د پکتیا ولایت یو شمېر قومي مشران، مدني فعالان او د ولایتي شورا غړي له افغان ولسمشر محمد اشرف غني غواړي چې د ولسمشری په پاتې موده کې دې، دوی سره کړې ژمنې عملي کړي.
هغوی زیاتوي، ولسمشر پکتیا ته د اولې درجې ولایت منظوري ورکړې، خو تر اوسه د یاد ولایت ملکي او پوځي ادارې د هماغه دوهمه درجه ولایت تشکیل لري او د بیارغونې په برخه کې هم ورته لازمه توجه نهده شوې.
دوی یادې څرګندونې د یکشنبې په ورځ په پکتیا کې د جهاد او مقاومت د ارزښتونو د ساتنې د دفتر د پرانیست غونډې په څنډه کې د ازادي راډیو مشال څانګې ته وکړې.
قومي مخورو او د ولایتي شورا غړو وویل، که ولسمشر د دوی غوښتنې عملي نهکړي، نو پکتیاوال به ورڅخه خفه او خوابدي شي.
د پکتیا د ولایتي شورا یو تن غړی حفیظالله مبارز او یو بل تن مدني فعال سید جمال اصفخېل وايي:
"په پکتیا کې د نورو لومړۍ درجه ولایتونو په شان تشکیلات نهدي ورکړل شوي، تر اوسه د مرکزي حکومت او نورو وزارتخانو لهخوا په یاد ولایت کې خپلو ادارو ته امکانات نهدي ورکړل شوي."
"پکتیا ته د اول درجې ولایت امکانات نهدي ورکړل شوي، زموږ هیله دا ده هغه امکانات چې د کندهار، ننګرهار او د زونونو نورو مرکزونو ته ورکول کېږي هغه پکتیا ته هم ورکړل شي. دلته لا هم ټول تشکیلات د دوهمې درجې ولایت دي."
د پکتیا مشرانو او فعالانو زیاته کړه چې دوی سره د ښاغلي غني یوه ژمنه دا وه چې د یاد ولایت علمي او مسلکي شخصیتونو ته به د حکومت په مشرتابه کې ونډه ورکوي، خو دا ژمنه هم نهده عملي شوې.
د پکتیا د قومونو د یووالي شورا دوه تنه غړي وايي چې یاد ولایت ته نهیوازې د اولې درجې ولایت تشکیل نهدی ورکړل شوی، بلکې په پرمختیايي چارو کې يې هم پرمختګونه نهدي شوي.
دوی ټینګار وکړ چې حکومت دې یاد ولایت ته په حقیقت کې د اولې درجې تشکیلات او امکانات ورکړي او د ولسمشرۍ په پاتو څه کم دوه کلونو په موده کې دې دوی سره کړې ژمنې عملي کړي.
هغوی وویل، که ژمنې عملي شوې، پکتیاوال به د پخوا په شان له مرکزي حکومت ملاتړ ولري، خو که مثبت پرمختګ ونهویني، نو په خپله پرېکړه به له سره فکر وکړي.
دا پهداسې حال کې ده چې ولسمشر محمد اشرف غني شااوخوا دوه میاشتې مخکې د پکتیا مرکز ګردېز ته په خپل سفر کې ویلي و چې یاد ولایت ته کار نهدی شوی او د مشرانو په یوه غونډه کې يې ژمنه کړې وه چې د پکتیا هر اړخیز پرمختګ ته به پاملرنه وکړي.
خو پکتیا وال وايي چې د ولسمشر ژمنې د کاغذ پر مخ پاتې دي او په عمل کې تر اوسه د پام وړ څه نهدي شوي.
راپور: نجیبالله الوخېل