د لاسرسي لېنکونه

دوشنبه ۲۹ لړم ۱۳۹۶ کابل ۰۱:۴۸

د ننګرهار والي: په سږني کانکور کې د هر ډول مداخلو مخه نیول شوې


د ننګرهار والي محمد ګلاب منګل وايي، د کانکور په روانه ازموینه کې يې د هر ډول مداخلو مخه نيولې ده.

نوموړي دا څرګندونې د چهارشنبې په ورځ د ننګرهار په پوهنتون کې د کانکور ازموینې د پيل په مراسمو کې وکړې.

ګلاب منګل وويل، د کانکور د ازموينې سږنۍ پروسه به چې څلور ورځې دوام کوي د تېرو کلونو په پرتله ډېره شفافه او عادلانه وي.

د ننګرهار والي ګلاب منګل
د ننګرهار والي ګلاب منګل

نوموړی وايي:

"د ننګرهار ولایتي ادارې او امنيتي ځواکونو په پوره تعهد سره د هر ډول مداخلو هغه که دولتي اشخاص دي او که غیر دولتي، مسؤل او غیر مسؤل اشخاص دي د هغوی د مداخلو مخه نيولې سږنۍ پروسه به د نورو کلونو په پرتله به ډېره شفافه وي."

د ننګرهار پوهنتون ر‎ئيس پوهندوی ببرک مياخېل د هغو اندېښنو په تړاو چې ګوندې د ختیځې سیمې سهم کم دی، وويل چې د کانکور په ازموینه کې هېڅ ولایت ته سهم نه‎دی ځانګړی شوی.

ښاغلي مياخېل وويل، په ټول هېواد کې زده‎کوونکي د وړتيا پر اساس پوهنتونونو ته لاره پيدا کوي.

میاخېل زیاته کړه:

"دا ظرفیت او جذب ننګرهار لپاره نه‎دی ځانګړی شوی چې دې ولایت ته به دومره کسان جذبېږي تېر کال زموږ ۱۰ زره کسانو برخه اخیستې وه چې څلور زره کامیابان موږ لرل. سږ کال ۱۸ زره شاګردان دي نو دا د ټول افغانستان په سطحه د وړتیا پر اساس پوهنتونو ته جذبېږي."

په ورته وخت کې د ننګرهار د ولایتي شورا وکيل ذبیح‎الله زمري وويل چې اوس‎مهال زیات شمېر ځوانان چې زده‎کړې يې تر لېسانس او ماسټرۍ پورې کړي بې‌روزګاره ګرځي.

نوموړي له افغان حکومته وغوښتل چې د لوړو زده‎کړو څخه فارغ وړ کسان دې په دندو وګماري.

ښاغلي زمري زیاته کړه:

"یوازې ننګرهار نه بلکې په ټول هېواد کې زیات شمېر ځوانان ګرځي. د لېسانس او ماسټرۍ اسناد په لاس لري خو کار ورته نه‌پيدا کېږي، بل‎خوا بیا موږ ګورو چې په ځينو څوکیو بې‌سواده کسان مقرر دي زموږ غوښتنه دا ده چې دې باسواده او وړو کسانو ته په ښه موقفونو کې ځای ورکړل شي."

د ننګرهار پوهنتون د معلوماتو له مخې د کانکور په دې آزموینه کې د ۱۳۹۵ او ۱۳۹۶ کلونو د دولسمو ټولګيو شااوخوا ۱۸ زره فارغان برخه لري چې له دې جملې ۱۸۰۰ برخه‎وال نجونې دي.

راپور: شاه‌محمود شینواری

XS
SM
MD
LG