د لاسرسۍ وړ لېنکونه

تازه خبر
پنجشنبه ۹ وری ۱۴۰۳ کابل ۰۲:۰۱

پاکستاني طالبانو په هوايي برید کې د خپل مرستیال مشر د وژل کېدو پخلی وکړ


د تحریک طالبان پاکستان مرستیال مشر خالد محسود «خان سید سجنا»
د تحریک طالبان پاکستان مرستیال مشر خالد محسود «خان سید سجنا»

پاکستاني طالبانو پخلی کړی چې د تحریک طالبان پاکستان مرستیال مشر خالد محسود چې په خان سید سجنا مشهور و، د امریکا د بې‌پیلوټه الوتکو په برید کې وژل شوی دی.

دا په داسې حال کې ده چې د تېرې پنجشنبې په ورځ د امریکا بې‌پیلوټه الوتکو افغان پولې ته نږدې د شمالي وزیرستان په قبایلي سیمې او همدا شان د افغانستان پر خاوره د مشکوکو وسله‌والو پر مرکزونو بریدونه وکړل.

پاکستاني رسنیو تر دغو بریدونو وروسته داسې راپورونه ورکړل چې پر افغان خاوره د بې‌پیلوټه الوتکو د برید په ترڅ کې د تحریک طالبان پاکستان مرستیال مشر او د هغه وراره وژل شوي، خو پاکستاني طالبانو په دې اړه له څو ویلو ډډه وکړه.

خو د تحریک طالبان پاکستان یوه ویاند محمد خراساني د دوشنبې په ورځ له روېټرز خبري اژانس سره په خبرو کې د امریکا د بې‌پیلوټه الوتکو په برید کې د خپل مرستیال مشر د وژل کېدو پخلی کړی.

په دغه برید کې د نوموړي وراره هم وژل شوی.
په دغه برید کې د نوموړي وراره هم وژل شوی.

ده ویلي:

"خالد محسود په افغانستان کې نه، بلکې په شمالي وزیرستان کې د امریکا په ډرون برید کې ووژل شو."

خان سید سجنا د تحریک طالبان پاکستان د مرستیال مشر تر څنګ د دغه تحریک د محسود څانګې مشر هم و.

د تحریک طالبان پاکستان ویاند له دغه اژانس سره په خبرو کې ویلي:

"د تحریک طالبان پاکستان مشر ملا فضل‌الله، مفتي نور ولي د خالد محسود نوی ځای ناستی ټاکلی دی."

خالد محسود «خان سید سجنا» د جنوبي وزیرستان اوسېدونکی و چې د ۲۰۱۳ میلادي کال په مې کې د تحریک طالبان پاکستان د هغه وخت د مرستیال مشر ولي الرحمن تر وژنې وروسته د دغې ډلې مرستیال مشر شو چې بیا وروسته د ۲۰۱۴ میلادي کال په اکټوبر کې د امریکا د متحده ایالاتو له‌خوا د ترهګرو په لېست کې واچول شو.

روېټرز خبري اژانس وايي، مفتي ولي به هم د خالد مسید په څېر په وزیرستان کې د افغانستان پولې ته نږدې وسله‌وال فعالیتونه رهبري کوي.

روېټرز خبري اژانس د پاکستاني طالبانو د سرچینو په حواله وايي چې مفتي ولي چې په «غر سترګه» مشهور دی د پاکستاني طالبانو یو سرسخته قوماندان دی چې د کراچۍ په شمول د پاکستان په ښاري سیمو کې د فعالیت تجربه هم لري.

دې خبري اژانس زیاته کړې چې مفتي ولي د پنجاب په مهم ښار فیصل‌اباد کې په یوه مدرسه کې سبق ویلی او په دې وروستیو کې یې د پاکستاني طالبانو د یو پخواني مشر بیت‌الله محسود په ستاینه کې چې په ۲۰۰۹ میلادي کال کې د بې‌پیلوټه الوتکو برید کې ووژل شو یو کتاب هم لیکلی دی.

په داسې حال کې چې افغان او امریکايي ځواکونه پاکستان تورنوي چې پر خپله خاوره د هغو وسله‌والو د مرکزونو او مشرانو پر ضد کافي اقدامات نه‌کوي چې په افغانستان کې فعالیتونه کوي، پاکستان خپله هم پر خپله خاوره د پاکستاني طالبانو له یو لړ بریدونو سره مخ دی.

پاکستاني چارواکي ادعا کوي چې د ۲۰۱۴ میلادي کال په پوځي عملیاتو کې یې په قبایلي سیمو کې وسله‌وال ځپلي او د دوی ډېر شمېر یې افغانستان ته اوښتي دي، خو دا چې قبایلي سیمو ته د ژورنالېستانو لاسرسی محدود شوی، په خپلواکه توګه د دې ادعاوو تأیید سخت دی.

په امریکا واکې ته د ډونالد ټرمپ له رسېدو وروسته د امریکا بې‌پیلوټه الوتکو د ډیورند کرښې سره په نږدې قبایلي سیمو کې بریدونه زیات کړي.

هلته چې افغان او امریکايي چارواکي وايي، د حقانې شبکې په شمول وسله‌والې ډلې خوندي مرکزونه لري.

دا لومړی ځل نه‌دی چې د امریکا بې‌پيلوټه الوتکې د پاکستاني طالبانو پر مشرانو بریدونه کوي، بلکې په ۲۰۰۷ میلادي کال کې د تحریک طالبان پاکستان لومړنی مشر بیت‌الله محسود او بیا وروسته د هغه ځای ناستی حکیم‌الله محسود هم په قبایلي سیمو کې د همدغو الوتکو په بریدونو کې وژل شوي.

خالد محسود د حکیم‌الله محسود تر وژل کېدو وروسته د تحریک طالبان پاکستان مرستیال مشر شو.
خالد محسود د حکیم‌الله محسود تر وژل کېدو وروسته د تحریک طالبان پاکستان مرستیال مشر شو.

د یادونې وړ ده چې د پاکستان سیاسي او پوځي مقاماتو لا تر دې دمه په شمالي وزیرستان کې د امریکا د بې‌پیلوټه برید په نتیجه کې د پاکستاني طالبانو د مرستیال مشر د مړینې په اړه څه نه‌دي ویلي.

په وزیرستان کې د پاکستاني طالبانو مشر په داسې حال کې وژل کېږي چې په دې وروستیو کې د قبایلي سیمو اوسېدونکو په اسلام‌اباد کې څو ورځنی اعتراض وکړ او د پاکستان له حکومت او پوځ‌یې وغوښتل چې د دوی په سیمو کې دې روانې ناامنۍ پای ته ورسوي.

په عملیاتو کې دې ولسي خلک نه‌ځوروي، د قبایلي سیمو څخه تري تم شوي کسان دې محکمو کې حاضر کړي او په دې سیمو کې دې ایښودل شوي ماینونه پاک کړي.

XS
SM
MD
LG