ټاکل شوې چې د چهارشنبې په ورځ د افغانستان او هندوستان ترمنځ دوهم هوايي دهلېز په رسمي ډول پرانیستل شي.
د افغانستان د سوداګرۍ او صنایعو خونه وايي، د افغانستان او هندوستان ترمنځ د دوهم هوايي دهلېز په پرانیستل کېدو سره به، پر دې سربېره چې د افغان سوداګرو د مالونو د انتقال ستونزه هواره شي د دواړو هېوادونو ترمنځ به د سوداګرۍ کچه هم پراختیا ومومي.
د دغې خونې ویاند صیامالدین پسرلي د سې شنبې په ورځ «۱۳۹۶کال د مرغومې ۰۵» ازادي راډیو ته وویل، دوهم هوايي دهلېز به له افغانستان نه د هندوستان تر ممبی ښار پورې وي.
ښاغلی پسرلی وايي، د دوهم دهلېز په پرانیسل کېدو سره به د افغانستان او هندوستان ترمنځ د سوداګرۍ په کچه کې سلګونه میلیونه ډالر زیاتوالی راشي.
نوموړي زیاته کړه:
"بله کرښه چې له کابل نه به ممبی ته وي، سبا رسماً پرانیستل کېږي او زموږ توکي به انشاءالله د هوا له لارې ممبی ته صادرېږي، دا د هوايي دهلېز د پراختیا دوهم پړاو دی چې په دې سره به له هندوستان سره زموږ سوداګري پراخه شي."
د افغانستان د سوداګرۍ او صنایعو خونو د معلوماتو له مخې اوسمهال افغانستان له هندوستان سره شااوخوا ۶۰۰ میلیونه ډالره سوداګریزه راکړه ورکړه لري چې د دوهم دهلېز په پرانیستل کېدو سره به د سوداګرۍ دغه کچه له ۸۰۰ میلیونه ډالرو څخه نيولې تر ۱۰۰۰ میلونو ډالرو پورې لوړه شي.
دا په داسې حال کې ده چې د دواړو هېوادونو ترمنځ د لومړي دهلېز کابل-ډهلي له پرانیستل کېدو شپږ میاشتې تېرېږي او تر دې دمه د دغه دهلېز له لارې ۱۶۴۶ ټنه وچه او تازه مېوه، لاسي صنایع، طبي بوټي او يو شمېر نور توکي هندوستان ته انتقال شوي دي.
د افغانستان او هند تر منځ هوايي دهلېز پرانیستل شو
په ورته وخت کې د اقتصادي چارو يو شمېر افغان کارپوهان د دا شان دهلېزونو پرانیسته د دواړو هېوادونو د اقتصادي پراختیا په برخه کې ډېره مهمه او ګتوره بولي، ټینګار کوي چې دغو همکاریو د پراختیا په هدف د دواړو لورو ترمنځ باید همغږي زیاته شي.
له دې ډلې سید قیاس سعیدي وايي، د هوايي دهلېزونو جوړېدل به له يوې خوا افغانستان له انحصاره وباسي او له بله پلوه به افغان سوداګریزو توکو ته ښه بازار هم پیدا شي.
نوموړي زیاته کړه:
"تاسو پوهېږئ چې د افغان سوداګرو لویه ستونزه د مارکېټ نشتوالی دی، نو په دې حساب سره به له یو خوا موږ يو له انحصاره ووځو او له بله پلوه به د سوداګرو د مالونو لپاره مارکېټ پیدا شي، دا يو ښه فرصت دی."
ښاغلی سعیدي د افغانستان او هند ترمنځ د دغو دهلېزونو جوړېدل بېروزګارو کسانو ته د کار موندنې په برخه کې هم اغېزمن بولي وايي، په دغو هڅو سره به یو شمېر کسانو ته د کار زمینه هم برابره شي.
راپور: واصل وصال
