د کابل ښار د سرای شهزاده صرافان وايي، افغان حکومت او په تېره افغانستان بانک دې د دوی پر ضد د شفافیت د څار د بنسټ راپور دې وڅیړي.
دوی د یکشنبې په ورځ په کابل کې خبریالانو ته وویل، د دوی د فعالیتونو په اړه د شفافیت د څار د بنسټ راپور بې بنیاده دی.
د شفافیت د څار بنسټ ویلي چې د افغانستان ډیری صرافان په غیر قانوني توګه د پیسو د لیږد رالیږد چارې پرمخ وړي.
د کابل ښار په سرای شهزاده کې د افغانستان د صرافانو سراسري ټولنې، د شفافت د څار د بنسټ هغه راپورونه رد کړل چې ویلي یې دي، د ځینو کسانو غیر قانوني پیسې د صرافانو په ذریعه بهر ته لیږدول کیږي.
د افغانستان د صرافانو د سراسري ټولنې ريیس خان محمد باز د دوشنبې په ورځ په کابل کې خبریالانو ته وویل، د شفافیت د څار د بنسټ راپور بې بنیاده دی.
ښاغلي باز وویل، د شفافیت د څارد بنسټ دا راپور، د صرافانو پر وړاندې د خلکو د بې باورۍ له پیدا کولو پرته نور څه نه دي:
"دغه بنسټ په غیر مسوولانه او غیر عادلانه توګه دغه راپور خپور کړی، موږ دا نظر ردوو. د سرای شهزاده هر صراف د مرکزي بانک دوه ډوله قانوني جوازونه لري، یو، د پولي خدمتونو او بل د صرافۍ. د سرای شهزاده او همدارنګه د هېواد په مرکز او ولایتونو کې یو صراف هم غیر قانوني فعالیت نه کوي او نه ورته اجازه ورکول کیږي."
ده وویل، د کابل ښار د سرای شهزاده صرافان هره میاشت د خپلو فعالیتونو راپور مرکزي بانک ته وړاندې کوي او د یاد بانک د قوانیو او مقرراتو او همدارنګه د پولي خدمتونو له نړیوالو اصولو سره سم فعالیت کوي.
د دغې اتحادیې مسوولینو وویل، تل یې له مشکوکو او غیر قانوني پولي خدماتو له ترسره کولو ډډه کړې ده.
د یادې ټولنې غړېو له حکومت او په تیره له مرکزي بانکه وغوښتل چې د افغانستان د څار بنسټ د راپور پر وړاندې دي، قانوني چلند وکړي.
د کابل د شهزاده سرای صرافان په داسې حال کې د افغانستان د شفافیت د څار د بنسټ د راپور پر وړاندې غبرګون ښیي چې تېره اوونۍ د شفافیت د څار بنسټ د خپلې یوې سروې په اساس خبریالانو ته وویل چې په افغانستان کې۸۰ فیصده صرافان د پولي خدماتو قانوني جواز نه لري او بهر ته د غیر قانوني پیسو لیږد هم د افغان صرافانو په ذریعه ترسره کیږي.
د شفافیت د څار بنسټ دا هم ویلي چې د مخدرو موادو ناجایز عواید او همدارنګه تورې پیسې د غیر قانوني حوالو له لارې بهر ته انتقال او له سپینولو وروسته بیرته افغانستان ته داخلیږي.
د اقتصادي چارو پوه عبدالله واحد یار په دې اړه ازادي رادیو ته وویل، د پیسو د لیږدولو خدمات د هېواد له اقتصادي سره مرسته کوي خو په دې شرط چې حکومت ورته یو معیاري میکانیزم جوړ او کنترول یې کړي.
ښاغلي واحد یار زیاته کړه:
"دغه ادعا چې دغه پیسې په غیرقانوني ډول د حوالو په بڼه له هېواده وځي او یا داخلیږي، د دې بشپړ ټکس حکومت ته نه ورکول کیږي، بلکې یوازې د بانکونو او ټي، ټي، له لارې حکومت مالیه اخلي.که حکومت دوی ته یو سالم میکانیزم جوړ کړي، د حوالو سیستم به کنټرول او دولت ته به یوه لویه عایداتي منبع و ګرځي."
ښاغلی واحد یار وايي، سره له دې چې د صرافانو په ذریعه د حوالو سیستم حکومت ته ښه عایداتي منبع ده خو په لنډ مهال کې ناممکنه ده چې حکومت یې کنترول کړي.
دی وايي، د حوالو کنټرول د حکومت له پیاوړتیا پورې تړلی دی.
راپور: خان محمد سیند
