د لاسرسۍ وړ لېنکونه

تازه خبر
سه شنبه ۱۶ لیندۍ ۱۴۰۰ کابل ۰۵:۱۵

افغانستان

په کونړ کې د بې‌پیلوټه الوتکې په برید کې ۶ داعشیان وژل شوي

د کونړ په چپې درې ولسوالۍ کې تېره ورځ بې‌پیلوټه الوتکې په برید کې د داعش ۶ وسله‌وال وژل شوي دي.

د کونړ د امنیه قوماندانۍ ویاند فریدالله دهقان د پنجشنبې په ورځ ازادي راډیو ته وویل تېره ورځ د نړیوالو ځواکونو بې‌پیلوټه الوتکې د چپې درې ولسوالۍ په بدګاه سیمه کې برید کړی چې په‌کې ۶ داعش یا د اسلامي دولت نومې ډلې جنګیالي وژل شوي.

دهقان وایي په وژل شویو کې د داعش دوه قوماندانان هم شامل دي.

تر اوسه داعش ډلې په دې اړه څه نه‌دي ویلي.

د ورځې تازه خبرونه دلته ولولئ

د روسیې او هند د بهرنیو چارو وزیرانو د افغانستان پر روان وضعیت خبرې وکړې

(ښی-کین) د روسیې د بهرنیو چارو وزیر سرګي لاوروف او د هند د بهرنیو چارو وزیر اېس جې شنکر

د روسیې د بهرنیو چارو وزیر سرګي لاوروف له خپل هندي سیال اېس جې شنکر سره د نورو مسئلو ترڅنګ د افغانستان پر روان وضعیت هم خبرې کړې دي.

لاوروف نن په نوې ډېلي کې خبریالانو ته ویلي، د دوی او هند دواړو هوکړه دا شوه چې طالبان باید له قومي او سیاسي پلوه ګډ او پراخ‌بنسټه حکومت جوړ کړي.

لاوروف ویلي، د طالبانو حکومت باید بشري حقونه خوندي کړي او د ترهګرۍ او نشه‌یي توکو د قاچاق مخه ونیسي.

لاوروف وړاندیز کړی، که هند او ایران هم د افغانستان په اړه د ترویکا پلس ناستو غړي شي، ګټور اقدام به وي.

اوس په دې ټولنه کې متحده ایالات، روسیه، چین او پاکستان ځای لري چې مسکو او اسلام‌اباد کې یې د افغانستان په اړه غونډې هم کړې دي.

د روسیې او هند د بهرنیو چارو وزیرانو نن د دواړو هېوادونو د مشرانو تر ملاقات مخکې خپلو کې سره وکتل او یو شمېر هوکړې یې وکړې.

چین له افغانستان سره نوره بشري مرسته کوي

ارشیف، افغانستان سره د چین ځینې مرستې

چین له افغانستان سره د نورو بشري مرستو ژمنه کړې ده.

په کابل کې د چین سفیر وانګ یو نن پر خپله ټویټرپاڼه لیکلي چې دوی دا ځل د ۴،۷ ملیونه ډالرو په ارزښت بشري مرسته افغانستان ته لېږي.

وانګ یو ویلي، دغه مرسته به له هغو افغانو سره وشي چې ژمي یې ژوند له ستونزو سره مخ کړی دی.

د چین په بشري مرستو کې خوراکي مواد، کمپلې او نور لومړني توکي شامل دي.

د چین له‌خوا مرسته شوي او نور مرسته کېدونکي توکي په اورګاډي کې افغانستان ته لېږدول کېږي.

ملګري ملتونه افغانستان کې خپل 'عملیاتي پلان' پراخوي

د افغانستان لپاره د ملګرو ملتونو ځانګړې استازې دیبورا لاینز او د طالبانو حکومت د بهرنیو چارو وزارت له مرستیال شېر محمد عباس ستانکزي لیدنه

د افغانستان لپاره د ملګرو ملتونو ځانګړې استازې دیبورا لاینز ویلي، دغه هېواد کې خپل عملیاتي پلان پراخوي.

لاینز دا خبره نن د طالبانو د حکومت د بهرنیو چارو وزارت له مرستیال شېر محمد عباس ستانکزي سره په کتنه کې کړې ده.

