د لاسرسۍ وړ لېنکونه

تازه خبر
سه شنبه ۱۲ زمری ۱۴۰۰ کابل ۰۰:۲۱

افغانستان

دفاع وزارت وايي د کندهار د غورک پېښې په اړه څېړنه کوي

دفاع وزارت وایي، د کندهار په غورک ولسوالۍ کې یې د ملي اردو پر پوستو د طالبانو د حملې د څرنګوالي او دوی ته د اوښتو تلفاتو د معلومولو په هدف یو پلاوی ټاکلی دی.

د دغه وزارت ویاند جنرال دولت وزیري نن له ازادي راډیو سره خبرو کې دا تائید کړه چې په دغې ولسوالۍ کې افغان ځواکونو ته وړمه شپه تلفات اوښتي خو دقیق ارقام‌یې یاد نه‌کړل.

ښاغلی وزیري وايي:

"هلته د دفاع وزارت د استخباراتو او کشف یو پلاوی هم ټاکل شوی، تر څو سیمې ته له نېږدې ورشي چې څه پېښه شوې ده."

د کندهار د والي ویاند صمیم خپلواک بیا ازادي راډیو ته وویل چې د غورک ولسوالۍ د چنار په سیمه کې د ملي اردو پر پوستو د طالبانو په برید کې اته د ملي اردو سرتېري وژل شوي او ۱۳ تنه ټپیان دي.

دی وایي، په نښته کې طالبانو ته هم درنه مرګ ژوبله اوښتې ده.

خو د طالبانو یو ویاند قاري یوسف احمدي ادعا کوي چې په دغې حمله کې د ملي اردو ۵۵ سرتېري وژل شوي، دوه پوستې او یوه اندازه وسله‌یې هم د دوی لاس ته لوېدلي دي.

د ورځې تازه خبرونه دلته ولولئ

د بې‌پولې ډاکترانو سازمان افغانستان کې د جګړو زیاتېدو په اړه اندېښنه وښوده

ارشیف، د افغانستان په کندز ولایت کې د بې‌پولې ډاکترانو سازمان روغتون مخ ته ولاړ د دغه روغتون ډاکتران او د افغان ځواکونو یو ټانک او سرتېری

د بې‌پولې ډاکترانو سازمان (اېم‌اېس‌اېف) په افغانستان کې د جګړو د زیاتوالي په اړه جدي اندېښنه څرګنده کړې ده.

دې سازمان په یوه اعلامیه کې ویلي چې له مې راهیسې جګړو زور اخیستی، خو په وروستیو اوونیو کې د افغان ځواکونو او طالبانو ترمنځ شخړو کې لا پسې ډېروالی راغلی او شخړې د هلمند ولایت د لښکرګاه په شان ښاري سیمو ته ننوتي.

په هلمند کې د (اېم‌اېس‌اېف) همغږې کوونکې سارا لیهي ویلي: "په ګڼ مېشتو سیمو کې د مرمیو انداخت، هوایي بریدونه او د هاوانونو توغول په دوامداره توګه ترسره کېږي. کورونه بمبارېږي او ډېر شمېر خلک له سختو ټپونو ځورېږي."

مېرمن سارا زیاته کړې چې په ښاري سیمو کې د جګړو زیاتېدو د «اېم‌اېس‌اېف» کارکوونکي وېرولي دي.

«اېم‌اېس‌اېف» ویلي که څه هم د سختو ټپیانو درملنه د دوی په غاړه نه‌وه، خو اوس په ورځ کې د ۱۰ ټپيانو جراحي عملیات کوي.

د بې‌پولې ډاکترانو د بیان له مخې په ټوله کې، د مې میاشتې له ۳مې بیا د جولای تر ۳۱مې، د «اېم‌اېس‌اېف» ټیمونو د شخړو له کبله د ۴۸۲ ټپي شویو کسانو درملنه وکړه چې نږدې ۹۲ سلنه کسان د چرو او مرمیو له کبله ټپیان شوي وو او نږدې څلورمه برخه یا ۲۶٪ سلنه له ۱۸ څخه کم عمره کسان وو.

