د افغانستان جمهوري ریاست وايي چې د ناټو سرمشریزې ته که څه هم افغان حکومت بلل شوی و، خو د ځينو دلایلو له مخې پهکې ګډون نهکوي.
په دې غونډه کې د افغانستان د بحث نهشاملېدل، له جمهور رئیس غني سره د ناټو د سرمنشي او سفیرانو وروستي وېډيویي کنفرانس باندې اکتفا کول او د کابل غونډې ته چمتووالی هغه عمده دلایل دي چې ارګ په دې غونډه کې د نهګډون لپاره وړاندې کړي دي.
د جمهور رئیس مرستیال ویاند نجیب ازاد د چهارشنبې په ورځ ازادي راډيو ته وویل، د همدې دلایلو له امله افغان حکومت دا لازمه نهګڼي چې د ناټو غړو هېوادونو په سرمشریزه کې ګډون وکړي.
ښاغلي ازاد وویل:
"هو افغان حکومت ته د ګډون بلنه ورکړل شوې خو دغې غونډه کې د ګډون لپاره له افغانستانه کوم پلاوی نهځي، ځکه چې افغانستان هلته د بحث وړ موضوع نهده او حکومت لازمه نهګڼي چې دې غونډه کې یې پلاوی ګډون وکړي."
ټاکل شوې چې د ناټو سرمشریزه د پنجشنبې په ورځ د مې میاشتې په ۲۵مه نېټه د بلجیم پلازمېنه بروکسل کې جوړه شي.
لوېدیځو رسنیو لیکلي چې په دې غونډه کې د امریکا جمهور رئیس ډونالد ټرمپ هم ګډون کوي او د افغانستان د جګړې تر څنګ پر بېلابېلو مسایلو خبرې لري.
دا په داسې حال کې ده چې دا وخت افغانستان ته د څو زره تازه دمه بهرنیو عسکرو په لېږلو غور کېږي.
د واشنګټن پوسټ امریکایي ورځپاڼې په دې وروستیو کې د امریکا د ملي امنیت سلاکار مکمسټر له قوله لیکلي چې ښايي ډونالد ټرمپ به له دغه سفر وروسته د افغانستان په اړه خپله پرېکړه اعلان کړي.
له دې سره د ولسي جرګې یو شمېر غړي دا اټکل کوي چې د ناټو لهخوا د افغان حکومت ځينو غوښتنو ته سم ځواب نهویل، ممکن د دې سبب شوی وي چې افغان حکومت دې په دې غونډه کې له ګډونه په شا شي.
د دې جرګې د بهرنیو اړیکو کمېسیون یوه غړي جعفر مهدوي ازادي راډيو ته وویل، له دې سره په دې غونډه کې د افغان چارواکو ګډون یا نهګډون د ناټو په پرېکړو څه اغېز نهشي لرلای.
نوموړی وايي:
"دوی ښايي د حکومت ځينې هیلې د اصلاحاتو او ښې حکومتوالۍ د نشتوالي له کبله نهوي منلې، نړیوالې ټولنې او ناټو افغان حکومت ته خپل پیغام رسولای او افغان حکومت په خپل غبرګون سره غواړي دې کنفرانس کې ګډون ونهکړي خو دا مسئله د ناټو په پرېکړو هېڅ اغېز نهلري."
خو د نړیوالو چارو یو شمېر کارپوهان وايي، په هغه صورت کې چې افغانستان دغې غونډې ته بلل شوی وي د ډيپلوماتيک رسم له مخې باید استازو یې پهکې ګډون کړی وی.
د دې کارپوهانو له ډلې څخه نجیب محمود ازادي راډيو ته وویل، افغانستان باید د ناټو په غونډه کې د امنیتي اندېښنو او د نړیوالې ټولنې په مرستو خبرې کړې وی.
دی وايي:
"د دې زیات امکان شته چې د افغانستان موضوع هلته یاده شي، په هغه صورت کې چې که افغان پلاوي ته وخت ورکول کېږي باید د مرستو غوښتنهیې کړې وی، که هلتهیې استازی وی لږ تر لږه د امنیتي وضعیت په اړهیې نړیوالې ټولنې ته یو تصویر ورکولای شو او افغان دولت باید په شخصي او ګونګو مسایلو دا غونډه پرې نهږدي."
ښاغلی محمود وايي، که افغان حکومت د ناټو په سرمشریزه کې د نهګډون نور دلایل هم لري باید له خلکو سرهیې شریک کړي.
دا په داسې حال کې ده چې جمهور رئیس محمد اشرف غني د جمعې په ورځ د ناټو له سرمنشي او سفیرانو سره په وېډیويي کنفرانس کې د ناټو او افغانستان امنیتي تړون د دوستۍ بنسټ بللی دی.
ښاغلي غني ویلي چې دا تړون د افغانستان او ناټو هر اړخیزې او دوامدراه ګټې تأمینوي.
راپور: یوسف خان ځدراڼ