د افغانستان د ځوانانو د هيلو ملي ائتلاف وايي، که چېرې افغان حکومت او په دغه هېواد کې مېشت نړیوال ځواکونه د ملکي وګړو د تلفاتو کمېدو ته پام ونه کړي له هېواد څخه د ځوانانو تېښته به زیاته شي.
دوی پهدې باور دي چې د افغانستان او جنوبي اسیا لپاره د امریکا د نوې ستراتیژۍ له اعلان وروسته جګړه به لاپسې زور واخلي.
دغه ائتلاف په هېواد کې د جګړو په زیاتېدو سره د ملکي تلفاتو په ډېرېدو هم اندېښنه څرګندوي.
د یاد ائتلاف رئیس محمد علي جعفري د جمعې په ورځ د یوې خبري ناستې پر مهال وویل، په جګړه کې د خلکو له کورونو د سنګر په توګه کار اخېستل کېږي او افغان او بهرني ځواکونه باید د عملیاتو پر مهال د عامو خلکو ژوند ته جدي پاملرنه وکړي.
نوموړی وايي:
"د امریکا نوې ستراتیژۍ ته په پام د حکومت مشران باید له ډېر غور نه کار واخلي چې کوم نوي پروګرامونه ترلاسه لاندې ونیسي چې د ملکي وګړو له تلفاتو نه مخنیوي وشي، که د ملکي تلفاتو مخنیوی ونهشي، خلک او په ځانګړي ډول ځوانان به اړ شي ترڅو له هېواده بهر ولاړ شي او موږ له دې اړخه جدي اندېښنه لرو."
د دغه ائتلاف یو غړي احمد ذکي د حکومتي مشرانو ترمنځ د سیاسي اختلافاتو زیاتېدل د جګړې د دوام یو بل لامل په ګوته کړ.
دوی وايي، اړتیا ده چې حکومت د پراخو عملیاتو په ترسره کولو سره د وسلهوالو مخالفینو پرمختګ او نفوذ مخه ونیسي.
دا په داسې حال کې ده چې پهدې وروستیو کې داسې راپورونه خپاره شوي چې د تېر په پرتله سږکال د ملکي وګړو تلفات ډېر شوي دي.
د افغانستان لپاره د ملګرو ملتونو مرستندویه ادارې یا یوناما پهدې وروستیو کې ویلي چې چې د ۲۰۱۷ ميلادي کال په لومړیو شپږو میاشتو کې د تېر کال د همدې مودې په پرتله د ملکي وګړو مرګ ژوبله دوه سلنه ډېره شوې ده.
یوناما په یوه اعلامیه کې ویلي چې د جون د میاشتې ترپایه په افغانستان کې۱۶۶۲ملکي کسان وژل شوي چې دوه سلنه ډېروالی ښيي او ۳۵۸۱ نور بیا ټپیان دي.
په دې اعلامیه کې راغلي چې د تېرکال د همدې مودې په پرتله د ښځو مرګ ژوبله ۲۳ سلنه او د ماشومانو نهه سلنه زیاته شوې ده.
پهدې وروستیو کې په سرپل ولایت کې د صیاد ولسوالۍ د میرزا اولنګ پېښه د ملکي تلفاتو تر ټولو ټکان ورکوونکې پېښه بلل شوې ده چې د افغانستان د بشري حقونو د خپلواک کمېسیون په وینا پهکې لږترلږه ۶۰ ملکي وګړي وژل شوي.
خو د افغانستان دفاع وزارت ویاند جنرال دولت وزیري د جمعې په ورځ ازادي راډيو ته وویل چې افغان ځواکونه د عملیاتو پر مهال هڅه کوي چې د ملکي تلفاتو مخه ونیسي.
وزیري زیاته کړه:
"هغه څه چې موږ پورې اړه لري، هڅه کوو چې له ډېر احتیاطه کار واخلو، کوم عملیات چې د یوې ورځې لپاره پلان کېږي هغه په دوو، درېیو ورځو کې ترسره کوو دا د دې لپاره چې له ملکي تلفاتو مخنیوی وشي. "
ښاغلی وزیري د ملکي تلفاتو لامل هغه وسلهوالې ډلې په ګوته کوي چې په وینا يې د خلکو له کورونو د سنګر په توګه کار اخلي او د ملکي تلفاتو لامل ګرځي.
د افغانستان دفاع وزارت چارواکي ټینګار کوي چې د افغانستان لپاره د امریکا نوې ستراتیژي وسلهوالو مخالفینو ته څرګند پیغام ورکوي چې ترڅو له جګړې لاس واخلي.
دغه وزارت وايي، افغان ځواکونه د نړیوالو په ملاتړ اجازه نه ورکوي چې وسلهوال مخالفین خپلو حملو ته زور ورکړي.
راپور: ناجیه ساپۍ