اروپايي ټولنه: د ډیپلوماتیکو مراجعو د فعالیت دوام به د افغانانو په ګټه وي

په کابل کې د اروپايي ټولنې سفیر او د استازولۍ مشر وون برنټ

په کابل کې د اروپايي ټولنې سفیر او د استازولۍ مشر د ډیپلوماتیکو مرکزونو خوندیتوب او فعالیت له افغانانو سره د مرستو د دوام په خاطر مهم او اړین بللی دی.

سفیر وون برنټ نن په یوه لړ ټویټونو کې په دې اړه څرګندونې کړې دي.

هغه لیکلي چې د نړیوالو قوانینو له مخې د افغانستان او نړۍ په هر ګوټ کې ډیپلوماتان او ډپلوماتیک مرکزونه خوندي دي او د دوی خوندیتوب ځکه مهمه دی چې ان د کړکېچ په وخت کې هم د دولتونو ترمنځ حداقل تعاملات او روابط جاري وي.

د اروپايي ټولنې د استازولۍ مشر او سفیر زیاته کړې: "د سفارتونو او نورو ډیپلوماتیکو مراجعو دوامداره فعالیت به د ټولو افغانانو په ګټه وي او د بشري او پراختیايي مرستو په رسولو کې به د افغانانو لاسنیوی وکړي."

سفیر ون برنټ د خپلو ټويټونو په پای کې ویلي په ډاډ سره چې ده نه د کومې پټې معامې یا نه هم د طالبانو د خوځښت په اړه د ساده فکر په اړه اشاره کړې، بلکې د طالبانو هغه دوه عمومي اعلانونه‌یې یاد کړي چې ویلي یې دي ډیپلوماتیک مرکزونه به امن وي او طالبان په هېواد کې د پراختیايي او بشري مرستو د دوام لېوالتیا لري.

د اروپايي ټولنې دې لوړپوړي چارواکي داسې وخت په افغانستان کې د ډیپلوماتیکو مرکزونو په خوندیتوب ټینګار کړی چې په هرات کې د طالبانو له‌خوا د یوناما په دفتر د بریدونو راپور ورکړل شوی.

یوناما ویلي له طالبانو یې غوښتي د دې برید عاملان چې یو ګارډ یې وژلی دی باید ځواب‌ګویه واوسي او د دې قضیې جدي پلټنه وکړي.

طالبانو بیا ویلي چې په هرات کې د یوناما دفتر خوندي دی، خو دا چې د جګړې سیمې ته نږدې پروت دی ښايي ساتونکو ته‌یې زیان اوښتی وي.

جمهور رئيس غني پر روانو حالاتو د ملي شورا يوې فوق‌العاده غونډې ته وینا وکړه

د افغانستان جمهور رئیس محمد اشرف غني د ملي شورا فوق‌العاده غونډې ته د وينا پر مهال

د افغانستان جمهور رئیس محمد اشرف غني نن د ملي شورا په یوه فوق‌العاده غونډه کې د دغه هېواد په روانو حالاتو وینا وکړه.

ښاغلي غني وویل: "د افغانستان خلک له یوه ښکاره یرغل سره مخ دي او دا یوه وجیبه ده چې ټول د دغه یرغل په وړاندې ودرېږي."

هغه د سولې په تړاو په خپله وینا کې هم یادونه وکړه: "موږ ډېره نرمي وښودله او داسې ګامونه مو واخیستل چې د نړۍ په هېڅ کونج کې حکومت د پورته کولو جرئت نه‌لري، خو زموږ دښمن نه‌یوازې د سولې خوا ته ګام وانه‌خیست، بلکې زموږ اخلاص او صداقت‌یې کمزوري وګڼله."

جمهور رئیس غني داسې وخت د ملي شورا فوق‌العاده غونډه وربللې او وینا یې وکړه چې د افغانستان په ګوټ ګوټ کې جګړو زور اخیستی.

په وروستیو څو ورځو کې جګړې د هرات، کندهار، لښکرګاه او ځینو لویو ښارونو شااوخوا او ان دننه ځینو سیمو ته رسېدلي.

