواکو د ګواښ او همداراز د ناقانونه وسله‌والو د درلودلو او د بشر حقونو د نقض په تورونو د افغانستان د ملي امنیت له‌خوا ونیول شو او د شپږو میاشتو لپاره زنداني و.

د قیصاري د زنداني کېدو په اعتراض کې په شمالي بلخ، جوزجان او فاریاب ولایتونو کې زرګونه کسان واټونو ته راووتل چې د هغه په ملاتړ یې د حکومت پر ضد مظاهرې وکړې، وروسته بیا د افغانستان لویې څارنوالۍ د ملي امنیت د وړاندیز پر اساس هغه په مشروط ډول ازاد کړ.

ښاغلی قیصاري د زندان څخه له خوشې کېدو وروسته په بلخ ولایت کې مېشت شو او هغه وخت‌یې له جنرال دوستم سره د حزبي اړیکو د خرابوالي په دلیل اړیکې ترینګلې شوې.

اوس‌مهال د بلخ پولیسو قیصاري په مزار شریف کې د ځمکو د غصب، د ناقانونه وسله‌والو په درلودو او د وسله‌والو غلاو په ترسره کولو تورن کړی دی.

د بلخ امنیه قوماندان اجمل فائز ویلي دي چې افغان ځواکونو د محکمې د حکم پر اساس هڅه وکړه چې نوموړی ونیسي، خو د هغه د کسانو له‌خوا له وسله‌وال مقاومت سره مخ شول.

ښاغلی فائز، نظام‌الدین قیصاري "ملي خاین" بولي او ویلي یې دي هر چېرې چې وي افغان امنیتي ځواکونه‌یې په نیولو مصمم دي.

فائز زیاته کړه: "قیصاري د یوه ملي خاین په توګه موږ او قضايي ارګانونو ته پېژندل شوی دی، ځکه چې له دولت سره‌یې مقابله کړې او دولتي ځواکونه‌یې ژوبل کړي دي."

قیصاري له ازادي راډیو سره په خبرو کې ویلي دي چې امنیتي ځواکونو له مخکېني خبرداري پرته د هغه پر کور حمله وکړه.

ده ووېل: "د شپې ۱۰ بجې وې، زما پر کور یې راکټ ووېشت، زه پوه نه‌شوم چې طالبان دي، که داعشیان او یا هم غله دی، کله مې چې د قول اردو له مرستیال وپوښتل چې ولې مو حمله وکړه باید مو اړيکه نیولې وی او یا مو جلب راستولی وی، ده راته وویل چې د مرکز څخه امر شوی."

د بلخ د پولیسو ویاند عادل‌شاه عادل د دوشنبې په ورځ له ازادي راډیو سره په خبرو کې د قیصاري دا ادعاوې رد کړې او ویې‌ویل چې پولیسو په مکرر ډول له هغه غوښتي و چې خپل غیر قانوني فعالیتونه ودروي او ځان قانون ته تسلیم کړي.

د قیصاري پر کور د حملې له امله خلکو ته اوښتي زیانونه څه دي؟

د مزار شریف په عزیز اباد سیمه کې د نظام‌الدین قیصاري ګاونډیان وايي چې د دولتي ځواکونو او د قیصاري ملېشو ترمنځ د نښتو له وجې د هغوی پر کورونو راکټونه، بمونه او د سپکې او درنې وسلو مرمۍ لګېدلي دي چې د روحي او رواني ستونزو ترڅنګ‌یې ورته ډېر مالي خسارات هم اړولي دي.

د قیصاري له کسانو سره د جګړې پر مهال پر دېوالونو د مرمیو نښې لیدل کېږي.
د قیصاري له کسانو سره د جګړې پر مهال پر دېوالونو د مرمیو نښې لیدل کېږي.

د قیصاري یوه ګاونډي حاجي خالق ازادي راډیو ته ووېل: "د راکـټ او بمونو په دلیل مې غوږ ضرر لیدلی، کور مې اور اخیستی او د کور ښیښې مې په بشپړ ډول راتویې شوې دي، پولیس له سیمې ویستلو او خپل کور ته مې د ورتګ اجازه رانه‌کړه."

د سیاسي او حقوقي چارو شنونکي له امنیتي ځواکونو سره د قیصاري وسله‌واله نښته او د قضايي ارګانونو د پرېکړې نه‌منل، د هغه له لوري "بغاوت" بولي.

د سیاسي او حقوقي چارو شنونکی ادیب غیاثي وايي: "کله چې پر هغه تور پورې شوی او د محکمې له‌خوا یې د نیولو حکم شوی، باید پرته له هېڅ نظامي نښتې خپله حاضر شوی وی او د ځان پر وړاندې یې له قانوني لارو سپیناوی کړی وی."

د بلخ پولیسو ګواښ کړی دی چې افغان ځواکونه د قیصاري د موقعیت د تثبیتولو په هڅه کې دي او د هېواد په هر ځای کې چې وي د هغه پر وړاندې به بیا پوځي اقدام وشي.

XS
SM
MD
LG