د افغان حکومت اجرائیه ریاست وايي، د مولانا سمیع الحق څرګندونې هغه بحث ته تحقق ورکوي چې په پاکستان کې د تروریستي ډلو ملاتړ شته او د پاکستان حکومت او سیاسي ډلې چمتو نه دي چې د هغوی پرضد اقدام وکړي.
دغه ریاست وايي، د مولانا سمیع الحق وروستۍ څرګندونې د هغو ترخو واقعیتونو یوه برخه ده چې په پاکستان کې موجود دي.
د اجرائیه ریاست مرستیال ویاند جاوید فیصل د یکشنبې په ورځ ازادي راډیو ته وویل مولانا سمیع الحق او نور مذهبي مشران د پاکستان د حکومت په مرسته له تروریستي ډلو ملاتړ کوي.
نوموړي زیاته کړه:
"مولانا سمیع الحق او نور هغه مذهبي مشران چې په پاکستان کې د سیاسي ګوندونو رهبري لري هغوی د پاکستان د حکومت په مرسته له تروریستي ډلو ملاتړ کوي، دا په ټوله کې له هغو بحثونو څخه دي چې د افغانستان حکومت همیشه کړی و، دوی دغه بحث ته تحقق ورکوي په پاکستان کې تروریستان شته."
د پاکستان د «جمعیت علمای اسلام ګوند» او " دفاع پاکستان شورا"مشر مولانا سمیع الحق په تازه څرګندونو کې ویلي د ده کسان په افغانستان کې جګړې ته دوام ورکوي او د پاکستان پوځ باید حقاني شبکه له پاکستانه ونه باسي.
دا ډول څرګندونې وروسته له هغې کېږي چې د امریکا ولسمشر تېره اوونۍ د افغانستان او جنوبي اسیا لپاره د خپلې نوې سترتیژۍ د اعلان پرمهال پاکستان ته خبرداری ورکړ چې پر خپله خاوره د هغو تروریستي ډلو له ملاتړه لاس واخلي چې د امریکا پر وګړو او ګټو حملې کوي.
ډونالد ټرمپ ویلي تروریستان په پاکستان کې پناه ځایونه لري او پاکستان باید د حقاني شبکې او طالبانو پرضد اقدام وکړي.
بل خوا د پاکستان د بهرنیو چارو وزیر ویلي تروریستان په پاکستان کې پناه ځای ته اړتیا نه لري، ځکه د هغه په وینا هغوی په افغانستان کې ازاد اوسي او فعالیت کوي.
خواجه محمد اصف د جمعې په ورځ د پاکستان له جیو نیوز تلویزیون سره په مرکه کې د افغانستان لپاره د امریکا د ولسمشر ستراتیژي یوه هڅه وبلله چې د خپلې ناکامۍ د پټولو لپاره یې کړې ده.
خو افغان حکومت د وسله والو د فعالیت په اړه د پاکستان د بهرنیو چارو د وزیر څرګندونې غیر مسؤلانه بللې دي.
په ورته وخت کې د سیاسي چارو یوشمېر افغان کارپوهان وايي چې له شک پرته دا ډول څرګندونې د حسن ګاونډیتوب او نړیوالو حقونو خلاف عمل دی او د پاکستان حکومت يې باید مخنیوی وکړي.
د دغو کارپوهانو له ډلې قدرت الله ځواک ازادي راډیو ته وویل:
"له شک پرته دغه موضوع د حسن ګاونډیتوب، د نړیوالو عمومي حقونو او د دواړو هېوادونو د رسمي پالیسۍ له اړخه د منلو وړ نه ده او د پاکستان حکومت ته دغه مکلفیت راجع کوي چې د دغه شان ډلو مخنیوی دی وکړي، څو په افغانستان او سیمه کې ثبات او امنیت ټینګ شي."
ښاغلی ځواک زیاتوي که پاکستان بیا هم په خپله خاوره کې د تروریستي ډلو ځپلو ته چمتو نه شو، نو امریکا او نړیوالې ټولنې ته پکار ده چې په پاکستان فشارونه زیات کړي، بندیزونه ورباندې ولګوي او د دغه هېواد پر وړاندې په نورو ممکنه انتخابونو هم غور وکړي.
راپور: رحمت الله افغان
