د عراق په کُردستان کې له مخالفتونو سره-سره نن ورځ د ټولپوښتنې ترسره کېدو ته چمتووالی نیول شوی دی.
د عراق د کُردستان ټولپوښتنه بلآخره له زیاتو لانجو وروسته نن ترسره کېږي.
که ټولپوښتنه کې خلک مثبته رأیه ورکړي نو د عراق کُردان به د یوه خپلواکه هېواد څښتنان شي هغه څه چې د عراق د حکومت په شمول د نړۍ ګڼ هېوادونه یې کلک مخالفت کوي.
خو له دې ټولو مخالفتونو سره-سره د کُردانو مشر مسعود بارزاني ژمنه کړې ده چې ټولپوښتنه به ترسره کړي.
هغه پرون وویل چې عراق په یوه فرقهيي حکومت اوښتی او دی به هېڅکله له بغداد سره بیا ملګری نهشي.
خلک له څو ورځو راهیسې د عراق په کُرد مېشتو سیمو کې د کُردانو د خپلواکۍ په پار د ټولپوښتنې شېبې شماري.
د کُردستان په سیمه کې د انتخاباتو خپلواک کمېسیون یوه مقام شورش حسن کریم وویل، د ټولپوښتنې لپاره هر څه تیار دي.
شورش حسن کریم زیاته کړه:
"هر څه چمتو دي. نهه نوي فیصده نه بلکې سل فیصده هر څه چمتو دي. ټول اکمالات شوي، د رأیې ورکونې صندوقونه چمتو شوي، رأی پاڼې هم چمتو دي او هر څه چې د رأیې اچونې لپاره اړین او اماده دي."
نړیواله ټولنه په دې اندېښنه کې ده چې د کُردستان په خپلواکه کېدو سره له داعش سره په جګړه کې ترلاسه شوې بریا په هوا لاهو شي او تمرکز به په کورنیو لانجو واوړي.
د ترکیې صدراعظم بن علي یلدرېم د یکشنبې په ورځ د کُردستان له ټولپوښتنې سره مخالفت ښودلی او ویلي یې دي چې هېواد به یې د خپلو سویلي پولو په شاوخوا کې د نویو تأسیساتو جوړول ونه زغمي.
ایران هم د بغداد په غوښتنه کُرد مېشتو ایربیل او سلیمانیه ښارونو ته هوايي پروازونه بند کړي دي.
د عراق صدراعظم حیدرالعبادي ټولپوښتنې ته مثبته رایه د اساسي قانون او سولې په خلاف بللې او ویلي یې دي چې په عراق کې سختې لانجې رامنځته کړي.
هغه ویلي، اجازه به ورنه کړي چې د خلکو یووالی له منځه لاړ شي.
العبادي ویلي:
"د جدايي لپاره ټولپوښتنه یو طرفه پرېکړه ده چې د اساسي قانوني او د خلکو د سولهییز ژوند په خلاف ده. موږ دا ټولپوښتنه او پایلې یې نه منو او د هېواد د یووالي او د خلکو د ګټو د خوندیتوب لپاره به اړین ګامونه پورته کړو."
عبادي پرون یکشنبه په ټلویزیوني وینا کې دا هم ویلي چې د کُردستان لانجې د بغداد له امله نه دي بلکې ټولې یې د ده په خبره په کوردننه ستونزې دي.
خو اخوا د کُردانو مشر مسعود بارزاني په خپل دریځ کلک ولاړ دی او د نړیوالو له مخالفتونو سره-سره د ټولپوښتنې ترسره کېدل غواړي.
صفي الله ستانکزی
