د افغانستان په شمال او ختیځ کې چارواکي وايي، په وروستیو کې د وسلهوالو طالبانو او د اسلامي دولت په نوم د وسلهوالې ډلې یا داعش په نښتو کې زرګونه کسان بېکوره شوي دي.
د جوزجان والي لطفالله عزیزي د مرکزي حکومت له چارواکو سره د خبرو لپاره په کابل کې دی.
هغه تېره شپه ازادي راډیو سره په مرکه کې وویل، وسلهوال طالبان او داعشیان په قوشتپه او درزاب ولسوالیو کې سره جنګېږي.
عزیزي وویل، په وروستۍ یوه اوونۍ کې په دواړو ولسوالیو کې د روانې جګړې له امله لسګونه کورنۍ تېښتې ته اړ شوي او ډېر خلک بېکوره شوي دي.
لطفالله عزیزي زیاته کړه:
"زما د معلوماتو پر اساس، تر ۵۰۰ زیات داعشیان په درزاب کې د وسلهوالو طالبانو پر وړاندې چې شمېر یې د ۶۰۰ او ۷۰۰ ترمنځ دی، جنګېږي. هغوی عمدتاً د سیمو پر سر نښتې کوي."
عزیزي وویل چې د جګړې له امله په درزاب ولسوالۍ کې ۵۸ ښوونځي تړل شوي او تر ۳۰ زره زیات زدهکوونکي له زدهکړې پاتې شوي دي.
وسلهوال طالبان او داعشیان په قوش تپه او درزاب ولسوالیو کې سره جنګېږي.
د جوزجان والي وویل چې له هغو بېکوره شویو کسانو سره چې د شبرغان ښار ته ورتښتېدلي د بېړنیو خوراکي موادو، درمل او خیمو مرستې شوي، خو کافي نهدي.
د افغانستان په ختیځ ولایت ننګرهار کې هم د ورته ستونزې له امله سلګونه کورنۍ بېځایه شوي او نورو سیمو ته تښتېدلې دي.
د ننګرهار د والي ویاند، عطالله خوګیاڼي تېره شپه ازادي راډیو ته وویل:
"تر دوه زره زیاتې کورنۍ بېځايه شوي دي. په وروستیو کې مرسته کوونکو ادارو او حکومت له ۱۲ سوه کورنیو سره د خوراکي موادو او نورو ضروري توکو مرستې کړي دي. په همدې ډول، پنځه زره ښوونکو او زدهکوونکو ته چې تېښتې ته اړ شوي، د زدهکړې امکانات برابر شوي دي."
خو د ننګرهار د والي ویاند ډاډ څرګند کړ چې په ختيځ کې د داعشیانو مقاومت مات شوی دی.
د جوزجان والي هم وویل چې په دوو اوونیو کې به د درزاب او قوشتپې ولسوالیو د تصفیې لپاره پوځي عملیات پیل شي.
دا په داسې حال کې ده چې د کندهار امنیه قوماندان، له ازادي راډیو سره په وروستۍ مرکه کې وویل چې د وسلهوالو طالبانو مشر ملا هبتالله تېره میاشت هلمند ته تللی و او خپلو قوماندانانو تهیې سپارښتنه کړې وه چې د داعش له وسلهوالو سره له جګړې لاس واخلي ځکه دواړه ډلې د ګډ هدف لپاره جنګېږي، خو وروسته بیا د وسلهوالو طالبانو ویاند دا خبر رد کړ.
