د افغانستان نوې ملي جبهې له حکومته وغوښتل چې د انتخاباتو خپلواک کمېسیون د نوي رئیس په ټاکلو کې دې له اپوزېسیون او نورو سیاسي جریانونو سره سلا مشورې وکړي.
د دغې جبهې ویاند سید جواد حسیني د پنجشنبې په ورځ «۱۳۹۶ کال د لړم ۲۵» په کابل کې یوې خبري غونډې ته په خبرو کې د انتخاباتو د خپلواک کمېسیون د رئیس له دندې د لیرې کېدو هرکلی وکړ.
دی وايي:
"د افغانستان نوې ملي جبهه د انتخاباتو د خپلواک کمېسیون د رئیس جناب احمدزی صیب له دندې د ګوښه کېدو هرکلی کوي او هغه یو مثبت ګام بولي."
ښاغلی حسیني زیاتوي، حکومت د راتلونکو انتخاباتو د شفافیت په هدف، باید د نوي رئیس په ټاکلو کې یو لړ منل شوي معیارونه په پام کې ونیسي.
افغان ولسمشر د چهارشنبې په ورځ د یو فرمان له مخې د انتخاباتو د خپلواک کمېسیون رئیس نجیبالله احمدزی له دندې ګوښه کړ.
په فرمان کې اړوندو ادارو ته سپارښتنه شوې چې د نویو کاندیدانو لېست جمهوري ریاست ته وسپاري.
نجیبالله احمدزی شااوخوا یو کال وړاندې د کمېسیون د کمېشنرانو له لوري د انتخاباتو د خپلواک کمېسیون د رئیس په توګه وټاکل شو.
جمهوري ریاست وايي چې حکومت به د انتخاباتو د خپلواک کمېسیون د نوي رئیس په ټاکلو کې له ټولو ګوندونو، سیاسي جریانونو او مدني ټولنو سره سلا مشورې وکړي.
د جمهوري ریاست د ویاند مرستیال نجیب ازاد وايي:
"ولسمشر له ټولو سیاسي جریانونو، ګوندونو او ټولنو غوښتي چې د کمېسیون د ریاست لپاره د پام وړ کاندیدان معرفي کړي، څو د یوې شفافې پروسې له لارې د کمېسیون ریاست ته غوره کس د رئیس په توګه په دنده وګمارو."
ښاغلی ازاد زیاتوي افغان حکومت ژمن دی چې په انتخاباتي نظام کې د پام وړ اصلاحات رامنځته کړي او په دې برخه کې یې ګامونه هم اخیستي.
بلخوا د افغانستان د شفافو انتخاباتو بنسټ یا ټیفا وايي چې حکومت تل د انتخاباتو د خپلواک کمېسیون په کارونو کې لاسوهنه کړې ده.
د دغه بنسټ مشر محمد نعیم ایوبزاده وايي، دوی اوس هم ډاډمن نهدي چې د انتخاباتو خپلواک کمېسیون نوی رئیس به له قانون سره سم په منل شویو معیارونو وټاکل شي.
راپور: رحمتالله افغان