امریکا د کډوالو په توګه د افغانانو د ځای پر ځای کولو لپاره نوی پروګرام اعلانوي

د امریکا د بهرنیو چارو وزارت

په پام کې ده د امریکا متحده ایالاتو حکومت په دغه هېواد کې د کډوالو په توګه د افغانانو د ځای پر ځای کولو لپاره نوی پروګرام اعلان کړي.

روېټرز خبري اژانس د یوه چارواکي او دوو نورو کسانو په حواله چې له دې موضوع خبر وو، دا راپور ورکړی دی.

د دغو درېیو سرچینو په حواله چې نومونه‌یې نه‌دي اخیستل شوي، د کډوالۍ د دوهم لومړیتوب په نوم د پروګرام د ایجاد اعلان به احتمالاً د امریکا د بهرنیو چارو وزارت له‌خوا نن وشي.

د اژانس په وینا، د کډوالۍ د ځانګړي پروګرام (SIV) په چوکاټ کې تېره اوونۍ شااوخوا ۲۰۰ کسان چې د دوی او د کورنیو د غړو د ویزو کار یې په وروستیو مرحلو کې وو، امریکا ته رسېدلي دي.

په دې پروګرام کې ښايي شااوخوا ۵،۰۰۰ کسان شامل کړای شي.

سرچینو روېټرز ته ویلي، د کډوالۍ نوی پروګرام به له هغو افغانانو سره ارتباط لري چې د امریکا په مالي مرسته په عملي شویو پروژو، یا هم په امریکا کې دېره غیر دولتي ادارو یا هم امریکايي رسنیو سره کار کړی وي.

کاناډا او فرانسه کې سلګونه افغانانو د پاکستان پر ضد لاریون وکړ

د کاناډا په تورنتو کې مظاهرې

د کاناډا په تورنتو او د فرانسې په پلازمېنې پاریس ښار کې سلګونه افغانانو د افغانستان د ملي امنیتي ځواکونو او جمهوري نظام څخه د ملاتړ او د پاکستان پر ضد لاریون وکړ.

د لاریون تنظیموونکو ازادي راډیو ته ویلي چې د کاناډا او فرانسې مېشتو سلګونه افغانانو د یکشنبې ورځې په لاریون کې په افغانستان کې د پاکستان، ایران او ځینو نورو هېوادونو د نیابتي جګړې د ژر تر ژره بندېدو غوښتنه وکړه.

سیاسي فعال او د تورنتو د مظاهرې یوه تنظیموونکي حزب‌الله کاظم ازادي راډیو ته وویل: "زموږ د دې لاریونونو د برکته چې دا یوه لړۍ پیل شوې نه‌یوازې په کاناډا، بلکې په اروپايي هېوادونو او امریکا کې موږ هیله‌من یو چې تأثیر به‌یې دا وي چې د دوی توجه واوړي د پاکستان نیابتي جګړې ته او دوی هم لږ نور په اخلاص او جدي توګه باندې د افغانستان د قضیې لپاره لاس په کار شي."

له شاوخوا یوې میاشتې راهیسې په یو شمېر اروپايي هېوادونو له هغې ډلې بلجیم، بریتانیا او هالند کې هم ورته مظاهرې شوې دي.

سره له دې چې لاریونوالو د پاکستان حکومت او پوځیان د افغان جګړې تر شا ښکېل بللي، خو پاکستاني چارواکو په دې وروستیو کې په کلکه رد کړې چې دوی د افغان جګړې تر شا دي یا طالب جنګیالي تمویلوي.

کابل کې ۵،۰۰۰ ځوانانو په ملي پوځي اکاډمي کې د شاملېدو لپاره ازموینه ورکړه

د افغان پوځ لوی درستیز جنرال ولي محمد احمدزی په پوځي اکاډمي کې د شاملېدو لپاره ځوانان وستایل.

په کابل کې پنځه زره ښځو او نارینه‌وو په ملي پوځي اکاډمي کې د شاملېدو لپاره ازموینه ورکړه.

د دوی د ازموینې پر مهال د افغان پوځ لوی درستیز جنرال ولي محمد احمدزی او نور لوړپوړي پوځي چارواکي هم حاضر و.

