د امنیت شورا د ۱۵ غړو لوی اکثریت پرون حلب ته د ملګرو ملتونو د څارونکو او د نورو مرستندویه نړیوالو سازمانونو د کارکوونکو د تګ پرېکړهلیک تصویب کړ چې د حلب له ختیځه به د ملکي وګړو د وتلو د بهیر څارنه کوي.
په امنیت شورا کې په دې اړه د پرېکړهلیک د تصویب پر مهال د فرانسې سفیر وویل چې د دې اقدام هدف د بشار الاسد د رژیم له لوري د ډلهییزو بشري ضد جنایتونو مخنیوی دی.
د ملګرو ملتونو څارونکي به د حلب ښار ختیځ کې هغو سیمو ته استول کېږي چې مخکې د رژیم د مخالفو وسلهوالو په لاس کې وې.
پرېکړهلیک غوښتنه کوي چې د ملګرو ملتونو عمومي منشي بان کي مون په بېړني ډول د سوريې د ولسمشر بشارالاسد له حکومت او په کړکېچ کې د ښکېلو خواوو له استازو سره خبرې وکړې او سیمې ته د دوی د څارونکو د تګ زمینهیې برابره کړې.
په دې شورا کې د امریکا استازې سمنټا پاور پرون وویل:
"په بېړني ډول د دې پرېکړهلیک عملي کېدل، د حلب ختیځ کې چې تر محاصرې لاندې یوه کوچنۍ سیمه ده خو زرګونه کسان پهکې اوسېږي، د خلکو د لېږدولو لپاره د بسونو او د لېږدولو اډو ته د دې څارونکو رسېدل د پرېکړهلیک اساس دی. زه فکر کوم چې دا یو مهم ګام دی او ښايي خلکو څو ورځې مخکې دا توقع نهدرلوده چې روسیه به په امنیت شورا کې د دې پرېکړهلیک تصویب ته اجازه ورکړي. خو دا پرېکړهلیک که عملي نهشي، د کاغذ یوه ټوټه ده. دا زموږ کار دی چې د ملګرو ملتونو په توګه په بیړه خپل څارونکي ورواستوو."
د امنیت شورا پرېکړهلیک همداراز غوښتنه کوي چې ټولې خواوې په بېړني ډول او له هر قید او شرطه پرته ملګرو ملتونو او د بشري مرستو نورو ادارو ته اجازه ورکړي چې د سوريې ټولو سیمو ته بشري مرستې او روغتیايي خدمات ورسوي.
په ملګرو ملتونو کې د سوریې سفیر بشارالجعفري پرون په نیویارک کې د وینا پر مهال، څرګنده کړه چې حکومتيې له حلبه د هغه په وینا، د "غیر قانوني" وسلهوالو او د هغوی د کورنیو له وتلو سره خپله موافقه ټینګه ساتلې ده.
بشارالجعفري زیاته کړه:
"د سوريې حکومت موافقه کړې چې غیرقانوني وسلهوال او د هغوی کورنۍ له حلبه وایستل شي. ډېر خلک چې د دې ترورېستانو کورنۍ ګڼل کېږي په بسونو کې له حلبه ایستل شوي او په هغو سیمو کې چې د حکومت تر واک لاندې دي، ځای پر ځای شوي."
د ملګرو ملتونو د امنیت شورا پرېکړهلیک له بانکي مون څخه غواړي چې د بشارالاسد له رژیمه غوښتنه وکړي چې په حلب او د سوريې په نورو برخو کې د خلکو ژوند ته درناوی وکړي او د هغوی امنیت ټینګ کړي.
د فرانسې حکومت خبرداری ورکړی چې ښايي د بشارالاسد ځواکونه او د هغوی ملاتړکوونکي ملېشه ډلې د حلب ښار د ختیځو سیمو د تصفیې پر مهال بشري ضد جنایتونه ترسره کړي.
په سوریه کې د بشري حقونو د څارنې ډله چې له لندنه فعالیت کوي، وايي چې ګڼ شمېر بسونه چې زرګونو خلک پهکې سپاره وو، پرون د محاصرې له سیمې وایستل او د حلب لوېدیځ ته ولېږدول شول.