په افغانستان کې نن یکشنبه ملي ماتم اعلان شوی.
د جمهوري ریاست د مطبوعاتي دفتر خبرپاڼه وايي، په بلخ کې پر ۲۰۹م شاهین قول اردو د وروستۍ حملې د قربانیانو د درناوي لپاره به نن په ټول هېواد کې دولتي بیرغ نیم ځوړند وي.
د ولسمشر د ویاند دفتر سرپرست شاهحسین مرتضوي تېره شپه ازادي راډیو ته وویل:
"د شنبې په ماښام، ولسمشر حکم وکړ چې د جمعې د ورځې د پېښې د شهيدانو درناوي لپاره به د یکشنبې په ورځ په ټول هېواد کې ملي ماتم وي."
د ښاغلي مرتضوي په وینا، نن به پر هغو دفترونو چې په بهر کې د افغانستان سیاسي استازيتوب کوي، دولتي بيرغ نیم ځوړند وي.
د ارګ په جومات کې به نن د پېښې د قربانیانو لپاره د دعا مراسم ترسره شي.
د افغانستان په ټولو ولایتونو کې د ورته مراسمو غږ شوی دی.
ولسمشر محمد اشرف غني پرون بلخ کې د ۲۰۹ شاهین قول اردو له منصبدارانو او عسکرو سره د لیدو لپاره مزار شریف ته ولاړ او د پېښې په اړهیې د جدي څېړنو امر وکړ.
منیهپال: ولسمشر غني پر شاهین قول اردو حمله څېړي
ولسمشر غني بلخ کې د ۲۰۹ شاهین قول اردو چارواکو سره کتلي
د بلخ په دهدادي ولسوالۍ کې د ۲۰۹ شاهین قول اردو پر مرکز د حملې مسؤلیت وسلهوالو طالبانو اخیستی دی.
د دې قول اردو عسکر محمد حسین چې په حمله کې زخمي شوی، اسوشيټېډ پرېس ته وویل:
"درېيو کسانو چې د ملي اردو په موټر کې سپاره وو، ډزې پیل کړې، د وطن دښمنان دي، نهپوهېږم، ښايي چا له داخله مرسته ورسره کړې وه چې موټر مرکز ته راتېر کړي. له عمومي دروازې تر مرکزه د تلاشۍ اووه یا اته ځایه دي، نو د چا له مرستې پرته موټر تر جوماته نهشو راتېرېدلی. "
د افغانستان دفاع وزارت وايي چې نېږدې ۱۰۰ تنه وژل شوي او زخمیان دي.
په سیمه کې د یوه زخمي کورنۍ ازادي راډیو ته وویل چې د قربانیانو خپلوان لا هم د خپلو عزیزانو د جسدونو د ترلاسه کولو په لټه کې دي.
د ارګ د خبرپاڼې په حواله، پهدې اړه چې د وژل شویو عسکرو او منصبدارو جسدونه د هغوی خپلو سیمو ته ولېږدول شي، ترتیبات نیول شوي دي.
په پېښه کې د یوه وژل شوي منصبدار ماما محمد خان اسوشیټېډ پرېس ته وویل:
"زما د خور زوی له اوو کلونو راهیسې دلته عسکر و. هغه دلته شهيد شوی خو زه دلته انتظار یم چې مړی یې راکړي، تر اوسه هېڅ په لاس نهدي راغلي."
په پېښه کې د وژل شویو او زخمیانو وروستۍ شمېره لا نهده اعلان شوې.
د افغانستان دفاع وزارت په یوه خبرپاڼه کې پرون وویل، د تلفاتو شمېر بدلېږي او پهدې اړه څېړنې کوي چې پایلې بهیې وروسته اعلان کړي.
خو د بلخ د ولایتي شورا رئیس محمد ابراهیم خیراندېش د جرمني خبري اژانس ته ویلي، لږ تر لږه ۱۴۰ تنه وژل شوي دي.
د جرمني صدراعظمې انګلا مېرکل ویلي چې د افغانستان پر پوځیانو د طالبانو دې وحشیانه حملې په وحشت کې کړې ده.
مېرکل د افغانستان ولسمشر ته په استولي ټلېګرام کې له حکومت او د پېښې د قربانیانو له کورنیو سره خواخوږي څرګنده کړې ده.
رپوټونه وايي چې د بلخ پهدې قول اردو کې د جرمني یو شمېر عسکر هم مېشت دي.
