د افغانستان د ملي امنیت شورا یو ځل بیا د القاعده شبکې او وسلهوالو طالبانو په ځپلو ټينګار کوي.
د افغانستان د ملي امنیت شورا وایي له وسلهوالو طالبانو سره د القاعده شبکې بیعت څه نوې مسئله نه ده او دا ډلې له لومړي سره د منابعو او امکاناتو له پلوه سره یو ځای وې.
د دې شورا ویاند تواب غورځنګ د یکشنبې په ورځ ازادي راډیو ته وویل چې دا مسئله د افغانانو د نابودۍ لپاره د افغانستان د دښمنانو د متحد کېدو څرګندونه کوي.
ښاغلي غورځنګ ټينګار وکړ چې القاعده او طالبان د افغانستان ملي امنیت ته ګواښ ګڼل کېږي او حکومت له دغو ډلو سره د مبارزې لپاره ژمن دی.
ښاغلی غورځنګ وايي:
"هم د القاعده ترورېستي ډله او هم د وسلهوالو طالبانو ډله د افغانانو او افغان حکومت سره د جګړې اعلان کړی دوی له پیل څخه د ترورېستي فعالیتونو په انسجام کې سره همکار و، افغان ځواکونه د دغو ترورېستي ډلو سره د مبارزې لپاره متحد دي او د خلکو او له دې خاورې دفاع کوي."
رویټرز خبري اژانس په دې وروستیو کې راپور ورکړی چې د القاعده شبکې مشر ایمنالظواهري په یوه غږیز پیغام کې د طالبانو له نوې مشر ملا هبتالله اخوندزاده سره بیعت اعلان کړی.
له دې وړاندې ایمنالظواهری د وسلهوالو طالبانو له پخواني مشر ملا اختر منصور سره هم بیعت کړی و.
نږدې دوه میاشتې مخکي په افغانستان کې د ناټو او امریکایي ځواکونو عمومي قومندان جنرال جان نیکولسن ویلي چې د طالبانو او القاعدې تر منځ اړیکې پیاوړې شوې دي.
همدارنګه د افغانستان دفاع وزارت هم په دې وروستیو کې تائید کړې چې القاعده شبکه یو شمېر ترورېستي فعالیتونه په دې هېواد کې پیل کړي دي.
سره له دې چې د افغانستان د ملي امنیت شورا ویاند په افغانستان کې د القاعده شبکې د اوسنی فعالیت څرنګوالي په اړه اشاره ونه کړه خو د ناټو د قاطع ملاتړ مأموریت ویاند نږدې یوه میاشت مخکې ویلي فکر نه کوي چې القاعده شبکه د افغانستان حکومت لپاره یو ګواښ رامنځته کړي.
خو چارلز کلیفلند ویلي چې د امکاناتو او مهارتونو له لارې د القاعده شبکې او طالبانو تر منځ د همکاریو زیاتېدل امکان لري چې د طالبانو هڅې چټکې کړي.
په همدې حال کې د امنیتي چارو یو شمېر کارپوهان وایي حکومت باید د وسلهوالو مخالفانو د نویو تحرکاتو سره د مقابلې لپاره پوره چمتووالی ولري.
افغان کارپوه اسحق اتمر وویل د مخالفانو یو ځای کېدل کولای شي چې امنیتي ګواښونه زیات کړي.
ښاغلی اسحق اتمر وايي:
"زه فکر کوم چې د دغو ستونزو او ننګونو په مقابل کې باید دولت یو قوي دریځ ولري، امنیتي ځواکونه پیاوړي کړي نوي تجهیزات راته برابر کړي تر څو د دغو ننګونو په مقابل کې پوره امادهګي ولري."
له دې وړاندې په افغانستان کې د ناټو د قاطع ملاتړ مأموریت وسلهوال طالبان د افغان ځواکونو په وړاندې تر ټولو لویه ډله ګڼلې وه.
د دې مأموریت ویاند وویل افغان امنیتي ځواکونه د تېر په پرتله په ښه دریځ کې دي او تعرضي حالت ته راتلل په روانه جګړه کې د دغو ځواکونو د بریا سبب شوی دی.
راپور: ناجیه ساپۍ