نوموړې ویلي، دا مهال‌یې افغانستان کې ټولې څانګې پرانیستي او ځایي او نړیوال کارکوونکي یې دندو ته حاضر شوي دي.

د مېرمن لاینز او ښاغلي ستانکزي د لیدو کتو خبر د طالبانو د بهرنیو چارو وزارت ویاند عبدالقهار بلخي پر خپله ټویټرپاڼه خپور کړی دی.

د خبر له مخې لاینز ویلي، د افغانستان د کنګل شوې شتمنۍ د خلاصون لپاره به کار کوي او د نړۍ له هېوادونو به غواړي چې کابل کې بېرته خپل سفارتونه پرانیزي.

د افغانستان د موی‌تای لوبغاړي محمد یوسف جهانګیر خپل سنګاپوری سیال مات کړ

محمد یوسف جهانګیر له خپل سنګاپوري سیال د سیالۍ د ګټلو پر مهال

د افغانستان د موی‌تای لوبغاړي محمد یوسف جهانګیر د موی‌تای په نړیوالو اتلولیو کې خپل سنګاپوری سیال مات کړ.

دغه دواړه لوبغاړي نن په تایلنډ کې د مسابقې ډګر ته ښکته شول او افغان لوبغاړي په خپلې بریا سره د سیالۍ دوهم پړاو ته لاره ومونده.

د افغانستان موی‌تای فدراسیون ویلي چې د جهانګیر بله لوبه د جنوبي افریقا له یوه لوبغاړي سره ده او که چېرته هلته هم بریالی شي له ازبکستاني او قزاقستاني سیالانو سره به د سیالۍ رېنګ ته ښکته شي.

د موی‌تای په دې سیالیو کې د ۹۴ هېوادونو لوبغاړي برخه لري، خو له افغانستانه یوازې دوه لوبغاړي او یو لوبڅار ورغلي دي.

چین له افغانستان سره د کرونا ضد یو ملیون ډوز واکسین مرسته وکړه

ارشیف، په چین کې د افغانستان سفیر جاوېد احمد قایم د چین د کرونا ویروس ضد واکسین د تېرې مرستې د ترلاسه کولو پر مهال

چین له افغانستان سره د کرونا ویروس ضد د یو ملیون ډوز واکسین مرسته وکړه.

په چین کې د افغانستان سفیر جاوېد احمد قایم ازادي راډیو ته ویلي چې دا واکسین به تر دوو ورځو پورې کابل ته ورسېږي.

ښاغلی قایم زیاتوي: "پر یو ملیون ډوز واکسین سربېره ۱،۶ ملیونه سورنجونه هم مرسته شوي، موږ د چین له حکومت سره په اړیکه کې یو چې دوهم قدم کې د «کوېډ-۱۹» لپاره د طبي تجهیزاتو مرسته زیاته کړي، دوی ژمنه کړې چې نږدې راتلونکي کې به د نور واکسین مرسته هم وکړي."

په افغانستان کې د طالبانو د حکومت د روغتیا مسؤلان وایي، دوی چمتو دي چې د چین له‌خوا د مرسته شوي واکسین تطبیق ته زمینه برابره کړي.

د عامې روغتیا مسؤلان وایي، تر اوسه ۷ ملیون ډوزه واکسین افغانستان کې تطبیق شوي دي.

ملګري ملتونه: هرو ۱۰ افغان ښځو کې ۹یې لږ تر لږه یو ځل تاوتریخوالی تجربه کوي

ارشیف، د تاوتریخوالي قرباني یوه افغانه مېرمن

د ملګرو ملتونو سرمنشي وایي، په افغانستان کې هرو ۱۰ ښځو کې ۹ هغه لږ تر لږه یو ځل د خپل ژوند د ملګري له‌خوا تاوتریخوالی تجربه کوي.

انتونیو ګوترش نن پر خپله ټویټرپاڼه لیکلي چې د دوی د ښځو د ملاتړ ټیمونه په افغانستان کې دي او هغو مېرمنو ته مرسته رسوي چې له تاوتریخوالي سره مخامخې دي.

ګوترش دا څرګندونې د ښځو په وړاندې د تاوتریخوالي د له‌منځه وړلو د ۱۶ ورځني کمپاین په مناسبت کړي دي. دا کمپاین د نومبر په ۲۵مه پیل شوی دی.