جنرال احمدزي په پوځي اکاډمي کې د شاملېدو لپاره ځوانان وستایل: "له تاسو هر یوه او له ګرانو کورنیو مو مننه کوم چې په دې حساسو شرایطو کې چې زموږ په هېواد د افغانستان د قسم خوړلو دښمنانو له‌خوا حمله شوې او تاسو راغلي یاست د ملي اردو په لیکو کې شمولیت کوئ. امتحان ورکوئ او بالاخره په پروسه کې شاملېږئ."

دفاع وزارت وايي بریالي داوطلبان به د مارشال فهیم ملي دفاعي پوهنتون په ملي پوځي اکاډمي کې شامل او زده‌کړې وویني.

په کابل کې داسې وخت ۵ زره ځوانانو پوځي اکاډمي کې د شاملېدو ازموینه ورکړې چې په ټول هېواد کې جګړو زور اخیستی او ورځ تر بلې افغان پوځ او وسله‌وال طالبان په یو بل بریدونه کوي.

یواېن‌اېچ‌سي‌ار فراه او بادغیس کې زرو تازه بې‌ځایه شویو ته مرستې وکړې

ارشیف، هرات کې یو شمېر بې‌ځایه شوې کورنۍ چې د کډوالو لپاره د ملګرو ملتونو ادارې ورسره مرسته کړې ده.

د کډوالو لپاره د ملګرو ملتونو ادارې (یواېن‌اېچ‌سي‌ار) ویلي په فراه او بادغیس کې یې زرو تنو تازه بې‌ځایه شویو ته اړینې مرستې کړې دي.

دې ادارې پرون په خپل ټویټر دا خبره کړې ده.

د یواېن‌اېچ‌سي‌ار د بیان له مخې ۲۰۲۱ کال نږدې ۳۶۰ زره افغانان د جګړو په خاطر د خپلو کورونو پرېښودو ته اړ شوي دي.

یوازې د کندهار د وروستیو شااوخوا ۲۰ ورځو سختو جګړو په نتیجه کې له ۲۲ زرو زیات کسان بې‌ځایه شوي دي.

بې‌ځایه شوي خلک وايي چې خپلې سیمې یې د جګړو په خاطر پرېښودې، مګر په موقتي ځایونو کې هم له ډېرو سختو ستونزو سره لاس او ګرېوان دي.

د ملګرو ملتونو د کډوالۍ ادارې یواېن‌اېچ‌سي‌ار ټینګار کړی چې افغانستان لا زیاتو مرستو ته اړتیا لري.

د افغانستان عامې روغتیا وزارت: تر اوسه ۸۰ زره محصلین واکسین شوي

د کابل پوهنتون د محصلینو د واکسیناسیون لړۍ

د افغانستان عامې روغتیا وزارت وايي، تر دې دمه ۸۰ زره محصلین واکسین شوي او په پوهنتونونو او د لوړو زده‌کړو مؤسسو کې د محصلانو واکسیناسیون دوام لري.

د دغه وزارت ویاند دستګیر نظري پرون ازادي راډیو ته وویل: "د لوړو زده‌کړو وزارت د محصلانو حاضري د واکسین د کارتونو پر اساس تنظیم کړې او تر دې دمه د پوهنتونونو او لوړو زده‌کړو مؤسسو ۸۰ زره محصلینو واکسین لګولی."

د لوړو زده‌کړو وزارت تېره اوونۍ اعلان وکړ چې په افغانستان کې د لوړو زده‌کړو مؤسسو درسونه به د محصلینو تر واکسین وروسته د اسد/زمري په ۱۶مه پيل شي.

وزارت په محصلینو باندې واکسین جبري کړی او ویلي یې دي چې د واکسین له کارت پرته خپلو تعلیمي ادارو ته نه‌شي ننوتلی.

د رسمي شمېرو له مخې، تر دې دمه په افغانستان کې ۱۴۸،۰۰۰ خلک په کرونا ویروس اخته او له ډلې یې شااوخوا ۶،۸۰۰ کسان مړه شوي دي.

