د ناټو د غړو هېوادونو د ناستې په درشل کې د افغانستان دفاع وزارت هیله لري هغه وړاندیزونه چې دې ناستې تهيې استولي د پاملرنې وړ وګرځي.
د یاد وزارت ویاند دولت وزیري د پنجشنبې په ورځ په یوه خبري ناسته کې وویل چې افغان امنیتي ځواکونه باید تجهیز شي تر څو په خپلواک ډول ترورېزم وځپي.
د ښاغلي وزیري په خبره د هوايي ځواکونو پیاوړي کول، د رادار سیسټم فعالول، د توپچي برخې تقویه کول، انجنیري کشف او استخبارات د حکومت له عمده غوښتنو څخه دي.
نوموړی وايي:
"زموږ هیله د ناټو د غړو، امریکا او نورو مرسته کوونکو هېوادونو څخه دا ده چې زیاته مرسته وکړي او هغه برخې چې تر دې دمه فعالې نهدي فعالې شي څو جنګ پای ته ورسېږي."
د ناټو د غړو هېوادونو ناسته د پنجشنبې په ورځ د بلجیم په مرکز بروکسل کې پیل شوه او د امریکا ولسمشر ډونالد ټرمپ هم په دغې ناسته کې د ګډون په هدف بروکسل ته رسېدلی دی.
د دې یو ورځنۍ ناستې په اجنډا کې افغانستان شامل نهدی خو یو شمېر راپورونه وايي چې ګډون کوونکي به د ترورېزم پر وړاندې د مبارزې د موضوع په برخه کې افغانستان هم یاد کړي.
سره له دې چې د ناټو د غړو هېوادونو د مشرانو په دې ناسته کې افغان حکومت ته د ګډون بلنه ورکړل شوې وه خو د افغانستان جمهوري ریاست ویلي دا چې د افغانستان مسئله په بحث کې نهده شامله، افغان حکومت به هم په دې ناسته کې ګډون ونهکړي.
د ناټو د عمومي منشي مرستیال جېمز اپاتورای په بروکسل کې د ازادي راډیو خبریال ته ویلي چې د افغان امنیتي ځواکونو د ملاتړ او پیاوړتیا په هدف به هڅې روانې وي.
له دې مخکې داسې راپورونه خپاره شوي وو چې د امریکا متحده ایالات به په دې ناسته کې افغانستان ته د خپلو نورو عسکرو د استولو په اړه هم پرېکړه وکړي.
د ناټو عمومي منشي ینس سټولټنبرګ د چهارشنبې په ورځ یو وار بیا ټینګار کړی چې په افغانستان کې به د ناټو مأموریت بدلون ونهمومي.
نوموړي ویلي چې په افغانستان کې د پوځیانو د شمېر د زیاتولو هدف د افغان ځانګړو عملیاتي ځواکونو او د دې هېواد د هوايي ځواک روزنه او پیاوړتیا ده.
دا مهال په افغانستان کې ۱۳۵۰۰ بهرني سرتېري مېشت دي چې له دې شمېرې څخه ۸۴۰۰یې امریکايي سرتېري دي.
په ورته وخت کې د افغانستان د مشرانو جرګې د دفاعي کمېسیون رئیس هاشم الکوزی وايي چې د بهرنیو سرتېرو د زیاتولو پر ځای د افغان ځواکونو تجهیز او پیاوړي کول غوره دی.
د ښاغلي الکوزي په خبره د بهرنیو ځواکونو په ډېرېدو سره د افغانستان جنګ لاپسې اوږدېږي.
دی وايي:
"نو د دې لپاره موږ دا وایو چې د افغانستان وسلهوال پوځ دې پیاوړی شي او د سولې په پروسه باندې دې کار وشي، جنګ د حل لاره نهده او نهدي افغانستان یو وار بیا د جنګ مرکز وګرځي."
ښاغلی الکوزی ټینګار کوي چې افغان ځواکونه د جګړې توانايي او مورال لري خو د تجهیزاتو کموالی د امنیتي وضعیت د خرابېدو او حتی د امنیتي ځواکونو د تلفاتو د ډېرېدو لامل شوی دی.
راپور: اکرامالله اکرام