دوی دا څرګندونې داسې مهال کوي چې د طالبانو حکومت بیا د ښځو حقونو ته ځان ژمن بولي او تازه‌یې د ښځو د کورني ژوند د خوندیتوب په اړه یو ۶ ماده‌ییز فرمان ورکړ.

له دې سره سره بیا پر دوی انتقادونه دي چې ملیونونه نجونې یې له ښوونځیو او لوړو زده‌کړو بې‌برخې کړې دي.

له تاوتریخوالي د متضررو افغان ښځو لپاره د 'ضروري خدماتو سیستم' له‌منځه تللی

ارشيف

د بخښنې نړیوال سازمان وايي، د طالبانو له واکمنېدو وروسته په افغانستان کې له تاوتریخوالي د متضررو ښځو لپاره د ضروري خدماتو سیستم له‌منځه تللی.

د تاوتریخوالي د پېښو قرباني ښځو د بخښنې نړیوال سازمان یا امنېستي انټرنشنل ته ویلي چې طالبانو د امن خونې بندې کړي او هغه بندیان‌یې له محبسونو څخه خوشې کړي دي چې له ښځو سره په تاوتریخوالي تورن وو.

امنېستي انټرنشنل له ۲۶ افغان مېرمنو سره د مرکو پر بنسټ په یوه راپور کې ویلي دي چې د تشدد قرباني مېرمنې او همداراز د امن خونو مسؤلان، مدافع وکیلان، قاضیان، د اړوندو ادارو چارواکي او د ښځو د خوندیتوب په دې پروسه کې شامل کسان اوس د مرګ له ګواښ سره مخامخ دي.

د بخښنې نړیوال سازمان سکرتر جنرالې انګېس کالامارد (Agnes Callamard) ویلي دي چې په افغانستان کې د جنسیت په اساس د تاوتریخوالي قرباني ښځې او نجونې اوس له پامه غورځول شوي، د خوندیتوب شبکه‌یې ویجاړه شوې او د دوی د امن ځایونه له‌منځه تللي دي.

د پخواني حکومت پر مهال هغه مېرمنې چې د تاوتریخوالي له کبله‌یې خپل کورونه پرېښودل، د امن په خونو کې ساتل کېدلې، خو د زمري په ۲۴مه په افغانستان کې د طالبانو له واکمنېدو وروسته د ښځو د خوندیتوب دا سیستم له‌منځه ولاړ.

بلېنکن د اماراتو وليعهد سره د افغانستان په شمول په یو لړ مسئلو خبرې وکړې

د امريکا د بهرنيو چارو وزير انتوني بلېنکن

د امریکا بهرنیو چارو وزیر انتوني بلېنکن د متحده عربي اماراتو له لوړپوړي چارواکي محمد بن زاید سره د افغانستان په شمول په یو لړ مسئلو خبرې کړي.

د بهرنیو چارو وزارت په یوه اعلامیه کې ویلي چې ښاغلي بلېنکن او د ابوظبي ولیعهد محمد بن زاید ال نهیان په مهمو سیمه‌ییزو مسایلو، دوه اړخیزو شراکتونو او د پراخ بنسټه همکاریو د لا زیاتېدو په تړاو بحث کړی.

ښاغلي بلېنکن هم په خپل ټویټر لیکلي: "له ولیعهد محمد بن زاید سره مې په مهمو سیمه‌ییزو مسئلو او د افغانستان په اړه په ګډ کار باندې خبرې وکړې."

محمد بن زاید له ۲۰۱۴ کال راهیسې د متحده عربي اماراتو ټولې رسمي دولتي چارې مخته وړي.

د اعلامیې له مخې د بهرنیو چارو وزیر انتوني بلېنکن له ولیعهد محمد بن زاید سره په خبرو کې د متحده عرب اماراتو له مخلصانه همکاریو څخه مننه کړې چې له افغانستانه‌یې د امریکا اتباعو، د سفارت کارکوونکو او د درېیمو هېوادونو ته د بهرنیانو د خوندي عبور لپاره زمینه برابره کړه.

بلېنکن همداراز له افغانستان سره د متحده عربي اماراتو د بشري مرستو هرکلی کړی دی.

