د افغان سولې په اړه د مسکو د جوړېدونکې ناستې ځنډېدو او پهدغه ناسته کې د افغان حکومت ګډون خلک سولې ته هیلهمند کړي دي.
د افغانستان د مشرانو جرګې رئیس فضلهادي مسلمیار وايي، په افغانستان کې د جګړې د پای ته رسېدو لپاره د ټولو تفاهم مهم دی او تمه ده چې د مسکو ناسته د افغان سولې او پهدې برخه کې د ګډ تفاهم د رامنځته کېدو لپاره ښه پیلامه وي.
ښاغلي مسلمیار د سې شنبې په ورځ «۱۳۹۷ کال د وږې ۰۶» پهدې اړه ازادي راډیو ته وویل:
"دا چې په مسکو کې د افغان سولې په اړه جوړېدونکې ناسته اوس د ګډ تفاهم د رامنځته کېدو لپاره ځنډول شوې دا ښه خبره ده او تمه ده چې د افغان حکومت او ولس په خوښه ترسره شي، موږ هیله لرو چې پهدغه ناسته کې د طالبانو په ګډون د سیمې د هېوادونو استازي هم برخه واخلي او د تفاهم لپاره زمینهسازي وشي."
افغان حکومت تېره ورځ اعلان وکړ چې مسکو سره د هوکړې په نتیجه کې د افغان سولې په تړاو د سپټمبر د څلورمې نېټې غونډه ځنډول شوې ده.
د ولسمشر مرستیال ویاند شاه حسین مرتضوي تېره ورځ ازادي راډیو ته وویل چې دغه هوکړه د ولسمشر محمد اشرف غني او د روسیې د بهرنیو چارو د وزیر سرګي لاوروف ترمنځ په ټیلیفوني خبرو کې شوې ده.
د ښاغلي مرتضوي په خبره دواړه هېوادونه به د دې ناستې د ګډ مدیریت او کوربهتوب لپاره کار کوي او په ورته وخت کې د کنفرانس وخت او څرنګوالی به هم د دواړو خواوو تر سلا مشورې وروسته روښانه شي.
تر دې وړاندې افغان حکومت د مسکو په ناسته کې د نهګډون خبره کړې وه او ویلي وو چې د افغانستان د سولې په اړه خبرې باید د افغانانو په مالکیت ترسره شي.
د امریکا متحده ایالاتو هم پهدغه ناسته کې له ګډونه انکار کړی، خو طالبانو وار له مخه اعلان کړی چې د مسکو ناستې ته به یو پلاوی ولېږي.
روسیې د افغانستان په ګډون ۱۲ هېوادونو ته د مسکو په ناسته کې د ګډون بلنه ورکړې وه، خو اوس د افغان حکومت او روسیې د نوې هوکړې له مخې دغه ناسته تر نامعلومې مودې ځنډول شوې ده.
طالبانو تر اوسه د مسکو د ناستې د ځنډېدو په اړه څه نهدي ویلي.
په ورته وخت کې په پاکستان کې پخوانی افغان ډیپلومات احمد سعیدي وايي، دا چې د مسکو ناسته وځنډېده، دی یې پایلو ته خوشبینه دی.
ښاغلی سعیدي زیاتوي:
"دا چې د مسکو ناسته وځنډېده، زه ورته په مثبت نظر ګورم ځکه روسان هم پهدې پوهېدل چې که پهدغه ناسته کې امریکا او افغان حکومت ګډون ونهکړي پایلې بهیې مؤثره نهوي، نو ځکه وځنډېده. ښه خبره دا ده چې افغان حکومت ګډون وکړي او د امریکا قناعت ترلاسه شي که امریکان ګډون نهکوي حد اقل مخالفت خو به یې ونهکړي."
د ښاعلي سعیدي په خبره افغان حکومت او د امریکا متحده ایالات د افغان جګړې مهم اړخونه دي او په افغانستان کې د دایمي سولې او ثبات لپاره د سولې په هر ډول مذاکراتو کې د دوی ګډون حتمي دی.
راپور: محمد حدیث پردېس