د سولې مرکچي پلاوي مشر معصوم ستانکزی د مشورو لپاره کابل ته راغلی

د افغانستان د سولې مرکچي پلاوي مشر معصوم ستانکزی

د افغانستان د سولې مرکچي پلاوي مشر معصوم ستانکزی د سلا مشورو لپاره کابل ته راغلی.

نوموړي نن یکشنبه(د زمري ۱۰مه) په کابل کې خبریالانو ته وویل، په دوحه کې اوس مهال راتلونکي نظام او اساسي قانون تر بحث لاندې دي او په دې برخه کې د دیني عالمانو او افغان ولس مشورې اړیني دي.

هغه وايي، دیني عالمان کولی شي د راتلونکي نظام په جوړښت کې رغنده رول ولوبوي.

د ښاغلي ستانکزي په باور، د یوې تل پاتې او هر اړخیزې سولې لپاره د دواړو خواو جدي اراده اړینه ده.

نوموړی ټینګار کوي چې افغان حکومت د سولې لپاره جدي اراده لري او مقابل لوری باید خپله قاطع اراده وښيې.

طالبانو تر اوسه په دې اړه څه نه دي ویلي، خو له دې وړاندې یې ټینګار کړی و چې دغه ډله د سولې خبرو ته جدي اراده لري.

د افغانستان د سولې مرکچي پلاوي مشر معصوم ستانکزی وايي، که جدي اراده رامنځته شي د افغانستان جګړه په یوې میاشت کابو کېدای شي.

ښاغلی ستانکزی داسې مهال کابل ته راځي چې له تېرو لسو میاشتو راپه دېخوا په دوحه کې د جګړې دواړه لوري په خبرو بوخت دي.

تندر قول اردو: پکتیکا کې د ۴ پاکستانیو په ګډون ۱۲ طالبان وژل شوي

ارشیف، عکس تزئیني بڼه لري

د تندر قول اردو چارواکي وايي، تېره شپه د پکتیکا د برمل ولسوالۍ د سپېرې په سیمه کې د ۴ پاکستاني وګړو په ګډون ۱۲ طالبان وژل شوي او ۹ نور ټپیان شوي دي.

نن د یکشنبې (د زمري ۱۰مه) په ورځ د تندر قول اردو د رسنیو د دفتر مشر ایمل خان مومند ازادي راډیو ته وویل، چې وسله والو ته یاده مرګ ژوبله د افغان ځواکونو په ځوابي بریدونو کې اوښتې ده.

مومند زیاته کړه: "تېره شپه د تندر قول اردو د دوهمې لواء منسوبینو د پکتیکا ولایت د برمل ولسوالۍ په اړوند سیمو کې د طالب ترهګرو ډله ییز بریدونه په شا تمبولي او په هغوی يې هدفمند بریدونه ترسره کړي چې په پایله کې د ۴ پاکستانیانو په ګډون ۱۲ وسله وال طالبان وژل شوي او ۹ تنه نور يې ټپيان شوي دي."

د نوموړي په وینا، د یو شمېر وژل شوېو وسله والو مړي د جګړې په ډګر کې پاتې شوي دي.

ایمل خان مومند وویل، په دې جګړه کې افغان ځواکونو ته کومه مرګ ژوبله نه ده اوښتې.

تر اوسه طالبانو په دې اړه رسنیو ته څه نه دي ویلي.

افغان حکومت: جرمني دې د جګړې پای لپاره پر طالبانو فشار راوړي

د افغانستان د بهرنیو چارو محمد حنیف اتمر په کابل کې د جرمني د سفارت شارژدافیر ژان هندریک وون ټیل سره

د افغانستان د بهرنیو چارو وزارت د جرمني پر حکومت غږ کړی چې د جګړو د پای ته رسولو او د ملکي وګړو د مرګ ژوبلې د مخنیوي په برخه کې پر طالبانو فشار زیات کړي.

د بهرنیو چارو وزارت ویاند ګران هېواد ازادي راډیو ته وویل چې د بهرنیو چارو وزیر حنیف اتمر او په کابل کې د جرمني د سفارت شارژدافیر ژان هندریک وون ټیل نن د زمري په لسمه نېټه په خپله کتنه کې په افغانستان کې پر روان تشدد، جنایتونو او بشري حقونو سرغړونو اندېښنه وښوده.