اوچا: له اوو مليونو افغانانو سره بشري مرستې شوي

آرشیف- توزیع کمک های بشری به افراد نیازمند در ولایت هرات

د ملګرو ملتونو د بشري مرستو د همغږۍ ادارې یو اېن اوچا ویلي ملګرو ملتونو او همکارانو یې د ۲۰۲۱ کال له سپټمبر تر نومبر پورې له لږ تر لږه اووه ملیونه افغانانو سره مرستې کړي.

دا خبره یادې ادارې پرون په یوه ټويټ کې کړې ده.

د ټویټ په اساس ملګرو ملتونو او همکارانو یې په تېرو شااوخوا درېيو میاشتو کې له اووه مليونو افغانانو سره د خوړو مرسته کړې، نږدې نهو لکو افغانانو ته‌يې صحي خدمات رسولي او نږدې یو لک او ۸۰ زره خوارځواکو ماشومانو ته‌يې خواړه رسولي.

په دې سربېره بیا ملګرو ملتونو په ټینګار سره ویلي چې ۲۴ مليونه افغانان عاجلو مرستو ته اړتیا لري.

د اوچا د افغانستان څانګې مشرې ایسابیلا موسارد کارلسن ویلي چې ۲۴ ملیونه افغانان دمګړۍ خوړو، صحي خدماتو، واکسینونو او د ژمي پر مهال امکاناتو او نغدو پيسو ته سخته اړتیا لري.

د افغانستان د کرنې پخوانی وزیر عبیدالله رامین وفات شو

د افغانستان د کرنې پخوانی وزیر او د ولسي جرګې مخکېنی غړی عبیدالله رامین

د افغانستان د کرنې پخوانی وزیر او د ولسي جرګې مخکېنی غړی عبیدالله رامین د ورپېښې ناروغۍ له امله په ترکیه کې وفات شوی.

ګڼو رسنیو د ښاغلي رامین مړینه د سرچینو په حواله تأیید کړې.

د ښاغلي رامین یوه خپل او د افغانستان د دفاع وزارت مخکېني مرستیال تمیم عاصي هم په خپل ټویټر لیکلي چې د کرنې پخوانی وزیر عبیدالله رامین وفات شوی.

عبیدالله رامین له ۲۰۰۴ تر ۲۰۰۸ کال پورې د افغانستان د کرنې، مالدارۍ او اوبو لګولو وزیر و او وروسته د ولسي جرګې په ۱۶مه دوره کې د بغلان د خلکو استازی شو.

د افغانستان د موی‌تای ملي ټيم دوه غړي نړیوال جام کې برخه اخلي

ارشيف، انځور تزئيني بڼه لري.

د افغانستان د موی‌تای د ملي ټيم دوه غړي تایلنډ کې نړیوال جام کې برخه اخلي.

دا خبره د موی‌تای فدراسیون یوه مسؤل علي ظفر عاطفي ازادي راډیو ته وکړه.

دی وايي: "یوسف جهانګیر له خپل سنګاپوري سیال سره لوبه کوي او که‌یې وګټله بیا به بل رونډ ته ځي. په همدې ترتیب به د سې شنبې په ورځ جعفر عاطفي له تايلنډي لوبغاړي سره مبارزه کوي."

یوسف جهانګیر هغه افغان لوبغاړی دی چې ۲۰۱۹ کال‌یې هم د موی‌تای له نړیوالو سیالیو د برنزو مډال ګټلی و.

د موی‌تای دا سیالۍ د ۹۴ هېوادونو د لوبغاړو ترمنځ د تایلنډ په پلازمېنه بنګاک کې له یکشنبې پیل شوي چې د ډسمبر تر ۱۱مې دوام کوي.

موی‌تای د تایلنډ یو رزمي ورزش دی چې په ټوله نړۍ کې لکونه ځوانان پرې بوخت دي.

په دې ورزش کې ورزشکاران د سوکانو او لغتو ترڅنګ د زنګنو او څنګلو په واسطه هم خپل سیالان وهي.

وېسټا موسسې غزني کې له ۱۳۵ کورنیو سره د نغدو پیسو مرسته وکړه

د وېسټا موسسې د سیمه ییز دفتر مشر مطیع الله کمالپوري یوه بې وزلي ته پیسې ورکوي.

