د لاسرسي لېنکونه

دوشنبه ۷ غبرګولی ۱۳۹۷ کابل ۱۲:۲۳

په پاکستان کې د افغان کډوالو د اوسېدو موده دوه میاشتې وغځېده


د پاکستان حکومت په دغه هېواد کې د مېشتو راجسټر افغان کډوالو د اوسېدو موده یوازې د دوه میاشتو لپاره غځولې ده.

دا په داسې حال کې ده چې د پاکستان حکومت د روان کال په پیل کې د افغان کډوالو د اوسېدنې موده یوازې د جنورۍ تر پایه وغځوله او ویې‌ویل، د کډوالو لپاره د ملګرو ملتونو نړیواله اداره «UNHCR» دې د افغان کډوالو د بېرته ستنولو لپاره ګړندي ګامونه پورته کړي.

که څه هم د پاکستان حکومت څه موده مخکې په ترکیه کې د افغانستان، پاکستان او «UNHCR» ترمنځ تر درې اړخیزې غونډې وروسته په پاکستان کې د مېشتو افغان کډوالو د اوسېدنې موده د یو کال لپاره د غځولو پرېکړه کړې وه، خو بیا وروسته‌یې دغه موده لومړی یوازې یوه میاشت وغځوله او دا ځل‌یې تر دوه نورو میاشتو اوږده کړه.

پاکستان کې افغان کډوال
پاکستان کې افغان کډوال

د پاکستان دولتي رسنۍ وايي چې د پاکستان حکومت دغه پرېکړه د چهارشنبې په ورځ په اسلام‎اباد کې د مرکزي حکومت د کابینې په هغه غونډه کې کړې چې مشري یې د دغه هېواد صدراعظم شاهد خاقان عباسي کوله.

د پاکستان حکومت تر هغې وروسته افغان کډوالو ته یوه میاشت وخت ورکړ چې د روان کال په لومړۍ ورځ د امریکا ولسمشر ډونالد ټرمپ د ترهګرۍ ضد جګړې په لړ کې پاکستان په دوه مخۍ تورن کړ، د دې هېواد پوځي مرستې یې وځنډولې او افغان حکومت‌یې هرکلی وکړ.

که څه هم د پاکستان حکومت لا تر دې دمه دا نه‎دي ویلي چې ولې یې افغان کډوالو ته د ترکیې د درې اړخیزې غونډې په رڼا کې د یو کال اوسېدو اجازه ورنه‎کړه، خو په اسلام‎اباد کې د افغانستان سفیر ډاکتر حضرت عمر زاخېلوال څو ورځې وړاندې پر پاکستان غږ کړی و چې د دوو هېوادونو د اړیکو د ښکته پورته‌والي فشار باید پر کډوالو رانه‎شي.

د کډوالو لپاره د ملګرو ملتونو د ادارې «UNHCR» د احصائیې له مخې دا مهال په پاکستان کې تر ۴.۱ میلیونو زیات راجسټر افغان کډوال مېشت دي چې په دې هېواد کې د اوسېدو قانوني اسناد لري، خو د پاکستان حکومت بیا ټینګار کوي چې پر دغو کډوالو سربېره په دې هېواد کې نږدې یو میلیون ناراجسټر کډوال هم مېشت دي.

له بلې‎خوا بیا پاکستان یو ځل بیا له امریکا غوښتي چې په دې هېواد کې د مېشتو افغان کډوالو هېواد ته د ستنولو لپاره دې له افغان حکومت سره په ګډه یوه کوټلي تګ‌لاره جوړه کړي.

د پاکستاني رسنیو د راپورونو له مخې د پاکستان د سرحدي چارو وزیر عبدالقادر بلوڅ تېره ورځ د کډوالو لپاره د امریکا د بهرنیو چارو له مرستیالې وزیرې نسيسي ايزوزو جاکسن سره لیدلي او له پاکستانه د افغان کډوالو د ستېندو پر چارو سربېره‌یې ورسره په یو لړ نورو مسایلو خبرې کړې دي.

د پاکستان د سرحدي چارو وزیر عبدالقادر بلوڅ
د پاکستان د سرحدي چارو وزیر عبدالقادر بلوڅ

عبدالقادر بلوڅ د امریکا مرستیالې وزیرې ته ویلي چې په پاکستان کې لکونه کډوال مېشت دي چې له امله‌يې دغه هېواد له یو شمېر ستونزو سره مخ دی، نو ځکه دې امریکا د دغو کډوالو خپل هېواد ته په ستنولو کې رول ولوبوي.

راپور: ذبیح مومند

XS
SM
MD
LG