د لاسرسۍ وړ لېنکونه

تازه خبر
سه شنبه ۱۸ سلواغه ۱۴۰۱ کابل ۰۷:۴۶

افغانستان

د کابل بانک د بحران د ځانګړي محکمې وروستۍ پرېکړه ناسمه بلل شوې

له اداري فساد سره د مبارزې او څېړنې ګډې کمېټې د کابل بانک د بحران د ځانګړي محکمې وروستۍ پرېکړه ناسمه بللې.

د دې کمېټې چارواکو پرون په کابل بانک کې د 900 میلیون ډالره اختلاس په اړه د خپل راپور د خپرولو پرمهال وویل، چې د محکمې حکم د اختلاس کچې ته په پام سره ډېر کم دی او تورونو کسانو ته د لویې څارنوالۍ له اتهام پاڼې سره سمه سزا نه ده ورکړل شوې.

له اداري فساد سره د مبارزې او څېړنې د ګډې کمیټې مشر ډراګو کاس Drago Kos پرون په کابل کې خبریالانو وویل، تورن کسان د جنایتکارانو یوه منظمه ډله وه چې د کابل بانک پیسې یې په عمدي ډول غلا کړې دي.

د کابل بانک د بحران ځانګړې محکمې د کابل بانک پخوانی رئیس او مرستیال شیرخان فرنود او خلیل الله فیروزي هریو په پنځو کلونو حبس محکوم کړي وو.

د ورځې تازه خبرونه دلته ولولئ

د طالبانو حکومت د ترکيې او سوريې له زلزله‌ځپلو سره ۱۵مليونه افغانۍ مرسته اعلان کړه

د ترکيې د وروستۍ زلزلې له امله د مړو شمېر ۵۰۰۰ ته رسېدلی دی.

د طالبانو حکومت د ترکیې او سوریې له زلزله‌ځپلو سره د پنځلس ملیونه افغانیو د مرستې اعلان وکړ.

د طالبانو د بهرنیو چارو وزارت نن په یوه خپره کړې خبرپاڼه کې د دواړو هېوادونو له زلزله‌ځپلو سره د خواخوږۍ څرګندولو ترڅنګ، د ترکیې له زلزله‌ځپلو سره د لس ملیونه افغانیو او د سوريې له هغو سره د پنځه ملیون افغانیو د مرستې اعلان کړی دی.

دغه راز ویل شوي چې، د افغانستان د اسلامي امارت د ژغورنې او روغتیا ټیمونه هم چمتو دي، چې د اړتیا پر مهال د ژغورنې په عملیاتو کې برخه واخلي او خپلو ترکي او سوریايي زلزله‌ځپلو خویندو او ورونو ته مرستې ته ورسوي.

د طالبانو حکومت داسې مهال د سوریې په ګډون د ترکیې له زلزله‌ځپلو سره مرسته کوي چې په هېواد کې دننه په ملیونونو کسان بشري مرستو ته اړ دي او ترکیې هم په دې برخه کې تر اوسه د ډېرو افغانانو لاس‌نیوی کړی دی.

کابل کې د کم‌عمره ځوانانو د فوټبال سیالۍ پیل شوې

په کابل کې د کم عمره ځوانانو فوټبال لوبډله

د افغانستان فوټبال فدراسیون له لوري په کابل کې تر ۱۴ کلونو د کم‌عمره ځوانانو ترمنځ فوټبال سیالۍ پیل شوې.

د فوټبال فدراسیون په وینا، د دغو سیالیو موخه له ۱۴ کلونو کم‌عمره فوټبال ملي لوبډلې ته د غوره لوبغاړو ورپېژندل دي.

یاد فدراسیون دغه راز زیاتوي ډېر ژر به په نورو ولایاتو کې هم د کم‌عمره ځوانانو سیالۍ پیل شي.

د یادونې وړ ده چې نن (د فبرورۍ ۷مه) په هرات ولایت کې هم د لسو لوبډلو ترمنځ د فوټبال غوره لیګ سیالۍ پیل شوي دي.

په کورني کرېکټ سياليو کې فيصل خان غبرګه سلیزه ووهله

افغان کرېکټ لوبغاړی فيصل خان

د افغانستان په کورنیو کرېکټ سیالیو کې د میدان وردګ لوبغاړي فیصل خان غبرګه سلیزه ووهله.

ښاغلي خان نن(د فبرورۍ ۷مه) د ننګرهار په غازي امان الله خان لوبغالي کې د هلمند لوبډلې پر وړاندې ۲۰۴ ناسوځېدلې منډې وکړې.

نوموړي ۱۶۴ توپونه لوبولي، ۲۵ څلوریزې او ۵ شپږیزې یې وهلي دي.

دغه یو ورځنۍ سیالۍ چې د ۳۱ دویمه درجه ولایتونو ترمنځ روانې دي، رسمي حیثیت نه‌لري؛ خو د افغانستان کورني کرېکټ د کړنلارې له‌مخې راتلونکو سترو رسمي کورنیو سیالیو ته د رسېدو لپاره هر ځوان لوبغاړی باید په دې کچه سیالیو کې ښې لوبې ترسره کړي.

