د کورمې ایجنسۍ په مرکز پاړاچنار کې ځايي اوسېدونکو په دې ښار کې د ورووستیو ترهګریزو بریدونو پرضد احتجاج د پوځ له مشر جنرال قمر جاوید باجوه سره تر لیدنې او د هغه تر ډاډ او ژمنو وروسته پای ته رسولی.
دغو احتجاج کوونکو ویل تر هغه چې صدراعظم نواز شریف یا د پوځ مشر نه وي ورغلی، دوی به احتجاج ته دوام ورکوي او همداشان یې د ترهګریزو بریدونو د پلټنو، د پېښې د قربانیانو له کورنیو سره د مرستې او د هغو امنیتي سرتېرو د لرې کولو غوښتنه کوله چې پر احتجاج کوونکو یې ډزې کړې وې.
د رسنیو د راپورنو له مخې، د پاړه چنار اوسېدونکو دغه احتجاج تر هغې وروسته پای ته رسولی چې د پوځ مشر جنرال جاوید قمر باجوه د جمعې په ورځ د سیمې سفر وکړ، له احتجاجیانو او ځايي مشرانو سره یې ولیدل، د هغوی غوښتنې یې واورېدې او د سیمې پر امنیت یې خبرې وکړې.
د پوځ د مطبوعاتي څانګې مشر جنرال اصف غفور له رسنیو سره په خبرو کې وویل، جنرال باجوه د احتجاجیانو په غوښتنه پاړه چنار ته تللی او په خبره یې چې د پاړه چینار په ګډون د ټول ملک حفاظت د پوځ په لومړیتوبونو کې دی.
نوموړي همداشان ترهګري یو لعنت وباله او د ماتې ورکولو لپاره یې پر ګډو هڅو ټینګار وکړ:
"د ټول پاکستان امنیت او خلک یو برابر دي، موږ باید د ترهګرۍ دغه لعنت ته په ګډه ماتې ورکړو، د احتجاج کوونکو چې کومې غوښتنې دي، په هغو کې ځينې سیاسي او ځینې امنیتي دی، کومې چې د امنیت له پلوه دي، د پوځ مشر د هغې جاج اخېستو حکم ورکړی دی، تاسو ګورئ چې د پوځ اضافي دستې هلته وروړل شوې دي او د ښار خوندیتوب په نامه یوه امنیتي پروژه هم روانه ده او پر هغه به ښه کا رووایي کېږي."
له بلې خوا بیا د پوځ مطبوعاتي دفتر د پوځ د مشر د دور ې په اړه په خپور کړي بیان کې ویلي چې جنرال جاوید قمر باجوه له قبایلي مشرانو سره په لیدنه کې د سیمې د ملېشه ځواک د مشر د بدلولو، پر احتجاج کوونکو د ډزو د تحقیقاتو او د پېښې د مسؤلینو د نیولو، د پېښې د قربانیانو د کورنیو سره د مرستې او د پاړه چنار د خوندیتوب لپاره د خوندي ښار پروژې پیلولو اعلان کړی دی.
د راپورونو له مخې، د پاکستان د تحریک انصاف ګوند مشر عمران خان هم د جمعې په ورځ د پاړه چنار دوره کړې، له احتجاج کوونکو او قبایلي مشرانو سره یې لیدلي او په سیمه کې په وروستیو ترهګریزو بریدونو خواشیني ښودلې ده.
د یادونې وړ ده چې په پاړه جنار کې د وروستیو ترهګریزو بریدونو پرخلاف پر پاړه چنار سربېره، په اسلام اباد، پېښور، کراچۍ او نورو بېلابېلو ښارونو کې هم احتجاجي مظاهرې شوې وې.
دا په داسې حال کې ده چې په پاړه چینار کې دد ښارښار اوسېدونکیو په پې اې چوک کې تر هغې وروسته احتجاج پیل کړ، چې د تیرې جمعې په ورځ د پاړه جنار په توري مارکیټ کې پرله پسې دوه چادنې وشوې، چې ۷۵ کسان یې ووژل او تر ۲۰۰ زیات یې ټپیان کړل.
راپور: ذبیح مومند