په غزني کې له ۱۳۵ بې وزله او بې ځایه شوېو کورنیو سره د نغدو پیسو مرسته وشوه.

په دغه ځای کې د وېسټا موسسې سیمه ییز دفتر مشر مطیع الله کمالپوري د یکشنبې په ورځ ازادي راډیو ته وویل، له هرې کورنۍ سره د ۲۲۵ امریکايي ډالرو نغده مرسته وشوه.

نوموړی زیاتوي: "د کډوالو په چارو کې د ملګرو ملتونو عالي کمیشنرۍ په مالي لګښت د وېسټا موسسې له لوري په غزني ولایت کې نن د ۱۳۵ کورنیو لپاره د نغدو پیسو وېش وشو چې د هرې کورنۍ لپاره د ۲۲۵ امریکايي ډالرو مرسته وکړه."

ښاغلي کمالپوري وايي، د دغه کورنیو سروې د غزني ولایت د کډوالو چارو ریاست او ولایت مقام په همکارۍ ترسره شوې وه.

افغان سوداګر او صنعت کاران: لاهم سوداګرۍ کې ستونزې لرو

ارشیف، عکس تزئیني بڼه لري

افغان سوداګر او صنعت کاران وایي، لا هم د پیسو په لېږد، بانکي سیسټم او سوداګرۍ کې ستونزې لري.

د سوداګرو او خصوصي سکټور استازي وایي، طالبانو د ګمرکونو او ټرانزیټ ستونزې هوارې کړي او د پاتې نورو ستونزو حل ته هم باید اقدام وکړي.

دغو استازو پرون د طالبانو د حکومت د رییس الوزرا له لومړي مرستیال ملاعبدالغني برادر سره کتنه کې دا خبرې کړې دي.

د طالبانو د سیاسي دفتر ویاند محمد نعیم نن پر خپله ټویټرپاڼه لیکلي چې ښاغلي برادر اړونده ادارو ته لارښوونه کړې چې د سوداګرو او صنعت کاروانو ستونزې هوارې کړي.

پر افغانستان د نړیوال بانک بندیزونو د هغو سوداګرو د پيسو لېږد را لېږد او سوداګریزې معاملې ټکنۍ کړي چې له هېواده بهر یې توکي اخیستل او بیا یې افغانستان ته واردول.

د سالنګ لویه لار د باروړونکو موټرو د تګ را تګ لپاره بنده شوه

آرشیف- د سالنګ لویه لار

د سالنګ لویه لار د باروړونکو موټرو د تګ را تګ لپاره بنده شوه.

د سالنګونو د ساتنې او څارنې د ادارې مشر عبدالله عبید ازادي راډيو ته وویل، دغې سیمه کې له تېرې نیمې شپې راهیسې واوره وریږي چې باد او توپان هم ورسره مل دی.

ښاغلي عبید زیاته کړه، سالنګونو کې د واورې کچه ۲۰ تر ۲۵ سانتي مترو پورې رسیدلې، نو ځکه یې د بار وړونکو موټرو پرمخ دا لار بنده کړه.

ده وویل، نور موټر کولای شي چې د چینونو په تړلو او نورو اړینو توکو پر دې لار تګ را تګ وکړي.

یونیسف: کندهار کې د خوارځواکو ماشومانو د ملاتړ په چارو بوخت یو

ارشیف

د ملګرو ملتونو د ماشومانو د ملاتړ اداره وایي، د دوی ګرځنده ټیمونه په کندهار او نورو ولایتونو کې د خوارځواکو ماشومانو د ملاتړ په چارو بوخت دي.

یونیسف ویلي، افغانستان کې له پنځو کلونو کشر یو میلیون ماشومان د شدیدې خوارځواکۍ له خطر سره مخامخ دي.

د دغې ادارې د افغانستان څانګې نن پر خپله ټویټرپاڼه لیکلي چې دوی په لېرې پرتو سیمو کې د دغو ماشومانو د ژغورنې پر چارو لګیا دي.

له دې وړاندې کابل کې د اندراګاندي یا د ماشومانو د صحت روغتون مشر ازادي راډیو ته ویلي و چې روغتون ته د تېرو کلونو پرتله ډېر خوارځواکي ماشومان ور وړل کېږي.

نور راوښيه

XS
SM
MD
LG