د جرمني په مونیخ ښار کې نړیواله امنیتي غونډه پرون جمعه د نړیوال امنیت د "کمزوري" وضعیت او د اټمي وسلو د پراختیا د ګواښ په اړه په بحثونو پیل شوه.
د غربي هېوادونو او روسیې کمزوري اړېکې او په اوکراین کې روانه جګړه هم د مونیخ د نړیوال امنیتي کنفرانس د بحث له عمده مسئلو دي.
کنفرانس ته دنړۍ د بېلابېلو هېوادونو او نړیوالو سازمانونو مشران ورغلي دي.
د امنیتي کنفرانس په پېل کې، د ملګرو ملتونو عمومي منشي، انتونیو ګوترش د شمالي کوریا د اټمي فعالیت له امله نړیوالو ته خبرداری ورکړ او ویې ویل چې نړۍ یو وار بیا د اټمي کړکېچ له ګواښ سره مخامخ ده.
انتونیو ګوترش زیاته کړه:
"د سړې جګړې تر پای ته رسېدو وروسته، موږ اټمي ګواښ، د یوه اټمي کړکېچ له ګواښ سره مخامخ یو! طبعاً، زما اشاره د شمالي کوریا د خلکو ډیموکراټیک جمهوریت د اټمي وسلو او د لېرې واټن وېشتونکو مزائیلو پراختیا ته ده، په ټوله کې، دا کار د نړیوالې ټولنې د غوښتنې خلاف او د امنیت شورا پر متعددو پرېکړه لیکونو څرګند تېری دی."
کنفرانس ته په وینا کې د ناټو عمومي منشي، ینس سټولټنبرګ پر نړیواله ټولنه غږ وکړ چې پر شمالي کوریا "حد اکثر" فشار راولي او هغه هېواد اړباسي چې له خپلو اټمي هڅو لاس واخلي.
د هغه په وینا، د شمالي کوریا د دولت مشر، کېم یونګ اون د نړیوالو د غوښتنې خلاف، د داسې مزائیلو ازمویلو ته دوام ورکړی چې اټمي سروکي لېږدولائ شي.
ینس سټولټنبرګ زیاته کړه:
"شمالي کوریا د خپل اتمي پروګرام او د بالسټیک مزائیلو جوړولو د پروګرام پراختیا ته دوام ورکړی چې موږ ټولو ته ګواښ پېښوي، د شمالي کوریا مزائیل اوس، د ناټو د ټولو غړو هېوادونو خاورې ته رسېدلائ شي، پیونګیان د واشنګټن په پرتله، مونیخ ښار ته نېږدې دي نو له دې امله باید، موږ پر شمالي کوریا حد اکثر فشار راولو څو خپل اټمي پروګرام بند کړي."
شمالي کوریا د خپلو اټمي هڅو له امله د ملګرو ملتونو د امنیت شورا تر شدیدو بندیزونو لاندې ده.
د ناټو عمومي منشي همدا راز د امریکا د ادعاوو په اړه چې وايي، روسیې د وسلو د کنټرول پر هغه تړون چې د سړې جګړې په پای کې شوی و، سرغړونه کړې، له مسکوه وضاحت وغوښت او ويې ویل چې روسیه باید له دې امله د ناټو اندېښنو ته ځواب ورکړي.
ینس سټولټنبرګ د اروپا د امنیت لپاره د ناټو تړون فعالیت ته اشاره وکړه او ویې ویل:
"ترانز اتلانتیک «تړون» تر ټولو پیاوړی، اغېزمن او داسې معتبر اتحاد دی چې نړۍ یې سارۍ نه دی لېدلی، ځکه، د اړتیا پر وخت موږ ټول تیار یو چې د خپل ګډ امنیت ټینګولو لپاره، هغه کار چې اړتیا یې ده وکړو."
د مونیخ د نړیوال امنیتي کنفرانس تنظیمونکو ویلي چې په روانه درې ورځنۍ غونډه کې، په نړۍ کې د اروپايي اتحادیې پر رول او له مسکو او واشنګټن سره د ټولنې د اړیکو پرڅرنګوالي هم خبرې کېږي.
د مونیخ د امنیتي کنفرانس مشر ویلي چې نړۍ د "بین الحکومتي بحران" تر بریده رسېدلې او له "سخت حقیقت" سره مخامخ ده ځکه ډېر بحرانونه لا نه دي حل شوي او کړکېچونه روان دي.