د یادونې وړ ده چې تر دې وړاندې د افغانستان اوسني ملي لوبغاړي عثمان غني او د لوګر ولایتي لوبغاړي صابر حنیف هم په دویمه درجه ولایتي سیالیو کې غبرګې سلیزې وهلې وې.

د ځینو طالبانو د تایید شویو حسابونو په اړه 'ایلون ماسک' ته خبرداری ورکړ شوی

د ټویټر اجراییه رییس ایلون ماسک

د امریکا یو شمېر جمهوریپالو وکیلانو د ټویټر اجراییه رییس ایلون ماسک ته د طالبانو د ځینو چارواکو د تایید شویو حسابونو په اړه خبرداری ورکړی دی.

د واشنګټن ټایمز ورځپاڼې د راپور له مخې د استازو جرګې غړو پات فالون، کیت سیلف، روني جکسن او جیمز مویلان په یوه لیک کې ماسک پوښتلی دی چې ټویټر څنګه د دوی په وینا د شریرو عناصرو له خوا د دې ټولنیزې شبکې د ناوړه کارولو مخه نیسي او د ابي رنګه علامې په وسیله د حسابونو د تایید په بهیر کې د حساب لرونکو هویت څنګه چک کوي.

ماسک وروسته له دې چې د ټویټر اجراییه رییس شو د شخصي حسابونو د تایید لپاره بیه وټاکله چې ورسره د طالبانو ځینو چارواکو هم د خپلو ټویټر حسابونو لپاره د تایید ابي علامه وپېرله.

دې کار ځینې خلک اندېښمن کړل چې ښايي له ټویټر څخه د نفرت د خپرولو لپاره کار واخیستل شي.

د پاکستان له یو زندانه ۴۰ نور افغانان خوشې شوي

ارشیف: د کراچۍ په یوه زندان کې بندي افغانان

د پاکستان د سند ایالت له یو زندانه د ۴۰ نورو افغانانو د خوشې کېدو خبر ورکړل شوی دی.

باختر خبري اژانس چې د طالبانو حکومت یې اداره کوي نن د کډوالو او راستنېدونکو چارو وزارت د بیان په حواله راپور ورکړ چې دا کډوال په پاکستان کې د افغان سفارت او په اسلام اباد کې د کډوالو د ادارې د هڅو په نتیجه کې خوشې شوي دي.

په بیان کې راغلي چې ټول خوشې شوي کسان به ډېر ژر د سپین بولدک د دروازې له لارې افغانستان ته واستول شي.

بیان زیاتوي چې د کراچۍ په لندي او پېچي محبسونو کې د ۱۶۰ نورو افغانانو د خوشې کولو هڅې هم روانې دي او ښايي اړونده محکمه تر دوو درېیو ورځو د هغوی د خوشې کولو حکم وکړي.

په کراچۍ کې د افغان بندیانو مدافع وکیلې منیزې کاکړ له دې مخکې ازادي راډیو ته ویلي و چې د کراچۍ په مرکزي زندان کې ۱۴۰۰ افغانان لاهم بندیان دي.

د اسلامي همکاریو سازمان د افغانستان په اړه بحث کوي

ارشیف: د اسلامي همکاریو د سازمان د غړو هېوادونو د مشرانو انځور

د اسلامي همکاریو د سازمان یا او ای سي عمومي منشي حسین ابراهیم طه وايي چې په افغانستان کې روان بدلونونه د فلسطین په څېر د دې سازمان د اجراییه کمېټې د فوق العاده جلسې مهمه برخه ده.

ښاغلي طه دا څرګندونې د اسلامي همکاریو د جګپوړو چارواکو د ۴۹مې غونډې په درشل کې پرون د دې سازمان مقدماتې غونډې ته د وینا پرمهال وکړې.

په پام کې ده چې د بهرنیو چارو د وزیرانو ۴۹مه غونډه د راروانې مارچ میاشتې په ۱۶مه او ۱۷مه جوړه شي.

طه بېګا په یوه بیان کې وویل چې په پرونۍ غونډه کې د افغانستان لپاره د دې سازمان د استازي طارق علي بخیت له لارې د طالبانو له چارواکو سره د تعامل د اړتیا په ګډون یو لړ سپارښتنې وشوې.

د اسلامي همکاریو سازمان د مرغومي په ۲۱مه له یوې بېړنۍ غونډې وروسته په یوه بیان کې د طالبانو له حکومته وغوښتل چې د نجونو تعلیم او د ښځو کار ته اجازه ورکړي.

د اسلامي همکاریو سازمان وویل چې د پوهنتون په ګډون تعلیم ته د نجونو لاسرسی د بشر اساسي حق دی او باید محدود نه شي.