ښاغلي هېواد زیاته کړه: "د افغانستان د بهرنیو چارو وزیر غوښتنه وکړه چې نړیواله ټولنه په تېره جرمني دې په افغانستان کې د جګړې د پای ته رسولو او د ملکي وګړو د وژنو د مخنیوي لپاره پر طالبانو فشار راوړي. "

بیان زیاتوي چې د جرمني شارژدافیر د افغانستان د سولې له بهیره د خپل هېواد د ملاتړ او د بشري مرستو د دوام ډاډ ورکړ.

ملي امنیت کندهار کې نیول شوي خبریالان طالبانو سره په همکارۍ تورن کړي

ارشیف، عکس تزئیني بڼه لري

د ملي امنیت عمومي ریاست وايي، هغه څلور خبریالان چې تېره اوونۍ یې ونیول، له طالبانو سره په همکارۍ تورن کړي دي او وايي چې د دوی قضیه به ډېر ژر د هېواد عدلي او قضایي ارګانونو ته وسپارل شي.

تېره اونۍ د ملت غږ سیمه ییزې راډیو درې تنه خبریالان، بسم الله وطندوست، محب الله عبیدي او قدرت سلطاني او عکاس ثنالله سیام چې ویل یې د سینهوا خبري اژانس لپاره کار کوي د طالبانو تر ولکې لاندې بولدک ولسوالۍ ته له تلو وروسته د راستنېدو پر مهال ونیول شول.

ملي امنیت په یو بیان کې چې نن یکشنبه (د زمري ۱۰مه) خپور شو ویلي چې دې خبریالانو د زمري په ۳ مه نېټه په سپین بولدک کې د طالبانو د وژل شوي مشر ملا محمد عمر د زوی ملا یعقوب عمري په ګډون له یو شمېر طالب مشرانو سره د جنرال عبدالرازق په کور کې کتلي او مرکې یې ورسره کړي دي.

بیان زیاتوي چې د ملت غږ راډیو د فعالیت جواز نه لري او همدا راز سینهوا خبري اژانس ویلي دي چې سیام یې رسمي کار کوونکی نه دی.

ملي امنیت وايي، دې خبریالانو له طالب مشرانو سره په خپلو مرکو کې هڅه کړې چې طالبان پاک وښيي، پر تروریستي اعمالو یې سترګې پټې کړي او په دې توګه د عوامو ذهنیت د طالبانو په ګټه بدل کړي.

د ملت غږ راډیو ادارې پر وطندوست لګېدلي تورونه رد کړي او د هغه د ډېر ژر خوشې کېدو غوښتنه یې کړې.

له دې مخکې د خبریالانو مدافع ټولنو د دې خبریالانو د سمدستي خوشې کېدو غوښتنه کړې او حکومت یې د بیان پر ازادۍ په سانسور تورن کړی دی.

د بدخشان مرکز فیض اباد ښار کې چاودنه شوې

آرشیف،د بدخشان مرکز فیض اباد ښار

د بدخشان ولایت په مرکز فیض اباد ښار کې نن شنبه (د زمري ۱۰مه) یوه چاودنه وشوه.

د بدخشان د امنیه قوماندانۍ ویاند ثنالله روحاني د دې چاودنې د څرنګوالي په اړه بې خبري ښيي خو وايي چې د دوی څېړنې روانې دي.

د پېښې د تلفاتو په اړه تر اوسه څه نه دي ویل شوي، خو عیني شاهدانو ازادي راډیو ته وویل، چاودنه نن لس نیمې بجې شااوخوا د فیض آباد په نوي ښار کې د امنیه قوماندانۍ مخې ته هغه مهال وشوه چې د پولیسو یو موټر له سیمې د تېرېدو په حال کې و.

د سیمې اوسېدونکو ویلي چې چاودنه کې څو نژدې دوکانونه وران شوي دي.

د دې برید مسوولیت تراوسه کومې ډلې نه دی منلی. د بدخشان ښار ډېرې سیمې د طالبانو په ولکه کې دي.

