په کابل کې له تېرو دوو اونیو راهیسې د پرلپسې مرګونو انتحاري حملو ورسته، یو شمېر کابل ښاریان او د ولسي جرګې د کورني امنیت د کمېسیون غړي انتقاد کوي چې امنیتي بنسټونه د امنیت په ساتلو کې پاتې راغلې دي.
دوی انتقاد کوي چې د امنیتي بنسټونو د ناغړېړۍ له امله انتحاري حمله کوونکي په ډېرې اسانۍ سره توانېږي چې له کومې ستونزې پرته خپل ټاکلو هدفونو ته ځان ورسوي او حملې وکړي.
د ولسي جرګې د کورني امنیت د کمېسیون غړي صالح محمد صالح د پنجشنبې په ورځ«۱۳۹۷کال غويي۲۰» ازادي راډيو ته وویل چې د کابل ښار اوسنی امنیتي وضعیت خلکو اندېښمن کړي او ورته د منلو نه دی.
نوموړي زیاته کړه:
"امنیتي بنسټونه نه دي توانېدلي چې د کابل ښاریانو امنیت ټینګ کړي، کشفي او امنیتي مسؤلین د کابل د ښار د امنیت په ساتلو کې پاتې راغلي، د کابل اوسنی امنیتي وضعیت خلکو ته د منلو نه دی، زده کوونکي ښوونځي ته او مامور دفتر ته نه شي تللی او دغه ستونزه ورځ تربلې زیاتېږي چې خلک یې له جدي ستونزو سره مخ کړي."
د تېرې اوونۍ د دوشنبې په ورځ د کابل ښار په شش درک سیمه کې دوو انتحاري حملو چې داعش ډلې یې مسؤلیت په ځان ومانه د ۹ خبریالانو په ګډون ۲۹ تنه ووژل او ۴۹ نور یې ټپيان کړل.
تېره ورځ هم د کابل ښار پر ۱۳ امنیتي حوزې دوې انتحاري حملې وشوې چې د چارواکو په وینا ۲ پولیس په کې وژل شوي او دوه نور ټپيان دي، د دغو حملو مسؤلیت هم داعش منلی.
په همدې ورځ د کابل ښارد ۱۰ امنیتي حوزې اړوند په شهرنو سیمه کې یو انتحاري حمله وشوه او وروسته څلور حمله کوونکي له پولیسو سره په جګړه کې ښکېل شول.
د دغې حملې مسؤلیت وسله والو طالبانو منلی چې د امنیتي چارواکو په وینا د یو ملکي کس په ګډون ۴ پولیس په کې ووژل شول.
دغو پېښو کابل ښاریان اندېښمن کړي او د ښاریانو ترمنځ یې وېره خوره کړې ده، دوی وايي، کله چې له کوره بهر ځي د خوندیتوب احساس نه کوي.
دوه تنه کابل ښاریانو په دې اړه ازادي راډیو ته وویل:
"هارون ناصر یم په دې وروستیو کې د کابل امنیتي وضعیت په بشپړ ډول خراب شوی، د ښار په خوندي سیمو کې امنیتي ګواښونه ډېر شوي او هره شیبه د دې امکان شته چې یوه پېښه رامنځته شي."
"میرویس سلام زوی یم له حکومت نه مو غوښتنه داده چې د ښار امنیت ته جدي پام وکړي، کله چې زه دفتر ته ځم ځان خوندي نه احساسوم."
په ورته وخت کې د کابل امنیه قومانداني په ښار کې امنیتي ستونزې مني خو وايي چې پولیس په دې توانېدلي چې په لسو کې ۸ دا شان حملې شنډې کړي.
د امنیه قوماندانۍ ویاند حشمت الله ستانکزي ازادي راډیو ته وویل چې په کابل ښار او اړوندو ولسوالیو کې د مخالفانو پرضد تصفیوي عملیات روان دي.
نوموړي زیاته کړه:
"دا مهال د نورو امنیتي ځواکونو په مرسته د کابل په ښار او د کابل ولایت اړوند په ۱۴ ولسوالیو کې تصفیوي عملیات روان دي، هسې چې کابل ښاریان او خلک انګېري چې د ښار امینتي وضعیت خراب دی داسې نه ده، ستونزې شته، ګواښونه به وي او پېښې به رامنځته کېږي، خو د کابل ښار په امنیت کې د ښاریانو مرسته زیاته اړینه ده."
خو د ولسي جرګې د کورني امنیت کمېسیون سپارښتنه کوي چې افغان کشفي او استخباراتي ادارې دې د امنیت په ساتلو او د خلکو د ژوند په خوندیتوب کې جدي اقدام وکړي او له کابل ښار نه دې پياوړی امنیتي کمربندونه راتاو کړي.
راپور: رحمت الله افغان