یونېسف: افغانستان د تېرو ۱۵ کلونو له تر ټولو سخت ژمي سره مخامخ دی

ارشیف: په کابل کې بېوزله ښځې او ماشومان

د ملګرو ملتونو د ماشومانو د ملاتړ د صندوق یا یونېسف د اجراییه مرستیال وايي، افغانستان د تېرو ۱۵ کلونو له تر ټولو سخت ژمي سره مخامخ دی.

عمر عبدي په یوه بیان کې چې پرون یې پر ټویټر خپور کړ ویلي چې د افغانانو بشري اړتیاوې خورا زیاتې دي.

د یونېسف دې چارواکي ویلي چې که له افغانانو سره مرستې ونه شي نو یو بشري ناورین به رامنځته شي.

د عبدي په وینا دا مهال شاوخوا ۲۸ میلیون افغانان مرستو ته اړ دي.

دا څرګندونې داسې مهال کېږي چې د ملګرو ملتونو بېلابېلو ادارو هم په سږني ژمي کې بشري مرستو ته د افغانانو پر جدي اړتیاوو ټینګار کړی.

ګڼو رسنیزو ادارو له طالبانو د 'مرتضی بهبودي' د خوشې کولو غوښتنه کړې

ارشیف

د بې سرحده خبریالانو ټولنې یا ار ایس ایف او د فرانسې ۱۴ رسنیو او تولیدي شرکتونو د طالبانو له حکومته غوښتي دي چې افغان الاصله فرانسوی خبریال مرتضی بهبودي له بنده خوشې کړي.

دې ټولنې دا غوښتنه پرون په یوه بیان کې وکړه.

ار ایس ایف وايي، بهبودي نږدې یوه میاشت مخکې په کابل کې نیول شوی او بندي شوی دی.

د خبریالانو دا مدافع ټولنه وايي چې بهبودي دوه ورځې وروسته له دې چې د سفر په نیت افغانستان ته ولاړ، د جنوري په ۷مه د طالبانو له خوا ونیول شو.

طالبانو تراوسه په دې اړه څه نه دي ویلي.

طالبانو د ۲۰۲۱ کال په اګست میاشت کې پر افغانستان له واکمنېدو وروسته یو شمېر خبریالان ونیول چې ځینې یې وروسته خوشې کړل. تراوسه د طالبانو له خوا د نیول شویو خبریالانو دقیق شمېر نه دی معلوم.

د واورو له امله له کابل سره د ډايکنډي، غور او باميان ولايتونو لارې تړل شوي

ارشيف

د دایکنډي، غور او بامیان ولایتونو لپاره د طالبانو چارواکو پرون ویلي، سخت اورښتونه او توفانونه له کابل سره د دغو ولایتونو د لارو د تړل کېدو سبب شوي دي.

د غور لپاره د طالبانو د والي ویاند عبدالواحد حماس پرون د غور-کابل د لویې لارې د تړل کېدو موضوع تایید کړه او وايي د مرکز او شپږو ولسوالیو ترمنځ لارې هم بندې دي.

د بامیان لپاره د طالبانو چارواکو هم د دایکنډي، غور او بامیان ولایتونو له اوسېدونکو غوښتنه کړې، چې د هوا د وضعیت تر ښه کېدو پورې د دغو ولایتونو پر لویو لارو له سفر کولو ډډه وکړي.

د روغتيا سازمان: هر افغان ماشوم بايد د پوليو ضد واکسين شي

ارشيف

د روغتیا نړیوال سازمان یا WHO وایي، له پولیو څخه د یوه خلاص افغانستان لپاره اړینه ده چې کوچني ماشومان د پولیو ضد واکسین په هر کمپاین کې واکسین شي.

WHO پرون په یوه ټویټ کې ویلي، پولیو یوه ناعلاجه ناروغي ده خو یوازې هغه مهال یې مخه نیول کېدای شي چې ټول له پنځو کلونو کم‌عمره ماشومان په هر کمپاین کې د پولیو پر ضد واکسن شي.

د روغتیا د نړیوال سازمان په وینا په دې کار سره یوازې خپل ماشومان نه ساتئ بلکې د ټولو لپاره یوه سالمه او خوندي ټولنه هم رامنځته کوئ.

د پولیو ضد د واکسین په هغه کمپاین کې چې په تېره جنوري میاشت کې د افغانستان په شاوخوا پنځلسو ولایتونو کې ترسره شو، له پنځو کلونو کم‌عمره ۵،۳ ملیونه ماشومان په نښه شوي و.

په افغانستان کې چې تېر۲۰۲۲ کال د پولیو دوه مثبتې پېښې ثبت شوې وې، سږ کال تر اوسه د پولیو هیڅ یوه پېښه نه‌ده ثبت شوې.

د روغتیا د نړیوال سازمان په وینا تېر کال پاکستان کې د پولیو۲۰ او موزمبیق کې اته مثبتې پېښې ثبت شوې وې.

نور راوښيه

XS
SM
MD
LG