د افغانستان جمهوري ریاست وايي چې قطر د دوحې د بینالافغاني خبرو لپاره د افغان حکومت د وړاندیز شوي لېست په منلو کې پاتې راغلی او غونډه یې لغوه کړه.
دا خبره ارګ ماڼۍ بېګاه ناوخته په یوه اعلامیه کې کړې ده.
د ارګ اعلامیه وايي چې ولسمشر اشرف غني او افغان سیاسیونو پرون سره ولیدل او پهدې یې ټینګار درلود چې له قطر وغوښتل شي چې په دوحه کې به د افغانستان ټاکل شوی پلاوی برخه اخلي.
ارګ ماڼۍ وايي، قطر د افغانانو د دې غوښتنې په پوره کولو کې پاتې راغی.
د افغانستان حکومت تېره سې شنبه د افغان سیاستوالو، حکومتي چارواکو، مدني فعالانو، افغان ښځو او خبریالانو ۲۵۰ کسیزه لېسټ خپور کړ چې تمه وه د قطر په بینالافغاني ناسته کې ګډون وکړي.
د ارګ ماڼۍ په اعلامیه کې بیګاه ناوخته راغلي چې قطر دوی ته یو نوی لېست چې د ارګ به خبره د ولس له متوازن شمولیت څخه بې برخې و او د افغانستان د خلکو ملي ارادې او فیصلې ته د بې احترامی په مانا و، استولی شوی و.
د قطر حکومت د افغان حکومت د دې تازه دریځ په اړه سمدستي غبرګون نه دی ښودلی.
د افغان حکومت یوې سرچینې د پنجشنبې په ماښام ازادي راډيو ته ویلي و چې که د افغانستان دوه نیم سوه کسیزه لېسټ ونه منل شي ممکن افغان حکومت د دوحې ناسته لغوه کړي.
افغان حکومت په خپله اعلامیه کې بیګاه ناوخته ویلي چې با عزته سولې ته ژمن دی او د سولې د ترلاسه کولو په لار کې ټولو خلکو ته د ګډون حق ورکوي.
پخواني ولسمشر حامد کرزي پرون شپه ناوخته په یوه اعلامیه کې تأیید کړه چې د دوحې ناسته د اوس لپاره ځنډول شوې، خو د ده په خبره چې ژر به افغانان په یوه بینالافغاني ناسته کې د سولې او سوکالۍ لپاره غښتلي ګامونه واخلي.
تمه وه همدا جمعه د اپرېل نولسمه د افغانستان یو لوی پلاوی له طالبانو سره د قطر په پلازمېنه دوحه کې د سولې مشورتي ناسته پیل کړي، خو دا ناسته لومړی وځنډېده او بیا دا دی د لغوه شوه.
راتلونکو ولسمشریزو ټاکنو کې د عبدالله عبدالله دوهم مرستیالۍ ته کاندید او د قطر د ناستې لپاره اعلان شوي ګډونوال اسدالله سعادتي ازادي راډیو ته وویل، د دوحې د ناستې په اړه قطر د افغان دولت او خلکو ملي حاکمیت او صلاحیت ته پام ونهکړ.
دی وايي:
"دا وار اجماع متأسفانه د قطر او د طالبانو او ځینو نورو عناصرو په مداخلې له خنډ سره مخ شوه. زه په مجموعي توګه د سولې په پروسې په خاصه توګه بینالافغاني ډیالوګ کې یو خنډ حس کوم. زه پهدې اړه اندېښمن یم. دا یو ناسم حرکت و. فکر کوم د قطر دا کار د افغانستان د دولت او خلکو ملي حاکمیت او صلاحیت ته نه پاملرنه وه."
طالبانو د چهارشنبې په ورځ په یوه اعلامیه کې د افغانستان له لوري خپور شوی لېسټ اوږد او نه مننونکی بللی و.
دوی په اعلامیه کې ویلي و چې د دوحې په ناسته کې به محدود شمېر سیاستوال او قومي مخور ځای ولري.
طالبانو انتقاد کړی و چې د دوی په خبره د دوحې ناسته منظمه او پلان شوې ناسته ده او د کابل په کوم هوټل کې د واده یا کوم بل مناسبت مېلمستیا نه ده.
طالبانو د پنجشنبې په ورځ د افغانستان د پلاوي د سفر د ځنډېدو او وروسته د لغوه کېدو په اړه غبرګون ونه ښود خو په قطر کې د طالبانو یوې سرچینې د چهارشنبې په ورځ ازادي راډيو ته ویلي و چې ممکن دوی دغه غونډه تحریم کړي.
د قطر په پلازمینه دوحه کې د افغانستان د یوه لوی پلاوي او طالبانو د مشورتي ناستې د ترسره کېدو او بریالي کېدو لپاره ګڼو افغانانو او امریکا متحده ایالتونو هیلې درلودې خو اوس معلومه نه ده چې د افغانستان پلاوی او طالبان به څه وخت په ناستې باندې موافقې ته رسیږي.
صفيالله ستانکزی