چارواکي: هرات ته مرستندویه ځواکونه راورسیدل

آرشیف، افغان ځواکونه

افغان حکومت د هرات د دفاع لپاره هلته مرستندوی ځواکونه استولي.

دا ځواکونه داسې مهال استول کېږي چې افغان ځواکونو او طالبانو پرون او نن هرات ښار ته نژدې جګړو ته دوام ورکړ.

د هرات د والي ویاند جېلاني فرهاد نن شنبه (د زمري ۱۰مه) ازادي راډیو ته وویل، د طالبانو د حملو د شنډولو لپاره پر عملیاتي پلان کار روان دی: "په هرات کې کافي ځواکونه شته. نن ځانګړي ځواکونه هم را ورسېدل. اوس مهال د هرات په ولسوالیو کې دښمن د ځپلو لپاره د عملیاتو د ترسره کولو په هدف د پلان جوړول پیل شوي دي."

د راپورونو له مخې د جمعې په ورځ طالبانو د هرات ښار تر لمنو پرمختګ وکړ، خو امنیتي ځواکونه وتوانېدل چې شاتګ ته یې اړ باسي.

د طالبانو ویاند ذبیح الله مجاهد ازادي راډیو ته وویل، طالبانو پرونۍ حملې د دولتي ځواکونو د هغو بریدونو په ځواب کې وکړې چې د طالبانو پر ساحو یې کړې وې.

له بلې خوا دفاع وزارت هلمند ولایت ته هم د ځانګړو ځواکونو د استولو خبر ورکوي.

طالبانو په تېرو څو ورځو کې د هلمند پر مرکز لښکرګاه هم حملو ته زور ورکړی چې په نتیجه کې یې لسګونه کورنۍ بې ځایه شوي دي.

په همدې حال کې د کورنیو چارو وزارت پر هرات، کندهار او لښکرګاه ښارونو د وسله والو طالبانو له درنو حملو وروسته، په کابل کې د پولیسو د درېیو احتیاطي عملیاتي کنډکونو د جوړېدو خبر ورکوي.

د بشري حقونو کمېسیون:د ملکي افغانانو مرګ ژوبله ۸۰ سلنه زیاته شوې

د افغانستان په جنګ کې ټپي شوی ماشوم

د افغانستان د بشري حقونو خپلواک کمېسیون وايي چې د روان میلادي کال په لومړۍ نیمايي کې د ملکي افغانانو په مرګ ژوبله کې د تېر کال د همدې مودې پرتله اتیا سلنه زیاتوالی راغلی.

دې کمېسیون نن د زمري په لسمه په یوه نوي راپور کې وویل چې د سږني کال د جنوري له لومړۍ نېټې د جون تر پایه، د افغانستان په جګړو کې نژدې ۱۷ سوه ملکي وګړي وژل شوي او له ۳۶۰۰ زیات نور ملکیان ټپیان شوي دي.

راپور زیاتوي چې په وژل شوېو کې ۱۲۶ ښځې او ۳۷۳ ماشومان هم شامل دي.

د بشري حقونو خپلواک کمېسیون طالبان په ۵۶ سلنه، نامعلوم وسله وال په ۲۲ سلنه، افغان دولتي ځواکونه په ۱۵ سلنه او داعش ډله په ۷ سلنه ملکي مرګ ژوبله ګرم بللي دي.

د دې سازمان د راپور له مخې د تېر کال په لومړیو شپږو میاشتو کې د جګړو په ترڅ کې ۱۲۱۳ ملکي وګړي وژل شوي او ۱۷۴۴ نور ټپیان وو.

کمېسیون یو ځل بیا د مذاکراتو له لارې د جګړې پر ختمېدو ټینګار کړی او له ملګرو ملتونو او نورو نړیوالو ټولنو څخه یې غوښتي دي چې افغانستان کې د جګړې د پای ته رسولو لپاره له خپلو ټولو امکاناتو کار واخلي.

د طالبانو ویاند ذبیح الله مجاهد له ازادي راډیو سره په خبرو کې دا راپور رد کړ، خو افغان حکومت تراوسه په دې اړه څه نه دي ویلي.

نور راوښيه

XS
SM
MD
LG